الحقيقه ان الازمات الروسيه بدأت عقب انهيار الاتحاد السوفيتى فى 1991 م
ما حدث بعد ذلك التاريخ وشهدناه جميعا امام اعيننا كان امرا لا يمكن تصديقه !! لا احد كان يتصور ان يصل الحال فى القطب الثانى للعالم الى ما وصلت اليه ! ارقام مفزعه ، و ماسى مخيفه تعد من الاسوأ فى تجارب التحول من الاشتراكيه الى الرأسماليه !
الاسوأ من حيث حجم الالم الذى سببته لشعوبها !!
روسيا تعتمد فى صادراتها فى الاساس على البترول و الغاز الطبيعى (من اكبر المنتجين فى العالم) اضافة الى الماس ( المصدر الاول فى العالم ) والذهب ، وغيرهم ، غابات شاسعه ، انهار وفيره ، اراضى زراعيه واسعه ، وهى تكاد تكون من الدول القليله التى تستطيع الاكتفاء بنفسها عن العالم لفترات طويله ، حتى عدد سكانها يعتبر قليل مقارنة بهذه المساحه الشاسعه ، والثروات الوفيره
ورغم هذا ، فان الثمن كان لابد ان يدفع ، نتيجة سياسات اقتصاديه خاطئه ، استمرت اكثر من اللازم ، الاقتصاد لا يحابى احدا ، اى خطأ ستدفع ثمنه ، واى تاخير سيكون له ثمن مستقبلى
عقب انهيار الاتحاد السوفيتى الامور كانت سيئه دائما ، يعنى مثلا عام 1993م وصل التضخم نحو 874% ؟!!!
نت مستوعب الرقم ؟!!
انت كنت بتلطم لما التضخم وصل ل 33% امال 874% دى يبقى شكلها ايه ؟
حضرتك الناس كانت بتاكل الزباله ( لو وجدت الزباله ) لان الزباله تعنى ان فيه اكل فائض مثلا ، وده كان شىء غير متوفر فى الظروف دى ؟!
فى الفتره دى وصلت مصر افواج من الروسيات ، اشتغلوا فى كل المتاح لهم ، وكانت اول مره شعوب الشرق الاوسط تعرف الروسيات ، طبعا البلاد اللى سياحة الدعاره مزدهره عندهم ، اشتغلت جدا فى الفتره دى (زى تركيا و تايلند ) ، دول مكنوش بيشتغلوا كده هوايه يعنى ، انما كان البديل انها تموت من الجوع والبرد (حرفيا) زيها زى العجائز !!
المهم ، السنه اللى بعدها التضخم كان 307%
و 1995 كان 197% وطبعا دى نسب مرعبه
الامور بدأت تتلم شويه ، بس زى ما يقال ، المصائب لا تأتى فرادى
فى نفس السنوات المذكوره ، كانت امريكا قمت بالواجب
بدأت الحرب الشيشانيه الاولى ، وانت طبعا فاكر كل اللى اتقال ايامها ، ونداء الجهاد اللى انتشر فى العالم الاسلامى فى ثوان ، والفيديوهات المجهزه مسبقا ، ونقدر نقول ان نفس القفا اللى اخدته فى الحرب الافغانيه ، فى الثمانينات ، كان فيه قفا مماثل عموله تم تحضيره سريعا فى معامل السى ايى ايه عشان يناسب سعادتك بخصوص الشيشان واللى كلفت روسيا اللى اقتصادها مش مستحمل اصلا ، اكثر من 5-6 مليار دولار تكاليف عسكريه ( وقتها ده كان رقم مهول ) و ده غير تكاليف اعادة الاعمار سعادتك !!
تقوم الدنيا تهدى بقى ؟!
لا ازاى ؟!! ميصحش طبعا ، ترزق روسيا برضه فى نفس ذات الوقت برئيس ضعيف و متردد وملخبط شويتين تلاته، اسمه يلتسين ، الراجل عمل كل شىء غلط تقريبا ، قرر الخصخصه ، بس معملش رقابه عليها ، فتوزعت على القله اللى فى ايدها السلطه ، وبقت سلطه ومال ومقدرات الشعب ، الجيش تقريبا كان مستعد يبيع الصواريخ النوويه اللى عنده عشان ياكلوا ويشربوا ، امال يعنى هيموت من الجوع هو واسرهم ؟!! البنات زى مقولنا شافوا حالهم ، والشباب ، اشتغل مع المافيا ، العلماء هربوا للغرب ، العجائز تركوا لمصيرهم المحتوم ، والاخ يلتسين يروح لصندوق النقد الدولى يجيب خبراء امريكان (اعداءه التقليديين ) عشان يحطوله خطط الاصلاح ، اللى نتج عنها كل الكوارث السابقه!! ، صحيح هى كانت حتميه ، لكن مكنش ضرورى تتم بالمنظر المفاجىء والصادم ده ، وبالعنف ده ، كان ممكن تبقى تتدريجى وعليها رقابه افضل !!
ولما وصلنا 1997 كانت الامور بدأت فى التحسن ، والناس استبشرت خير ، لاول مره الناتج الاجمالى يرتفع ، لاول مره يبقى فيه نمو ( ايوه بقالهم 6 سنوات النمو عندهم بالسالب ، يعنى ، الانتاج بينقص مش بيزيد ) ، قوم ايه بقى ، تحصل الازمه الاسيويه اللى اتكلمنا عنها المره اللى فاتت
الدول الاسيويه دى عندها مصانع كتير قوى ، وشغاله بالبترول ، لما تحصل ازمه ،المصانع بتقفل ، ومتطلبش بترول ، هى هتشربه يعنى ؟ ما المكن واقف لان فيه افلاس وديون وشغلانه كبيره سعادتك
يقوم الطلب على البترول يقل بشده ، فينهار سعر البترول الى نحو 10 دولار فقط للبرميل !!
واضف الى هذا ان المصانع دى بتطلب مواد خام زى المعادن ، ولما تقفل ، مفيش طلب ، واسعار المواد الخام بتقع !!
وبما ان زى ما شرحنا ان روسيا الى اليوم معتمده فى اغلب صادرتها على النفط والمعادن ، فممكن نقول ، ان الضربه دى ، مع شوية الطعنات السابقه داخليا وخارجيا ، خلت الامور تنفجر!
روسيا لقت نفسها غير قادره على سداد الديون !!
كان يلتسين الله يكرمه ، سمح فى 1993م بتداول السندات الروسيه قصيره الاجل للاجانب ، والسندات كان مغريه جدا ، عارف ليه ؟
فكر كده ؟ ، تضخم قرب ال 1000 -900% تتصور معدل الفايده يعنى هيبقى شكله ايه ؟ عملوا معدل فايده يصل الى 150% !
سمعت عن الرقم ده قبل كده ؟
يعنى الارجنتين لما عملت 60% ، فيه ناس فكها سقط و خبط فى صدرها ، وتخيلوا ان ده رقم غير مسبوق فى تاريخ البنى ادمين على راى اللمبى ، تخيل بقى لما يشوف رقم زى 150% ، وفين ؟ فى دوله تمتلك قنابل نوويه كافيه لهدم الكره الارضيه عدة مرات !! دوله تمتلك بترول وغاز وغيره بكميات مهوله ، دوله كانت بتدير نصف الكره الارضيه من سنتين بس ، يبقى ليه ميستثمرش فيها بقى ؟!
الموضوع طبعا نجح ، وجذب دولارات كتير ، بس المشكله هتسدد منين الفوايد دى كلها ؟ والاقتصاد بينمو بالسالب يا كبير ، يعنى بينكمش !!
فالمصيبه طبلت مع كل ما سبق ، مع اول سقوط لسعر البترول ، كده معدش عندهم مصدر يسددوا منه اصلا ، وتخلفت روسيا عن السداد!!
الموضوع كان غريب شويه فى الزمن ده، لان السندات دى المفروض كانت بالروبل وسندات سياديه بتصدرها الحكومه الروسيه ، يعنى روسيا تقدر تطبع وتدي للناس فلوسهم ، بس المشكله انها بعد متطبع ويروحوا يحولوها للدولار ، ميلاقوش دولار كافى ، فسعر الدولار يعلى فى السوق السودا ، والناس تخاف اكتر ، لان كده فلوسها بالروبل قيمتها هتقل ، فتجرى تبيع السندات ، وتشترى الدولار ( وهكذا الدوره اللى كلنا عارفينها ) ، الى ان جاء القرار اللى انت اكيد متوقعه
قرار فك الارتباط نهائيا بين الدولار والروبل ، قرار التعويم ، واللى كانت اغلب دول اسيا عملته بعد ازمتها فى 1997م زى ما شرحنا البوست الماضى
قبل انهيار الاتحاد السوفيتى ، كان الروبل يساوى واحد دولار تقريبا ، بعد هذه الازمه وصل اكثر من 25 الى 30 روبل لكل دولار
عنى لو عاوز تقارنها باللى حصل فى مصر عشان تتخيل، فممكن نقول ان مصر وقت الثوره كان الدولار فيها بيساوى 5.5 جنيه ، اضرب الرقم ده مثلا فى 30 هنلاقى انه كان الدولار عدى ال 150 جنيه ؟!!
️وعاوزك تفكر كده ، الاسعار ارتفعت كام ضعف ، سعر تذكرة المترو مثلا ، لما تبقى 30 جنيه فى التسعينات !! وقتها مرتبك اصلا كان تقريبا اقل من 200 جنيه ، يعنى يدوب مرتبك يوديك الشغل ويرجعك 3 ايام فقط !!
التضخم فى ذلك العام حسب مؤشر CPI من صندوق النقد الدولى تجاوز 120% !
🔸مؤشر البورصه الروسيه انخفض من نحو 600 الى اقل من 50 ؟!!! يعنى تقريبا الاسهم قاربت على الصفر ، لانها لم تجد مشترى ، وطبعا استفادت مؤسسات الاستثمار الغربيه من هذا عندما اندفعت للشراء بتلك الاسعار البخسه !
معدل النمو السنوى وصل الى – 8% يعنى انكماش عنيف !
كان فيه وقتها الاعيب سياسيه خايبه ، وتغييرات فى الحكومات ، وحاجات لا تليق بدوله داخله على كارثه مماثله ، لكن زى مقولتلك ، يلتسين كان شخصيه لا تليق بدوله كروسيا ! وملوش لازمه نتكلم كتير فيها ، لكن يكفى اقولك انها كانت شبه الخيابه اللى كنا فيها واحنا فرحانين بلعبة الديمقراطيه بين 2011-2013 وعملين زى العيل اللى مسك لعبه غاليه و جديده وبيسىء استعمالها لحد ما بوظها و اذى نفسه !
انهار الانتاج الزراعى ، ووصل الامر بروسيا انها طلبت معونات انسانيه دوليه من الاغذيه وغيرها لانقاذ الشعب الروسى من الموت جوعا !!
قدم صندوق النقد الدولى قروض لانقاذ روسيا ، لكن على كل حال ، الايام السوداء ولت ، وبدأت تدريجيا الازمه تخف وطأتها و بدأ الانتاج يعود مره اخرى فى السنوات التاليه بعد ان وضع الروبل فى قيمته الجديده ، وتلاشت صدمات التغيير الاقتصادى
يقول الغربيون ، ان الازمه افادت الروس بضروره تنويع الاستثمارات ، لان اغلب استثماراتهم كانت موجهه فى قطاعات ضيقه للغايه ، ويتناسى الغربيون ايضا ، ان بعض مؤسسات الاستثمار المالى الكبرى فى وول ستريت افلست مع الازمه ، لانها لم تكن تنوع استثماراتها ، وكانت تتوجه بقوه للاستثمار فى السندات الروسيه التى سبق ان تحدثنا عنها ، وكاد الامر يتحول لكارثه ماليه غربيه ، لولا ان اندفع الجميع لانقاذ النموذج الرأسمالى المقدس من ان تصيبه عدوى انفلونزا الدب الروسى !
-----------------------
قراءات مختارة
----------------------
Comments
Post a Comment