أنواع الاستثمار ...الجزء الاول

💡أنواع الاستثمار ...الجزء الاول💡

-----------------------------------

🔔سلسله من اجزاء

--------------------

السلسله دى بتتكلم ببساطه كده عن الاستثمار ، ومصطلحاته بشكل مبسط للشخص العادى اللى عاوز يفهمها ، او الشخص اللى عنده فكره بسيطه وعاوز يزود من غير تعقيدات متخصصه عشان يفهم جزء كبير من الاقتصاد ماشى ازاى وهو بيقرأ عنه فى الصحف او الاخبار

هى طويله شويه .....بس اعتقد هتستفيد منها لو انت فعلا عاوز تفهم الموضوع ده ، يبقى شوية صبر وتركيز

⭕سبق ان تحدثنا مرارا عن ضرورة ان يقوم المواطن بالاستثمار ، ولا ينتظر ان تقوم الحكومات ( اى حكومات ) بدوره ، لان ببساطه ، هذا دوره هو ، والعائد الاول سيعود عليه هو فى المقام الاول

🔔قبل كل شىء عليك ان تفهم قاعدة اساسيه وعامه

-------------------------------------------------

العائد يتناسب طرديا مع المخاطره

عاوز عائد عالى ، اذن المخاطره عاليه ، مفيش خاجه اسمها مشروع مضمون او استثمار مضمون وفى نفس الوقت يبقى له عائد جيد !!

حضرتك ده المستحيل بعينه !!

ليه ؟ 🤔

---------

لان لو موجود كان كل الناس عملته ، بس ده زى العنقاء والخل الوفى كده !!

عاوز عائد عالى ، اقبل مخاطره عاليه ، مش عاوز مخاطره عاليه ، اقبل عائد منخفض ، وعلم الاستثمار قائم على (محاولة تخفيض المخاطره ، وليس الغاءها ) !

💚يعنى مفيش شىء اسمه استثمار مضمون اصلا ، كلمة استثمار وكلمة مضمون ميجوش مع بعض فى جمله واحده ، هى اسمها قليل المخاطر ، والفرق كبير!

💚لو مش عاجبك الكلام لحد هنا متوجعش قلبك وتكمل قراءه وخليك كمل بحث عن الاستثمار المضمون لحد ما تلاقيه فى الجنه ونعيمها ان شاء الله !

🔔النقطه الثانيه هى التنويع

--------------------------

كافة خبراء الاستثمار فى العالم متفقين على حتميه التنويع باعتباره وسيله اساسيه لتقليل المخاطر (طريقة التنويع بقى دى علم اسمه علم نظرية محفظة الاستثمار) ، بالتالى اللى بيضع استثماره كله فى نوع واحد (سلة بيض يعنى) وينضرب او يخسر ميعيطش! ، لانه طبقا لقواعد الاستثمار الاساسيه بيعتبر مغفل ، والقانون لا يحمى المغفلين !!

🔹اتفقنا على النقطتين دول ، يبقى نكمل🔹

-------------------------------------

🔔الاستثمار ينقسم الى نوعين اساسين

-------------------------------------

استثمار مباشر ، واستثمار غير مباشر

🔹الاستثمار المباشر :

يعنى بالبلدى كده انك تعمل مشروع او تشارك فى مشروع قائم او تستحوذ ( تشترى ) مشروع قائم وموجود

لو اللى بيشترى او بينشىء اجنبى ، بيبقى اسمه استثمار اجنبى مباشر

🔸الاستثمار غير المباشر :

يعنى انشاء محفظة استثماريه ، وعادة ما يكون محتويات المحفظه عباره عن ادوات دين ، او اسهم فى ملكية شركات

وطبعا لو اللى بيشترى اجنبى بيبقى اسمه برضه استثمار اجنبى غير مباشر

💡الاستثمار غير المباشر💡

-----------------------------

🔹🔸اولا ادوات الدين :

هى تمثل ديون على من اصدرها ( يعنى لو الحكومه اصدرتها هتبقى اسمها ادوات دين حكوميه (خزانه ) وممكن الشركات تصدرها ايضا ) لصالح من يشتريها

بيكون لها قيمة اسميه ( يعنى مثلا السند قيمته الاسميه الف جنيه ) فانت بتدفع الف جنيه ، وتاخد السند يثبت فيه انك سلفت الجهة اللى اصدرت السند ، الف جنيه ، يستحق بعد مدة كذا ( اسمها تاريخ الاستحقاق ) ، و انت تستحق عائد كذا % فى السنه ، ويتم صرفه كل فتره ( 6 شهور مثلا ) وبيسموه الكوبون ، وفى تاريخ الاستحقاق بيبقى من حقك تسترد الالف جنيه بتاعتك( يعنى تشبه شهادة الاستثمار )

بيتم تحديد العائد عادة حسب مدة القرض و التصنيف الائتمانى لمن يصدر اداة الدين ( يعنى لو الحكومه فانت بتشوف التصنيف الائتمانى للحكومه لو شركة ما حبت انها تاخد تمويل فممكن تصدر اداة دين لمدة معينه و العائد هيتحدد على اساس تصنيفها الائتمانى ، كل ما يرتفع ، كل ما هينخفض العائد طبعا)

عادة يتناسب العائد عكسيا مع التصنيف الائتمانى ، لان المخاطره بتقل كلما ارتفع التصنيف الائتمانى

💚طب ايه المخاطره مع ادوات الدين ؟🤔🤔

---------------------------------------------

ان المقترض يعجز عن السداد ، وفلوسك تروح عليك .

هل ده بيحصل ؟ !!!

-------------------

اه طبعا بيحصل ، فيه دول عظمى عجزت عن السداد ( تذكر مقال ازمة الروبل مثلا اللى ممكن ترجعله من الصفحه عندى بسهوله) ، ودول صناعيه قويه ايضا عجزت عن السداد ، زى المكسيك و تايلند و كوريا الجنوبيه و الارجنتين ، وطبعا فيه شركات عملاقه افلست وعجزت عن السداد ، وغيره وغيره ، صحيح ده مهواش شائع جدا ، بس بيحصل وعشان كده المخاطره فى ادوات الدين عادة بتعتبر منخفضه او متوسطه ( الا لو الشركه او الدوله تصنيفها منخفض جدا ساعتها بتبقى مخاطره عاليه وعادة بيبقى العائد كبير ، زى ما شوفنا الارجنتين مثلا رفعت العائد ل 60% ، ده عائد عالى جدا طبعا ، برضه روسيا رفعت زمان العائد ل 150% ، بس عجزت عن السداد بعد كده ، والامثله سبق اوردنا كتير منها فى سلسلة الازمات الماليه والاقتصاديه)

طب ايه اللى بيحصل فى وضع زى ده ؟!🤔🤔

----------------------------------------------

ساعتها بتتعرض اصول من الجهه دى للبيع لصالح مالكى ادوات الدين ( اللى هو انت مثلا ) ، فالشركه اللى انت اشتريت ادوات دين ليها ، هتتباع اصولها فى المزاد العلنى ، عماراتها ، سياراتها ، اموالها فى البنوك بتتحجز عليها ، البضاعه فى مخازنها ، و لما تتباع ( اذا اتباعت يعنى ) هتتوزع على حاملى الدين اولا ، فلو كفتهم ، ساعتها بيتوزع الباقى على حاملى الاسهم ( وده يخلى ادوات الدين اقل مخاطره من الاسهم ) ، بس عمليا الموضوع ده ممكن ياخد سنين ، وانت فلوسك مركونه و محبوسه مبتستفدش منها وبالتالى بتخسر لانك مبتستثمرهاش وقيمة النقود بتقل مع الزمن وسبق شرحنا ده بالتفصيل فى مقال منفصل لو تفتكر!

⭕طب ايه انواع ادوات الدين المتاحه ؟!

---------------------------------------

الموضوع ده بيتكتب فيه مجلدات كامله ، و فيه ناس ده تخصصهم العلمى ، بالتالى الكلام هنا هيبقى فكره عامه عن الموضوع فقط

🔹قصيره الاجل : يعنى سنه او اقل ، دى مثل اذون الخزانه اللى انت بتسمع عنها كل شويه ، الحكومه طرحت عطاء اذون خزانه ، وعادة بتبقى لمدد زى 3 – 6-9-12 شهر ( بتتحسب باليوم عشان تاريخ الاستحقاق اللى شرحناه قبل كده )

🔸طويلة الاجل : يعنى اكتر من سنه ( عادة 3-5-7-10-15-20-30 سنه ) ، وبتتسمى سندات ، فى مصر عادة الحكومه لا تصدر اكثر من 10 سنوات لمنع تراكم الديون المستقبليه ، بينما فى امريكا تصدر سندات لمدد طويله مثل 30 سنه او اكثر

القاعدة ان كلما زادت المدة كلما زاد العائد ، لان مخاطر عدم اليقين بتزيد ( محدش عارف بكره هيحصل ايه ، فما بالك بعد 5 سنين مثلا ؟!!) فطبيعى انه يعوضك بعائد اعلى عن المده الاطول ، وفى نفس الوقت ، هو هيبقى موعد السداد بتاع القيمه الاسميه متاخر ويديله فرصه اطول فى السداد دون ان يعيش ضغوط بسبب ضيق فتره السداد

💚ولهذا تلجأ بعض الدول للاستدانه قصيره الاجل لانها اقل فى العائد المدفوع (زى تركيا مثلا) ، لكن طبعا مخاطرها على من يستدين ( الدوله اللى بتستلف يعنى او الشركه اللى استلفت ) بتكون اعلى ، تخيل انك تستلف قرض والمفروض تسده بعد سنه ، ولا قرض هتسدده بعد 5 سنوات ؟!! اكيد لو بعد 5 سنوات ، هيبقى عندك فرصه تدبر حالك و تجمع المبلغ و تكون شغلته واستفدت منه كمان ، بس هتدفع عائد اعلى نظير الراحه دى

🔔فيه برضه ادوات دين ذات عائد ثابت ، وفيه اخرى ذات عائد متغير

ذات العائد الثابت بتبقى مكتوب فيها كده ( العائد كذا ، مثلا 15% يستحق كل 6 اشهر ) والحقيقه انك بتاخد نصف العائد المكتوب كل 6 اشهر ، يعنى النسبه المكتوبه دى للسنه كلها مش كل 6 شهور زى ما الناس بتفهم خطأ

ذات العائد المتغير بقى بتبقى مربوطه بسعر الفايده اللى بيعلنه البنك المركزى ، يعنى مثلا لو المركزى رفع الفايده ، فانت العائد بتاعتك هترتفع معاها ، ولو خفضها هينخفض معاها برضه

من الامثله الشهيره لده ، شهادات الاستثمار برضه ، دى بتبقى اداة دين على البنك ، بعضها له سعر فايده ثابت ، وبعضها بيبقى متغير حسب سعر فايدة البنك المركزى ( مش حسب ارباح البنك زى ما ناس متصوره )

⭕فيه امثله اضافيه ( للتوضيح ، انما التصنيفات والعوائد دى غير صحيحه ، مجرد امثله)

🔹عندك شركه زى اوراسكوم للانشاءات ، دى شركه انشاءات عملاقه ، تصنيفها الائتمانى مرتفع ، مثلا فلنقل A ، هتصدر سند مدته 3 سنين و اخر مدته 5 سنين ، الاول العائد عليه مثلا هيبقى 15% ، و الثانى مثلا 16%

🔸شركة تانيه زى حسن علام ، برضه شركة انشاءات كبيره ، بس تصنيفها مش قوى زى اوراسكوم مثلا ، فلنقل Ba ، ساعتها هتصدر سند 3 سنوات عائده 16% مثلا ، و السند ال 5 سنوات 17%

🇾🇪️عندك مثلا الحكومه المصريه ، بتصدر سندات 5 سنوات مثلا بعائد 14% ، و 3 سنوات ب 13% ، لان الحكومه طبعا مضمونه اكتر من اى شركه!

هنا انت عاوز تستثمر جزء من فلوسك فى السندات ، هتعمل ايه ؟🤔

----------------------------------------------------------------

🇾🇪️بتعمل محفظة سندات ، بتوزع فيها المخاطر والعائد ، شويه سندات حكوميه ، وشويه من اوراسكوم وشويه حسن علام ) شويه دى للتسهيل انما هى ليها حسابات طبعا ) ، وبتوزع برضه المده ، شويه 3 سنوات وشويه 5 سنوات ، ( طبعا الامور ليها معادلات عشان تحسب المخاطر وتعرف اعلى عائد ممكن مع اقل مخاطره ممكنه ) وبكده مثلا هتعمل عائد بمتوسط 15.5% مثلا ، وعشان تخلى العائد بشكل شهرى ، هتوزع شراء السندات دى على 6 شهور ، بحيث تشترى شويه كل شهر ، وبالتالى معاد استحقاق العائد بعد كده هيبقى كل شهر بتاخد من المجموعه اللى عدى عليها 6 شهور ، وهكذا !

طيب ماذا لو انك محتاج مبلغ كبير مره واحده ؟ يعنى عاوز تشترى شقه ، وانت فلوسك فى سندات ؟او اذون خزانه ؟🤔

الحقيقه ان الادوات دى لو من جهه كويسه ( الحكومه او شركه كبيره مثلا ) هتلاقى مشترى بسهوله ، وممكن تبيعها ، بس خلى بالك سعر البيع مبيبقاش نفس سعر الشراء !

يعنى ايه ؟!!🤔

----------------

💚انت اشتريت السند بالف جنيه ، وبيديك عائد 10% مثلا سنويا ، ومدته 3 سنوات مثلا ، فانت بعد سنه هتبقى اخدت 100 جنيه عائد و لسه الف جنيه محفوظه هتاخدها وقت الاستحاق ، بس انت عاوز تبيعه ، كده اللى هيشتريه ، هيبقى خسران ال 100 جنيه اللى انت اخدتها فعلا واستفدت منها ، فهيشترى منك السند ابو الف جنيه بسعر اقل ( فلنقل مثلا 950 جنيه ) ، لو هتبيعه بعد سنتين ،مثلا ، فانت ممكن تبيعه ب 900 مثلا ، طبعا برضه لها معادلات بس ده مش وقته ، انا بس بقربلك الصوره ، اضافة الى عوامل اخرى

🔔ده بفرض ان سعر الفايده لسه ثابت متغيرش !!!

طب ماذا لو ان سعر الفايده اتغير ؟ يعنى المركزى غير اسعار الفايده ؟🤔🤔

ده هنقوله فى الجزء الثانى ان شاء الله