ما هى فائدة التصنيف الائتمانى ؟ وما الفارق بين وكالاته المختلفه ؟

ايه فايدة التصنيف الائتمانى اصلا بالنسبه لك كفرد؟!

هتستفيد ايه لو مصر اترفع تصنيفها الائتمانى؟!

هنتكلم الكلام البسيط بعيدا عن التفاصيل الفنيه

ما هو التصنيف الائتمانى  ؟

فيه مؤسسات مختصه بانها تقول انت تصنيفك الائتمانى يطلع ايه 

ده ينطبق على الدول

وعلى البنوك

وعلى الشركات 

وعليك انت شخصيا كفرد 

ايوه

انت لما تروح تاخد قرض من البنك ، فالبنك لازم يدرس تصنيفك الائتمانى 

ولما بتروح تعمل ماستر كارد مثلا ، فبرضه هيدرسوا تصنيفك الائتمانى

وعشان كده تلاقى البنك بيسالك اسئله تبدوا حشريه ورخمه

زى دخلك كام ؟ ثروتك قد ايه ؟ واحيانا عندك املاك ؟ وقد ايه ؟ وممكن يطلب اوراق بالكلام ده

ده بيحصل فى الدنيا كلها

من الاخر 

هم عاوزين يعرفوا قدراتك على السداد اخرها كام ؟ عشان لما يسلفوك مثلا ( الماستر كارد لو فيها رصيد هتعتبر سلفه ليك برضه والرصيد ده بيحدد بناء على تصنيفك الائتمانى وشوية عوامل تانيه كده )

برضه عاوزين يعرفوا انت ايه احتمالات تخلفك عن السداد ؟ هل ممكن متسددش ؟ هل ممكن تتاخر فى السداد ؟ ايه الاحتمالات ؟

عشان كده كنت تلاقى البنوك دايما ممكن تسلف الغنى اسهل بكتير من الفقير !

وانت تستغرب اوى .... يعنى هو غنى مش محتاج ليه بيسلفوه ؟ ويسيبوا الفقير يقرفوه بطلبات كتير مبيطلبوهاش من الغنى ؟

الفكره فى الاساس هى نقطة التصنيف الائتمانى

نفس الكلام عن الدول 

انت دوله تصنيفك الائتمانى عالى ... معنى كده انك تقدر تسدد القروض اللى هتستلفها 

معنى كده ان ( مخاطر الاقراض ليك ) منخفضه 

يعنى اللى هيسلفك ده مش هيتعرض لمخاطر كبيره ( يعنى احتمال سدادك للدين مرتفع ، واحتمال تعثرك منخفض )

وساعتها هتبقى الفايده اللى انت بتستلف بيها اقل 

يعنى التكلفه بتاعة الاستدانه دى ... بتقل 

وبالتالى فالدوله دى هتوفر فلوس اكتر كانت ممكن تدفعها فوائد ديون قبل رفع تصنيفها الائتمانى 

يعنى ده هيسهل عليها الاقتراض بفوائد اقل وفى كل الاحوال كل الدول فى العالم بتقترض ، يعنى مسأله حتميه ، يبقى لما تقترض تدفع فوائد اقل ، شى افضل اكيد

وعشان كده هتلاقى الدول الكبرى والغنية هى اكثر دول عليها ديون ، بينما الدول الفقيره هى اقل دول عليها ديون عكس ما انت متخيل ، تقدر تراجع مقال الديون الخارجيه لو عاوز من هنا 

طيب ايه هى وكالات التصنيف الائتمانى ؟

فيه فى العالم 3 مؤسسات كبار بيشتغلوا فى الموضوع ده 

غالبا انت سمعت اسماءهم قبل كده

فيه منهم اثنين عملاقين وواحده اصغر شويه 

العملاقين مقرهم فى امريكا وهم

ستاندرد اند بورز 

Standard & Poors or S&P

موديز

Moody's

والاثنين دول لوحدهم بيسيطروا على 80% تقريبا من السوق العالمى

كل واحده 40% تقريبا

الوكاله الثالثه الاصغر هى فيتش 

Fitch

ودى لها مقرين ، واحد فى امريكا فى نيويورك ، والثانى فى لندن

ودى بتسيطر على 15% تقريبا من السوق العالمى 

يعنى الاجمالى 95% على الاقل للوكالات الثلاث ، والباقى الخمسه فى المائه  لوكالات صغيره غير مشهوره زيهم 

ده يوصلك ان امريكا مسيطره تماما على سوق التصنيفات الائتمانيه فى العالم كله وده طبعا سوق مهول وخطر واقتصاد العالم وسياساته الماليه والنقديه مربوطه بيه 

ولهم نفوذ وسمعة يفوق دول كثير ، ويكفى ان تفهم ان تخفيضاتهم للتصنيفات الائتمانيه لليونان والبرتغال  وايرلندا تسببت فى تفاقم واشتعال ازمات ماليه فى اوروبا استمرت تاثيراتها الاقتصاديه والسياسيه سنوات 

وسبق لهم تخفيض التصنيف الائتمانى لادوات الدين التى تصدرها الحكومه الامريكيه نفسها 

بالتالى افهم ان دول نظام عالمى من المستبعد الخروج عنه او عليه 

تمام ؟ 

هل فيه فروق بينهم فى طريقة الشغل وحساب التصنيف الائتمانى ؟

ايوه فيه بعض الفروق 

فيه بعض الفروق الفنيه 

اهمها مثلا ... ان ستاندرد اند بورز يهمها فى المقام الاول معرفة ام هى احتمالات عدم السداد ؟ هذا اهم ما يشغل بال المؤسسه

بينما موديز مثلا يهمها معرفة ماذا سيحدث لو تم التخلف عن السداد ؟
كم ستكون الخسائر ؟ متى ستكون قادرا على السداد وباى طريقه ؟

ده معناه ان موديز لو خفضت التصنيف فمعنى كده ان هناك خسائر اكبر من الوضع السابق فى حالة عدم السداد 
لهذا قد يلجأ المستثمرون للبيع عقب تخفيض موديز على عكس تخفيض ستاندرد اند بورز الذى سيتكلم عن الحاله الافتراضيه ويترك لهم تصور نتائج هذه الحاله الافتراضيه ، اللى هى عدم السداد

وهكذا 

لكن رفع التصنيف الائتمانى لدولتك هيعود عليك انت كشخص بايه ؟

تخيل كده بدل ما كنت هتسدد مثلا 10 مليار دولار فوائد + ديون 

فانت ممكن تسدد 9 مليار دولار فقط ، ولو اترفع تصنيفك الائتمانى ، ممكن تقترض وتسدد بعد كده 8 بس ، وهكذا ( للتبسيط )

ده هيقلل الطلب على الدولار ، وبالتالى هيقلل سعره ، وبالتالى هيقلل التضخم واحتمالاته ، ويقلل زيادات الاسعار ، وتبقى اكثر استقرارا بالنسبه ليك ( السلع المستورده بالذات )

ومن جهة تانيه ده هيوفر للموازنه بتاعتك فلوس كتير ، تقدر الدوله تستعملها فى مشروعات داخليه ، او تضبط المرتبات شويه ، او المعاشات مثلا بدون متزود العجز فى الموازنه ، ولا تضطر انها تطبع فلوس ، وبالتالى يقل التضخم برده ويعود عليك ده بتحسن مستوى المعيشه

برضه الدوله اللى تصنيفها الائتمانى افضل وبيتحسن ، ده دليل ليك ات كشخص عادى مش فاهم اى شىء فى الاقتصاد ، ان المستقبل افضل ، وان الدوله بتعمل الصح ، اللى انت يمكن مش مستوعبه اوى ، وحاسسه مؤلم ( وهو كذلك فعلا) لكن طلع صح حسب كلام المؤسسات الدوليه دى

اى جهة عاوزه تسلف جهة اخرى بتلجأ للمؤسسات المختصه عشان تعرف التصنيف الائتمانى للجهة اللى هتستلف ، وتبدأ تحدد بقى على اساس التصنيف ده بالذات هتسلفها كام ، وبفايده كم

هل ممكن ان المؤسسات دى تغشنا ؟ تخدعنا و تعطينا تصنيف اعلى مما نستحق ؟

لا ، مينفعش

ليه ؟

لان فى الحقيقه مش انت اللى هتلبس فى الحيط لو هم كذبوا او غلطوا 

اللى بيلبس فى الحيط هو اللى بيسلفك ، اللى بيقرضك ، لانه سلفك بفايده اقل 

وكان ممكن يكسب اكتر لولا هذا التصنيف الجديد

يعنى انت المستفيد لو التصنيف ده غير صحيح ، و هم ( المؤسسات والبنوك والمستثمرين والصناديق اللى بتسلفك ) هم اللى خسرانين

و لو اكتشفوا الخدعه ، المؤسسه بتاعة التصنيف دى هتفقد مصداقيتها و تتقفل بكره الصبح لان محدش عاد هيصدقها تانى

ممكن يحصل العكس يعنى تديك تصنيف ائتمانى اقل مما تستحق لكن ترفعك اكتر مما تستحق صعب جدا

ده هيدمر ثقة المستثمرين فيها لانها هتخسرهم فلوسهم 

وهى لا تملك شىء اهم واثمن من الثقة

لانها اهم رأس مال ليها