💡أنواع الاستثمار ....الجزء الرابع 💡
------------------------------------
الاستثمار المباشر ......سلسله من اجزاء!
---------------------------------------
⭕سبق ان تحدثنا فى الجزء الاول عن انواع الاستثمار غير المباشرة والقواعد الرئيسيه فيه و تحدثنا عن الاستثمار فى ادوات الدين و البورصة
بامكانك مراجعة الجزء الاول (قواعد اساسيه + ادوات الدين)
الجزء الثانى ( استكمال موضوع ادوات الدين)
الجزء الثالث ( الاسهم والبورصه)
💡النوع الثانى من الاستثمار هو الاستثمار المباشر 💡
-----------------------------------------------
🔹يعنى انك تعمل مشروع ، او تشارك فى مشروع ( شراكه مع ناس تانيه ) ، او تستحوذ ( تشترى ) مشروع قائم بالفعل !
🔸بيندرج تحت البند ده برضه ما يعرف اعلاميا باسم ( ريادة الاعمال ) اللى انت بتسمعها طول الوقت فى التلفزيون ، الحكومه بتشجع ريادة الاعمال ، والوزير الفلانى عمل مؤتمر عشان ريادة الاعمال ، ومحافظ البنك المركزى عمل مبادرة عشان تمويل رواد الاعمال ! تمام ، اهو ده .
🔔النوع ده من الاستثمار بيؤدى الى انتاج مباشر يمكن قياسه ، وبيتطلب عمل واجتهاد مستمر ، وبتطلب رؤية وتطور فى الرؤية دى، ده عباره عن شغل حقيقى ، هتتعامل مع عالم حقيقى وليس منصه الكترونيه كما فى الاستثمار غير المباشر !
طيب انت هتختار ازاى المشروع اللى يناسبك ؟
💚مبدئيا لازم نتفق ان مش كل الناس هتبقى ناجحه كاصحاب مشاريع ، ربنا مخلقناش كلنا كده ، فيه ناس هتنجح ، وناس لا ، فيه ناس هتبقى اصحاب مشاريع وناس هتبقى موظفين فى المشاريع دى ، ولا يكلف الله نفسا الا وسعها ، بس برضه مش مطلوب كلنا نبقى بيل جيتس يعنى ، ولا مطلوب تعمل شركة زى المقاولين العرب ، او مصنع زى غزل المحله ، لو عملت ورشه صغيره فده مشروع ، لو عملت شركة مقاولات صغيره فده مشروع ، والصغير بيكبر مع الزمن ، وفيه اللى هيكبر وفيه اللى هيفضل محلك سر ، بس انت اعمل الى عليك !
🤔لو انت بتسأل ايه المشروع اللى بيكسب ومضمون ؟ فده معناه انك مش جاهز عشان تعمل مشروع اصلا ! لان سبق اجبنا على السؤال ده!
🔔اول خطوه انك تتعلم لو مكنتش عارف ازاى ممكن تدير مشروع ما ، تتعلم دى تنقسم لقسمين
🔹العلوم الاداريه ، دى ممكن تتعلمها فى دورات ، او شهادة ادارة من اى جامعه وده موضوع سهل وتكاليفه بسيطه نسبيا حسب انت عاوز تاخد انهى شهادة ، وبرضه ممكن تتعلمها من كورسات اون لاين ، وفى منها مجانى ومنها اللى بفلوس ، وممكن تقرأ قراه منظمه وحره عشان تساعد نفسك
🔸الجانب الفنى ، دى غالبا بتبقى اما اتعلمتها فى الكليه او المدرسه (المدارس الفنيه مثلا )، او تتعلمها برضه فى وظيفه او فى مكان متخصص ( زى صناعة الملابس مثلا او تصليح الموبايل او الطب او الهندسه او التدريس او الزراعه ...الخ)
-------------------------------------------------------------------
🤔طب فرضنا انك مش هتعرف تتعلم ، او مفيش وقت دلوقت ، وهتاجل الموضوع شويه ( موضوع التعليم ) بس طبعا مينفعش تلغيه ؟!
-------------------------------------------------------------
🔹يبقى تجيب واحد متعلم وبيعرف يدير بدالك ، وهتديله مرتب نظير ده ، وانت هتاخد وقتك بقى فى التعليم من جهه تعليميه + القراءه + ممارسه العمل فى مشروعك نفسه عشان تتعلم
ممكن يسرقك ؟!
اه ممكن طبعا ، وده جزء من مخاطرة انك لسه غشيم وبتتعلم !
🔸ممكن تشارك ناس قرايبك او صحابك ، وتعملوا شركه مع بعض برؤوس اموالكم عشان تبقى الشركه راس مالها محترم تقدر تستحمل الصدمات فى البدايه و متقعش بسرعه مع اول ازمه ، ولو من قرايبك و صحابك حد متخصص فى المجال هيبقى ضرورى ماسك الشركه نظير مقابل !
صعب ميبقاش فى قرايبك ومعارفك حد له مهنه تصلح كمشروع ناجح ، غالبا هتلاقى لو دورت كويس !
🔹عندنا فى مصر هنا مشكله كبيره هى العمل الجماعى ، احنا مبنحبش العمل الجماعى ، ولا بنحب الشراكه ، وبنحب ان النجاح ينسب لشخص واحد ، والمشاكل برضه تنسب لجهة واحده ، و اننا نلخص كل مشاكلنا فى مشكله واحده ، مبنحبش التفاصيل ولا العمق ، ولا بنحب الجديه لفترات طويله (حتى فى الكوره ، هتلاقينا بنكسب البطولات المجمعه ، بينما البطولات الطويله بنخسرها بسهوله!) ، تلاقينا بننجح فى الالعاب الفرديه اكتر بكتير من الالعاب الجماعيه !! لكن للاسف صعب تحقيق الفرديه دى فى الشركات ، لازم نسمع بعض اكتر ، نثق فى بعض اكتر ( فى الاطار القانونى ) ، ولازم نتعلم نتشارك النجاح والمسئوليه ، وان الصح يتعمل ايا كان اللى قاله ، مش لازم الفكره الصح تبقى فكرتك انت !!
🔔برضه مهواش مطلوب منك فكره عبقريه جديده عشان تعمل مشروع، الحقيقه ان الافكار الجديده احتمالات خسارتها اكبر من الافكار المتجربه فعلا ! ميزة الافكار الجديده انها لو نجحت ممكن تحقق نجاح مهول ، غير كده هى خطره ، وصعب جدا تلاقى تمويل لها ، و اللى بيمولها بيبقى بيخاطر معك بشده و بالتالى طلباته بتبقى كتير لتامين نفسه ، وغالبا الشاب صاحب الفكره مبيبقاش مستوعب ده ، وبيفضل ان الفكره متتنفذش اصلا ، عن انها تتنفذ فى مشروع هو هيبقى جزء منه بدلا ميبقى هو (كل المشروع ) .
-----------------------------------------------------
🤔امال ايه اللى هيخلينى انجح لما ابقى زى غيرى ؟
----------------------------------------------------
لا مش مطلوب منك يبقى مشروعك زي غيرك ، لازم تميزه بشىء ، مثلا ، انت هتفتح شركة ملابس اطفال بس هتنتج ملابس تنكريه ( فانت متميز بتخصص قليل شويه بس طبعا زباينك برضه قليلين ) ، او هتفتح مطعم بس بيعمل اكلات مميزه ، او فى مكان مميز ، او اسعاره رخيصه ، او حتى لبس العاملين مميز و ملفت للانتباه ، المهم يبقى عندك شىء يميزك ، ودى شغلتك بقى ! مهو مش الحكومه بس اللى مطلوب منها تفكر بره الصندوق يا فندم !
-----------------------------------------------------------
🔔الشركات لها انواع كتير حسب شكلها القانونى ( فيه انواع لم اذكرها لان الموضوع هنا للتبسيط وليس للحصر )
------------------------------------------------------------------
🇾🇪️فيه شركات فرديه ( يعنى فرد بيمتلكها ) وده نوع جديد ، زمان كان بيشترط ان المالك يبقى اثنين او اكتر دلوقت يكفى واحد يؤسس شركه
🇾🇪️شركات تضامن ( بيمتلكها عدد من الافراد بيحددهم القانون )
مشكلة النوعين دول ، ان اى ديون عليهم ، بيبقى مسئولية الملاك ، ويسددوا الديون حتى لو من فلوسهم الشخصيه ، يعنى لو عنده بيت ممكن يتباع عشان يسدد ديون شركته ! اه امال انت فاكر ايه ؟ مهى الديون دى برضه فلوس ناس ، ولو هى فلوسك انت شخصيا ، هتبقى موافق ان المديون يبيع بيته عشان يديلك فلوسك !
ميزتهم بقى سهولة الانشاء ، سهولة الاجراءات ، سرعتها ، التكلفه قليله ، ممكن تفتح فى بيتكم لو عاوز ، يعنى حاجه عالسريع للشركات الصغيره وذات الملكيه المحدوده بعدد قليل من الاشخاص اللى يعرفوا بعض كويس غالبا ( اسره مثلا يعنى شركة عائليه )
🇾🇪️عندك شركات مسئولية محدوده ، هنا بقى القانون بيقول ان مسئوليتك محدوده بنسبة ممتلكاتك فى الشركه نفسها ، يعنى لو الشركه فلست ، ففلوسك فى الشركه هى اللى هتروح بس ، انما فلوسك بره الشركه ملهاش علاقه (الا فى ظروف قانونيه خاصه ) ومحدش هيبيعك بيتك ولا عربيتك ، بس عيبها بقى المصاريف اكتر للانشاء و اشتراطات التراخيص اكتر واصعب شويه ( يعنى لو عاوز تسجل نفسك مثلا فى سجل المستوردين ، هيطلبوا منك راس مال اكبر مما هيطلب من صاحب الشركه الفرديه مثلا بكتير )
🇾🇪️وفيه شركات مساهمه ودى زى اللى بتتعرض فى البورصه (بس مش الزامى انها تتعرض او تطرح نفسها فى البورصه )، عباره عن اسهم وكل شريك بيمتلك شويه ، وممكن يبقى عددهم كبير جدا ، الاف او ملايين حتى مش مهم ، بس عيبها طبعا مصاريفها اكتر ، واشتراطها عشان حقوق الملاك كتير وعاوزه يبقى عندك زى محاسب قانونى او متعاقد مع واحد ، محامى قانون تجارى او تتعاقد مع واحد ، وغيره ، وكلها اشتراطات لحماية الملاك انفسهم فى المقام الاول ، و حماية الاخرين من اى تلاعب بسبب اتساع قاعدة الملكيه ، ناس ميعرفوش بعض ، بس القانون هو اللى هيحميهم ويحفظ حقوقهم !
طبعا يفضل انك تختار مجال قريب من خبراتك وتعليمك ، او على الاقل بتفهم فيه شويه ، فان لم تجد يبقى زى مقولنا ، تشوف شركاء ثقه بيفهموا ، او تجيب موظفين بيفهموا فى اللى انت مش فاهمه وتتابعهم، او انك تشترى حصه فى شركه قائمه فعلا محتاجه شركاء وتبقى شريك وتحاول تفهم وتتعلم تدريجى ، وفيه مواقع كتير بتنشر اعلانات طلب شركاء او ممولين ، لو دورت على النت هتلاقى
🔹مميزات الشغل فى النور ، الشغل الرسمى ، انك تقدر تصدر ، تقدر تستورد ( لو استوفيت الشروط ) ، تقدر تاخد قرض ، تقدر تعمل سندات وتمويل ، وده يساعدك انك تكبر مشروعك
🔸عيوب الشغل فى النور طبعا هيبقى ان عليك التزامات زى الضرايب و زى التامينات على العاملين ، بس هتبقى شغال نضيف وفلوسك حلال 100%
⭕عيوب الشغل بتاع تحت بير السلم بقى هو ان فلوسك ملهاش مصدر واضح قدام الحكومه ، لو رحت تحطها فى البنك هيقولك ايه مصدرها ؟! لو عاوز تفتح حتى حساب فى البنك برضه هيقولك هات ما يثبت انك بتشتغل ، عشان توضح فلوسك جايه منين ؟! وده بيحجم نشاطك كتير وبيحجم قدرتك على استثمار اموالك ، فغالبا بتضطر تشترى بيها اشياء ، زى عقار او ارض )وحتى الموضوع ده معرض لمصاعب مستقبليه مع انتشار الدفع الالكترونى ، ومتستغربش لما مستقبلا الشهر العقارى يرفض تسجيل اى عقار او اورض بدون اثبات دفع الكترونى ) ، انما لحد متحوش الثمن بتفضل شايل فلوسك (تحت البلاطه ) ، اضف لما سبق انك متقدرش تتعامل مع جهه حكوميه عشان توردلها ، لان لازم فواتير رسميه طبعا ، ولا شركه كبيره ، لانك مش عاوز بياناتك توصل للضرايب ، وبرضه فلوسك صعب اوى نوصفها بانها حلال 100%
🔔الاستثمار الاجنبى بيبقى مهم لانه بيدخل دولارات ، وبيرفع مستوى المعيشه و مستوى الدخل ، و تكنولوجيا جديده ، خبرات جديده ، حتى لو كان هايبر ماركت ، لان الهايبر ماركت ده بيطلب منتجات ، والمصانع المصريه هتلاقي مكان تعرض فيه منتجاتها ، يعنى بيساعدها فى التسويق وبالتالى هتنتج اكتر لان فيه طلب عالى على منتجاتها وممكن تتوسع وتشغل ناس اكتر ، فلما تسمع عن مول او ماركت بيتفتح كاستثمار ، لازم تفهم ان ده بيشغل الاف الاشخاص سواء بصوره مباشره او غير مباشره ، وبيجيب سياحه اكتر ، وبيخلى السايح اللى بيقعد اسبوع ، يغير كلامه ويقعد اسبوعين ، واللى جه مره عشان يشوف الهرم ، هيجى تانى عشان يتفسح ويشترى ويتبسط ويشوف حاجات تانيه اضافيه غير الهرم !!
💚نظريا شراء العقارات و الاراضى يعتبر استثمار (ده غير بناء العقارات اللى هو نشاط عقارى ومقاولات وتسويق ) ، لكنه معرض للركود زى اى استثمار ، لا يوجد منه انتاج حقيقى ، هو مكسب رأسمالى نتيجة مرور الزمن ونتيجة مشكلات سابقه فى الاسكان فى العهود الاشتراكيه ، يتسم بصعوبه التسييل (اى انك تحوله لكاش من خلال البيع ) ، كما انه يتسم بصعوبة التجزئه ( مينفعش تبيع نص شقه مثلا ) ، مفيش مشكله انك تمارسه ، بس لما يحصل ركود وفلوسك تبقى مركونه فى الارض او الشقق وتدفع عليهم ضرايب عقاريه ، و متبقاش عارف تبيع عشان المعروض كتير ، متعيطش ساعتها ، لان ده استثمار ، ومفيش استثمار من غير مخاطر ، انت عاوز مكسب سهل بدون مجهود ، واكيد برضه خسارته هتبقى وارده ، النقطه الثانيه متشتكيش بقى ان اسعار الاكل و الملابس والاجهزه غليت ، مهو مفيش انتاج ، لانك بدل ما تنتج ، اشتريت حتة ارض عشان تركنها ، لا بتاكل ولا بتشرب ، انما انت اللى مش هتلاقى تاكل وتشرب ، لان زيادة الاسعار هتاكل مكسبك ، لو عرفت تكسب يعنى بسبب ركود السوق !!!
نستكمل الكلام عن الاستثمار المباشر البوست القادم ان شاء الله
Comments
Post a Comment