تعتبر ازمة التيكيلا من اوائل ازمات عصر العولمه الاقتصاديه
عصر ما بعد انهيار الشيوعيه والاشتراكيه كمنافس للرأسماليه
عصر ظهور الاسواق الناشئه ، والاسواق المفتوحه و سهولة حركة رؤوس الاموال و الاستثمارات غير المباشره فى ادوات الدين الثابت والاسهم
و اكتسبت اسمها من المشروب المكسيكى الشهير التكيلا
"
أهمية هذه الازمه انها تشابه فى بعض نقاطها ما حدث فى مصر ، وما يحدث فى تركيا الان ، كما انها كانت عاصفه بشكل جديد فى ذلك الوقت و المؤشرات المبكره لم تكن واضحه ، بل ان الاشادات الدوليه الاقتصاديه بالمكسيك كانت مستمره حتى قبل اشتعال الازمه باسابيع !!!
بدأت المكسيك عام 1988 تجربة اقتصاديه خاصه ، مدعومه من جارتها ، العملاق الامريكى
سوق كبير ، ايدى عامله رخيصه ، نقل سهل ورخيص ، فماذا تريد امريكا ومستثمريها اكثر من هذا !!
كما ان امريكا كانت تريد نموذجا لباقى الدول فى العالم ، لتنبهر به و تسعى فى الطريق الجديد للعولمه الاقتصاديه بعد ان كانت الشيوعيه تلفظ انفاسها الاخيره !
بدأ الامر مع الرئيس المكسيكى المنتخب لشاب ( كان عمره 40 عاما فقط ) كارلوس ساليناس ( تقريبا البلد كلها اسمها كارلوس ) الذى انتهج سياسه اقتصاديه اكثر انفتاحا مع رؤوس الاموال والاستثمارات الغير مباشره القادمه من الشمال الغنى ، سندات البيزوس المكسيكى ذات عائد مرتفع مقارنة بتلك الامريكيه، وهو يضمن للمستثمرين استردادها بالدولار الامريكى ، وفوق كل هذا كان سعر الدولار بالنسبه للبيزوس ثابتا ( ربط البيزو بالدولار ) فكانت المخاطر بالنسبه لاى مستثمر تكاد تكون معدومه و فرص ربح متميزه جدا ، ادى هذا الى تدفق مليارات الدولارات للبلاد وساهمت فى تحسين الاحوال العامه والاقتصاد وانخفاض البطاله بشكل ملموس ، وارتفعت الاجور ، بل وحققت نمو اقتصادى وصل الى 7.7% سنويا ( مصر الان نحو 5.6%
الامور تتحسن بشكل رائع ، البيزو سعره ثابت بسبب الدعم المستمر لسعره من قبل البنك المركزى ( بيفكرك بوضعنا طبعا )، والاجور زادت والقدره الشرائيه تحسنت كثيرا ، فما هى النتيجه ؟!!
الاستيراد زاد بعنف ، لان السلع المستورده رخيصه نسبيا ، و العجز فى الميزان التجارى بيزيد ، والعجز فى الحساب الجارى بميزان المدفوعات بيزيد ، لكن كل ده كان بيتم تغطيته بمزيد من الاقتراض قصير الاجل و الاستثمارات الغير مباشره فى ادوات الدين وبالتالى كان فيه دايما دولارات تغطى المشكله ( زى اللى كان بيحصل عندنا فى فتره من الفترات قبل التعويم )
تدريجيا ومع وجود بعض المشكلات السياسيه ( عمليات ارهابيه + اغتيالات سياسيه ) بدأ تدفق الاستثمارات السابقه يقل
كنا وصلنا الى عام 1994 م و وفى ذلك العام وصل الاقتصاد المكسيكى لذروته انتعاشه ، حتى انها انضمت لاتفاق التجاره الحره لامريكا الشماليه مع الولايات المتحده و كندا ، و انضمت ايضا فى نفس العام لمنظمة التعاون الاقتصادى والتنميه OECD ولا ينضم لتلك الاخيره عادة الا الدول التى تطبق معايير مرتفعه فى الديمقراطيه و السوق الحر واغلبها دول اوروبيه طبعا ! وفى نفس الوقت كان هو عام الانتخابات الرئاسيه ( كل 6 سنوات ) وما يصحب هذا من مشكلات واضطرابات سياسيه !
لكن لكى يحافظ البنك المركزى المكسيكيى على سعر ثابت للدولار امام البيزو ، كان يضطر ان يبيع الدولار من الاحتياطى النقدى ويشترى البيزو لرفع سعره ويتمكن المواطن المكسيكى من شراء سلع امريكيه غاليه الثمن ، بسعر رخيص نسبيا عن طريق هذا الدعم الغشيم وليستفيد الاقتصاد الامريكى من دعم المكسيك لعملتها !!
طبعا انخفض الاحتياطى بسرعه ، وهبط من 25 مليار دولار الى نحو 7 مليار دولار فقط !!!
كل هذا والمكسيكيين عايشين فى مية البطيخ وبيشتروا المنتجات المستورده بدل ما ينتجوها ، لانها رخيصه وشايفين ان ده حقهم
المهم المستثمرين طبعا بيتابعوا اخبار الاحتياطى ، وعارفين انخفاضه ، فبقوا بيبيعوا سنداتهم وياخدوا دولاراتهم و يطيروا
لحد يوم 20 ديسمبر 1994 م والعالم كله بيشيد بالتجربه المكسيكيه ، وحلاوتها ، و الشعب المكسيكى بيستهلك المنتج المستورد بدعم عملته ، الحكومه المكسيكيه قالت معلش يا جماعه مش هنقدر نكمل والبيزو مدعوم بالمنظر ده ؟!!
امال ايه ؟
لا هنخفضه النهارده 15% بس تعويم جزئى
طبعا المستثمر اللى كان داخل على اساس ثبات سعر الصرف ، لقى وضع جديد ، لقى نفسه خسر 15% من دولاراته فى يوم ؟
انت متخيل ايه وضعه ؟
طبعا قال وانا مالى ؟ اش عرفنى انهم مش هيكملوا تخفيض فى سعره ؟
قام ساحب فلوسه وبايع وقال خساره قريبه معروفه احسن من المستقبل الغامض ؟!
طبعا تدهور الامر ، والبنك المركزى مطلوب منه لسه يدعم البيزو على السعر الجديد رغم تخفيضه ؟!
الخلاصه ، الدايره المفرغه اشتغلت ، مستثمر يهرب ، الدولار يعلى ، البيزو ينقص ، البنك المركزى مش قادر يدعم ، فالسعر يقل اكتر و المستثمر يخاف اكثر فيهرب ، وهكذا ، والبيزو فقد نص قيمته والتعويم تقريبا بقى كامل اجباري
فجأه المكسيك لقت نفسها على وشك اشهار الافلاس بعد ما كانت من كام اسبوع بينضرب بيها المثل
اتصل الرئيس المكسيكى بكلينتون وقاله الحقنى لاننا هنفلس !! الكلام ده حصل فعليا
كليتون ساب اللى فى ايده وطلب وزير الخزانه و مسئولى البنك المركزى والاحتياطى الفيدرالى الامريكى و مسئولين بصندوق النقد الدولى كمان عشان يلحقوا انهيار المكسيك المالى والاقتصادى المرتقب طبعا ومكنش لسه حصل
المشكله ان مكنش فيه وقت ، ولو استنوا للاجراءات القانونيه وعرضها على الكونجرس ، فالمكسيك هتكون راحت خلاص !! ناهيك ان غالبا الكونجرس ممكن يرفض اقراض المكسيك لان وضعها المالى سىء جدا
طب ايه اللى قلق امريكا اوى كده يعنى ؟!! ايه سر الحنيه دى ؟
هقولك
اولا ان انهيار اقتصادى للمكسيك يعنى السوق هناك هيقف ، لا بيع ولا شراء ،وبالتالى مش هيقدروا يستوردوا البضاعه الامريكيه ( كانوا وقتها المستورد رقم 3 للبضاعه الامريكيه فى العالم ) وده معناه ان الشركات الامريكيه مش هتعرف تبيع ، يعنى هينخفض انتاجيتها ، و النمو الاقتصادى الامريكى هيتأثر ، و البطاله هتزيد ..الخ يعنى امريكا بجلاله قدرها هتتاثر بشكل مباشر!!
ثانيا انهيار اقتصادى معناه برضه عدم استقرار سياسى وعنف ، وربما يؤدى لصعود قوى مناوئه ومشاكل ولبش ، امريكا فى غنى عنه فى دوله مجاوره
ثالثا انهيار اقتصادى معناه مزيد من الهجره غير الشرعيه بكل قرفها ومشاكلها
ضيف على اللى فوق ان الشركات والبنوك الامريكيه اللى بتستثمر فى المكسيك هتتاثر طبعا ، وامريكا نفسها مش هتعرف تاخد ديونها اللى مسلفاها للمكسيك !
يعنى موت وخراب ديار برضه ، رغم ان امريكا دوله عظمى ، لكن فى الاقتصاد ، السيئه بتعم
المهم توصل كلينتون لاتفاق ، انهم يسلفوا المكسيك اقصى مبلغ ممكن ومتاح دون موافقة الكونجرس حسب القانون ، وبدون مشاورات اعضاء صندوق النقد الدولى اللى ممكن تاخد شهور ، ووصلوا لاقراض المكسيك قرض فورى وعاجل ب 50 مليار دولار ، البيت الابيض تقريبا دفع نصهم ؟
انت متخيل الرقم ؟
خمسين مليار دولار تقريبا ؟!!! سنه 1994 م !! ولمجرد انقاذ البلد من الافلاس ، مش لعمل تنميه بقى وغيره ؟
فانت لما تسمع ان مصر خدت 12 مليار دولار من صندوق النقد الدولى ، وفى 2016 مثلا ، تعرف ان ده مبلغ ( تافه ) و ميعملش حاجه ؟
المهم تم انقاذ المكسيك من اشهار الافلاس لكن تبعات الازمه ضربت الاسواق الناشئه كلها بعد كدها
وكان ثمن الانقاذ برضه هو انكماش اقتصادى عنيف فى المكسيك ، وبعد نمو 7.7% ، تراجع الناتج الاجمالى ب 6.5% تقريبا ، يعنى بالسالب ؟!!
انخفضت الدخول بمتوسط 35% ( ودى تجربه بفضل الله ، مصر ممرتش بيها الى الان ، ان مرتبك ينقص بين الربع الى النصف فجأه وفى نفس الوقت الاسعار تتضاعف وقيمة عملتك تنزل النص !! انت متخيل الكوكتيل اللى انت مريت بجزء منه فقط ورد فعلك لسه لم يبرد منه لما يتضاف عليه ان مرتبك ينقص بالنسبه دى يعنى لو بتقبض الف ، يقبضوك 650 بس ؟
التضخم وصل 52% !! فى مصر وصل 34% تقريبا والناس كانت متخيله ان ده شىء اسطورى
البطاله زادت للضعف ، واكتر من مليون شخص فقدوا وظائفهم
حتى معدلات الوفيات فى المواليد زادت كتير بسبب سوء الاحوال الماديه !!يعنى الناس عيالهم ماتت عشان مش لاقيين يأكلوهم ولا يعالجوهم ، والمكسيك كحكومه متقدرش تعمل شىء ، لان مفيش فلوس !!
الفقر المدقع نسبته قبل الازمه كانت 20% تقريبا ، ووصلت لما يقرب من 40% بعد الازمه ، يعنى كل 10 مكسيكيين بينهم 4 فى فقر مدقع ! مش فقر عادى !
والامر لم يقتصر على المكسيك
الازمه ضربت امريكا الجنوبيه ، وخصوصا الارجنتين
و مهدت لازمة شرق اسيا
وحتى روسيا عانت من ازمه فى الفتره التاليه
ده عشان بس اوهام ان مصر ملهاش علاقه بالاسواق الناشئه ومش هتتاثر بيها !! واللى سبق برضه نوهت عنها اكثر من مره
من الدروس المستفاده هنا فى الازمه دى
اولا الازمات دى وارده جدا فى اى وقت ، رغم كل شىء والاحتياطات، هى جزء من الاقتصاد الحديث ، والحل انك تستغل وقت النمو وتعمل ما يكفيك وقت الشده والكساد ( حاليا مصر تعتبر فى وقت النمو على عكس ما يتصور الناس ان هذا هو وقت الشده !! لا الشده موضوع تانى حضرتك احنا فى وقت مؤلم بعض الشىء فقط)
ثانيا ربط العمله بالدولار وفى نفس الوقت فتح حرية تحرك رؤوس الاموال فى اقتصاد ناشىء امر فى منتهى الخطوره فى دول لا تملك احتياط نقد اجنبى ضخم
ثالثا الاقتصاد العالمى كله يتأثر ببعضه ، ولا سبيل لتفادى هذا ، وانما يتم التعامل وقتها لتقليل التاثيرات ، ولابد من تقبل هذا كجزء من طبيعة الحياه على الارض
-----------------------
قراءات مختارة
------------------
أزمات اقتصادية ومالية
ازمة التيوليب
ازمة المسيسيبى ... صناعة الفنكوش
الكساد الكبير ... اعنف ازمة اقتصادية فى التاريخ الحديث ( ملف كامل مدعم بالصور) يوصى به
-----------------------
قراءات مختارة
------------------
أزمات اقتصادية ومالية
ازمة التيوليب
ازمة المسيسيبى ... صناعة الفنكوش
الكساد الكبير ... اعنف ازمة اقتصادية فى التاريخ الحديث ( ملف كامل مدعم بالصور) يوصى به