أنواع الاستثمار .....الجزء الثانى

💡أنواع الاستثمار .....الجزء الثانى

-----------------------------------

🔔سلسله من اجزاء!

--------------------

⭕سبق ان تحدثنا فى الجزء الاول عن انواع الاستثمار والقواعد الرئيسيه فيه و تحدثنا عن الاستثمار فى ادوات الدين واليوم نستكمل الحديث عن ادوات الدين

بامكانك مراجعة الجزء الاول ( لو مكنتش قرأته لسه انصحك بقرائته عشان يبقى الكلام مستمر معاك ومتحسش انه ناقص )

http://tiny.cc/d5dafz

شرحنا التغير فى سعر السند فى حالة ثبات سعر الفايده

لكن ماذا لو ان سعر الفايده اتغير ؟ يعنى المركزى غير اسعار الفايده ؟🤔

-------------------------------------------------------------------

💚لو سعر الفايده زاد ، ساعتها قيمة سندك بتقل بنسبه معينه ، لان اصبح فيه سندات فعلا بتدى فايده 11% مش 10% زى بتاعتك ، يبقى يشتريها ليه ؟

ساعتها بدل ما كان هيشترى سندك ب 950 ، لا هيشتريها ب 900 فقط ، ولاحظ انه هياخد عائد 10% برضه على الالف جنيه ( القيمه الاسميه للسند) يعنى هياخد 100 جنيه ، وهو دافع 900 مش الف ، يعنى 11% تقريبا ، كانه عوض ارتفاع الفايده وبقى يحصل على نفس سعر الفايده السائد من خلال دفع قيمه اسميه اقل من القيمه الاسميه الاصليه !

تمام ؟!!

--------

طب لو سعر الفايده انخفض ؟

يعنى المركزى مثلا خفض سعر الفايده كمان 1% ، وبقت 9%🤔

زى ما بيحصل دلوقت فى السندات ، والمركزى بيخفض الفائده فعلا

🔹لا كده سندك قيمته زادت ، لانه بيدى 10% فى وقت المعروض فيه 9% بس

يبقى مثلا هتبيعه ب 1100 بدلا من الف جنيه ، وتبقى انت كسبت فورى 100 جنيه من غير متستنى عائد ، كسبت من مجرد بيع السند اللى انت امتلكته لمجرد انخفاض اسعار الفايده

🔔الكلام ده بيوريك ان هناك نوع من المخاطر برضه ، اسمه مخاطر تقلب سعر الفايده ، لان ممكن قيمة سندك نفسها تقل ، وممكن تزيد

طيب ماذا لو انك قررت مثلا ، تروح تشترى سندات تركيه بعد ما تركيا رفعت سعر الفايده هناك?!!🤔🤔

🔹نفترض مثلا ان سعر الفايده اللى اتعرض عليك 25% ، انت هيبقى معاك دولار ، تحوله لليره ، و تشترى بيه سندات تركيه بفايده 25%

شىء جميل جدا ، والدنيا هتمشى تمام لو فضل معدل الفايده كده ، او انخفض زى ما شرحنا لان قيمة سندك هتزيد ، وتزود مكاسبك (وده حصل فعلا للى اشترى هناك واردوغان امر بعدها بتخفيض الفايده)

وانت متقبل مخاطره رفع الفايده اللى هتنقص قيمة سندك ، وماشى على كده

بس ماذا لو انخفضت قيمة الليره نفسها ؟!!🤔

-----------------------------------------

🔹يعنى انت مش تركى ، انت اجنبى ، انت معاك الف دولار ، ودول كانوا يعملوا مثلا 4000 ليره ، واشتريت بيهم سندات 25% ، بعد سنه يا معلم ، الدولار بقى ب 6 ليره ، يعنى زاد 50%

🔹انت سنداتك مدتها خلصت و خدت الليره بتاعتك 4000 الل دفعتهم ، وروحت عشان تبدلهم دولار وتروح ، انت كسبت كمان 25% ، يعنى الف ليره ، وكده معاك 5000 ليره ، رحت تبدلهم ، لقيتهم ب 833 دولار بس !!!!

يا نهار مش فايت !!!

، يعنى انا جاى من سنه معايا الف دولار ، وفاكر نفسى كسبت 250 دولار ( 25% ) ، اطلع من البلد دى ب 833 دولار بس ؟!!

🇾🇪️يعنى خسران 16.6% من قيمة راسمالك ، وخسران كمان الفرصه البديله ( لو استثمرت مثلا فى بلد تانيه زى مصر بتدينى 17% مثلا و سعر الدولار انخفض ، كان ب 19 جنيه وبقى 18 ثم 17 والان 16، يعنى كسبت 170 دولار ، و فوقيهم كمان 15% ، يعنى الالف رجعولى 1150 + 170 دولار = 1320دولار ؟!! يعنى مكسب 32% اجمالى !!

المستثمر اللى خسر فى تركيا بيبقى حسبها انه خسران 16.6 + 32= 48.6% تقريبا

ده سبب يفهمك ايه سر الاقبال المفاجىء من الاستثمار غير المباشر خلال السنه دى على ادوات الدين المصريه ، يعنى احنا مرفعناش سعر الفايده ، ده احنا خفضناها دلوقت ، ورغم كده الامور استمرت ، اهو ده السبب الكبير (من ضمن اسباب اخرى)

( المثال اللى فوق مجرد مثال للتوضيح)

⭕ودى نسبة خساره كبيره جدا فى عالم السندات وادوات الدين اللى المفروض انها (قليلة المخاطر) بس ده بسبب نوع من المخاطر اسمه ( تقلبات سعر الصرف) وده بيحصل ومعرض له اكتر اللى بيشتغل فى السندات الدوليه ( يعنى من دول وعملات مختلفه ) وعشان كده تفهم ليه ممكن يحصل بيع مكثف بين المستثمرين ويحصل انهيار للعمله ، لانه كله مرعوب يوصل للنسب دى فى الخساره ( او اكتر منها زى ما حصل فى شرق اسيا اللى وصلت ل 80% خسائر فى الروبيه الاندونيسيه مثلا ) او الروبل زى ما شرحنا فى بوستات سابقه !

🔔كده عندنا 3 مخاطر رئيسيه فى الاستثمار فى ادوات الدين

-----------------------------------------------------------

مخاطر عدم السداد

مخاطر تقلبات سعر الفايده

ومخاطر تقلبات سعر الصرف

⭕طيب بالنسبه لك انت كشخص عادى وعاوز يستثمر فى ادوات الدين

---------------------------------------------------------------------

🔹اشهر وسيله هى شهادات الاستثمار ، وان كان عادة العائد فيها اقل من السندات ، لان ببساطه ، البنك بيستلف منك الفلوس و بيشترى بيها هو سندات واذون خزانه بعائد اعلى و يكسب الفرق (الفرق ده انت خسرته لو كنت اشتريت سند بشكل مباشر) وبرضه مما سبق تفهم ، ليه لما تفك الشهادة بيتخصم منك فلوس ، ( زى اللى بيحصل فى السندات ) وساعتها انت بتطلع تشتم وتقول بنوك حراميه ، بس الحقيقه هو بيبيع السندات بتاعته اللى اشتراها بفلوسك ، وبيبيعها بسعر اقل من سعر شراءها كما سبق ان اوضحنا ، وبالتالى مستحيل يديك الفلوس كامله لانه مش هيدفع الفرق من جيبه ، انت اللى قررت تكسر الشهاده مش هو !!

🔸ممكن تشترى سندات ، لكن ده مش سهل و هيحتاج مبلغ كويس ، وبنك او على الاقل مؤسسه استثمارات ماليه ( زى هيرمس وبلتون و ثروه وغيرهم ) عشان يعملولك محفظه سندات طبقا للمواصفات اللى انت عاوزها ، او انت هتطلب شراء سندات معينه وهم هيشتروهالك و هياخدوا عمولتهم طبعا (متنساش تحسبها عشان تعرف استثمارك يستحق ولا لا ، لان لو العموله كبيره هتبقى زيها زى شهادات الاستثمار ومتستاهلش وجع القلب ده )!

اضف لما سبق ان فيه (ضريبه فرضت مؤخرا) على عائد ادوات الدين وبالتالى لازم تفهم وتحسب ده كمان

💡الاستثمار فى ادوات الدين بيخليك مداين الجهه اللى اصدرتها ، مش بيخليك مالك ليها ، انت ملكش نسبه من ارباحها ، ولا بتعانى من خسائرها ( الا لو افلست) ، انت ليك فلوسك وفوايدك وبس

🤔🤔طب على اى اساس البنك المركزى بيحدد سعر الفايده ؟!

------------------------------------------------------------

ده موضوع كبير وممكن يبقى بوست لوحده ، بس باختصار ، ده بيكون حسب عدة اشياء

🔹 اولها معدل التضخم

🔹ثانيا مدى رغبة الدوله فى جذب الاستثمارات (غير المباشره) لعملتها

🔹ثالثا الفوايد فى الدول المماثله ( النظراء ) وتصنيفك الائتمانى وتصنيفهم

💡لما البنك المركزى بيرفع سعر الفايده ، انت فهمت ان قيمة السندات القديمه بتنخفض ، ساعتها بقى ، ممكن الحكومه ترجع تشتري ديونها القديمه دى ، بس بسعر اقل ، يعنى هى طلعت ديون بمليون ، ممكن تسددها ساعتها 900 الف بس ، زى مشرحتلك ، طبعا هتبقى المشكله دلوقت فى الفوايد الجديده المرتفعه ، وامريكا بتعمل اللعبه دى كتير اوى ، وهنبقى نتكلم فيها بعدين !

🤔طب ايه اللى يخلى شركه ما تصدر سندات مثلا ؟!

--------------------------------------------------

عشان توفر تمويل ، والتمويل بالطريقه دى بيبقى ارخص من الاقتراض من البنك ، و برضه اقل تكلفه على المدى الطويل من التمويل من خلال المشاركه (يعنى تجيب شريك ) ، لان الشريك مثلا هياخد نسبه من ارباحك للابد ( حتى لو نسبه قليله فهى هتجمع وتتراكم ويبقى مبلغ اكبر بكتير من اللى هو دفعه عشان يشاركك ويمولك ) ، ومش بالضروره ان اللى يشترى يبقى مواطن ، ممكن يبقى شركه ، ممكن يبقى بنك ، ممكن يبقى صندوق استثمار!

⭕من الطرق السهله للاستثمار فى ادوات الدين انك تشترى فى صناديق استثمار فى ادوات الدين

ودول بيتقسموا الى قسمين

🔹صناديق ادوات دين قصيره الاجل ( بيسموها صناديق نقديه ) ودى بتستثمر فى اذون الخزانه ، و يسهل تسييلها ( اى تحويل حصتك الى نقود ) ، بس العائد اقل شويه

🔸وصناديق ادوات دين طويلة الاجل ( سندات وادوات دين ثابت ) ، ودى عائدها اعلى شويه ، بس على المدى الطويل

وعموما صناديق الاستثمار دى متفكرش فيها الا لو هتسيب المبلغ 5-20 سنه مثلا ، وهو هيزيد ويتضاعف لوحده وملكش دعوه بيه ، لان فيه مدير استثمار هو اللى بيقوم بالشغل كله نظير نسبه من الارباح

وبرضه موضوع صناديق الاستثمار ده كبير وممكن نعمل فيه كتاب كامل

🤔امتى تلجأ للاستثمار فى ادوات الدين ؟!!

----------------------------------------

🔹لما تبقى مش عاوز مخاطره عاليه ، تحملك للمخاطر منخفض جدا ، زى راجل كبير ، ست ارمله مثلا ، وعاوزين دخل ثابت بدون مخاطره او مجهود عشان يعيشوا بيهم ، وفترات الصرف منتظمه ومنضبطه

🔸او معاك مبلغ ومش هتستعمله دلوقت شويه ، ساعتها هتستعمل ادوات دين قصيرة الاجل بدل مالفلوس مركونه

🔹او للادخار طويل الاجل للاستفاده من الفايده المركبه على المدى الطويل من اجل هدف معين ، زى التقاعد ، التامين على الحياه ، زواج الاولاد ، تعليم الاولاد تعليم عالى جامعى مثلا

اخر نقطه بقى

ايه الفرق بين الصكوك والسندات ؟🤔

------------------------------------

🔹السندات دين على الشركه مثلا ، الصكوك هى حصة ملكيه فى الشركه ، وتضمن لك حصة من الارباح ، لكنها محدود بمده زمنيه ، يتم بعدها استراد القيمه الاسميه للصك ، ويصبح مالكه خارج الشركه ( لم يعد من ملاك الشركه بعد انتهاء فترة الاستحقاق ) وله الاولويه على حاملى الاسهم عند افلاس الشركه وبيع اصولها ، لكن ، تاتى اولويتهم بعد السندات ( لانها ديون على الشركه )

يعنى لو الشركه افلست ، واتباعت ، هتتسدد الديون الاول ( السندات ) ثم الصكوك ، ثم الاسهم

🔸وطبعا لو الشركه بتخسر هتبقى مشكله برضه لانك تعتبر شريك يعنى الخساره عليك زى ما المكسب ليك ، وبالتالى المخاطره هنا عاليه واكتر بكتير من السندات اللى ملهاش علاقه بمكسب او خساره ، كما ان الصكوك قابله للبيع ايضا مثل السندات ولها سوق مالى خاص بها ، يعنى مثلا انت ممكن تبقى بايع صكوك لمستثمر فرنسى ، بكره الصبح يبيعها هو لمستثمر امريكى ، بعد بكره يبيعها لاسرائيلى او صينى ، عادى يعنى ، بالتالى متعرفش تتحكم فى الملكيه ابدا

ولهذا تتفهم خطورة الصكوك لو اصدرتها الدوله (كما اراد الاخوان )، لانها تعطى مالكها حق ملكيه فى اصول الدوله التى تعطى عائد ( زى قناة السويس ، الموانىء ، المطارات ، الطرق الدوليه ، ابار بترول او حقول غاز، وغيرهم ) وبالتالى لو الدوله عجزت عن السداد ، فالمالك للصك من حقه ياخد الاصل ، وعادة هيبقى المالك ده اجنبى لانك اصلا اصدرت الصك ده عشان الدولارات والاستثمار الاجنبى غير المباشر ، وتخيل بعد شويه تلاقى قناة السويس فجأه بقت نسبة من ملكيتها تعود لاى جنسيه اجنبيه او شركات اجنبيه

🔔الصكوك بتلقى قبول واسع فى الخليج وماليزيا واندونيسيا لاسباب دينيه ، واغلب الصكوك دى بتبقى مقومه بالدولار بسبب ربط العمله ، وده بييجتذب بعض صناديق الاستثمار الغربيه الساعيه لتنويع الاستثمارات مع تجنب مشكلة فرق سعر الصرف ، لان العمله فعليا مقومه بالدولار ومربوطه بيه ، وبالتالى نجاحها او فشلها لا علاقة له بالدين نفسه ، وانما المسأله مكسب وخساره وبيزنس

---------------------------------

💚كده انتهى الكلام عن ادوات الدين

----------------------------------

نكمل الكلام ان شاء الله الحلقه القادمه عن النوع الثانى من انواع الاستثمار غير المباشر