لماذا يصعب على مصر تحويل عدد السكان الى" ثروة " بشرية ؟

لماذا يصعب على مصر تحويل عدد السكان الى" ثروة " بشرية ؟

ولماذا يؤثر الامر سلبا على اقتصادها ؟

بسبب معدل النمو السكانى المرتفع  فان نسبة كبيره من عدد السكان هذا عباره عن  اطفال
يعتبر الانسان منذ لحظة مولده الى سن 18 عاما طفل ولا ينبغى ان يقتصر فكرة الطفل على ذلك المخلوق صغير الحجم  لان امتداد الطفوله يصل الى سن 18 سنه كما قلنا

هؤلاء الاطفال بحاجه دائمه للإعاله ، لانهم ببساطه ميقدروش يشتغلوا 

بالتالى هم نسبه غير منتجه ، النسبه دى بتصل تقريبا الى 40% من تعداد سكان مصر ، واذا اضفت اليها كبار السن والشباب اللى فى التعليم بس تجاوزوا سن الطفوله ، هتلاقى نفسك معدى 50% مريح ، يعنى اكتر من نصف الشعب المصرى انتاجه صفر حسابيا 

لاحظ ان مصر دوله (( ناميه )) يعنى فى طور النمو الاقتصادى السريع ، ومحتاجه للانتاج ((المتزايد)) باى ثمن ، لتتحول الى دوله (( متقدمه )) ، والدول الناميه هنا اشبه بالاطفال ، تحتاج الى ((تغذية)) اكثر وافضل ، من الكبار اللى هم هنا الدول المتقدمه والمستقره اقتصاديا والتى لا تحتاج الى (( التزايد )) بنفس المقدار فى الانتاج ، لانه اصلا ( ضخم ) ويكفيها ، ويفيض ، وبالتالى حاجتنا لكل يد فى الانتاج امر حاسم فى تقدمنا ، بينما كل (فم مستهلك ) بيعطلك اكتر لان انتاج الايدى ، يدوب يسد الافواه ، ولا يكفى انه يعمل تقدم !

الطفل مش محتاج اكل وبس ، لا ده عاوز تعليم مجانى ، وتامين صحى مجانى ومستشفيات مجانيه ، يعنى انت بتصرف على اكتر من نصف تعداد سكانك مجانا وهم لا ينتجون اى شىء ، صحيح مرتقب انهم ينتجوا مستقبلا ، لكن هتصرف عليهم ازاى النهارده ؟ منين يعنى ؟ اكيد هتستلف ، واكيد هتضحى بحاجات تانيه عشان تعرف تصرف عليهم ؟ ومن ضمنها مثلا البحث العلمى ، مش معقول هسيب العيال مش لاقيه تاكل و لا تروح مدرسه وتفضل اميه ، ولا تتعالج ولا تلاقى تطعيمات ، عشان اعمل بحث علمى ، او حتى عشان اعمل  مناطق صناعيه او بنية تحتيه جيده او انترنت ممتاز ...طبيعى ان اولويات اطفالك هتسبق كل ده

الحقيقه فيه معيار لقياس نسبة الإعالة دى ، وكل ما النسبه بترتفع ، كل ما عنى هذا ان نسبة الاشخاص المطلوب اعالتهم لانهم لا يعملون ، اكبر ، وبالتالى فهذا شىء سىء ، لانهم فئه مستهلكه وغير منتجه ، غير قادره على اضافة شىء للناتج القومى !

يعنى بالبلدى كل ما الرقم يزيد فده شىء سىء للانتاج والدخل ، وكلما نقص كان افضل للانتاج والدخل طبعا !

طيب تعال نشوف كده نسب الاعاله فى مصر و غيرها من الدول فى العالم

نسبة الاعالة الكليه فى مصر تصل الى 61.8

نسبة الاعالة الكليه فى الصين تصل الى 37.7 فقط عشان الناس اللى بتحب الصين وتقعد تقولك شوفوا الصين 

نسبة الاعالة الكليه فى كوريا الجنوبيه 36.7 فقط 

نسبة الاعالة الكليه فى ماليزيا تصل الى 44.6 فقط  التجربه الماليزيه ومحبيها لازم يعرفوا التفاصيل شويه 

نسبة الاعالة الكليه فى تركيا تصل الى 50  طبعا تركيا لها جمهورها المعروف ، وعلينا ان نتذكر انهم فى ازمه اقتصاديه 

نسبة الاعالة الكليه فى البرازيل تصل ل 43 فقط 

نسبة الاعالة الكليه فى روسيا تصل الى 43.5 ايضا 

نسبة الاعالة الكليه فى تايلند حوالى 40

نسبة الاعالة الكليه فى الهند تصل الى 52 وتعانى من انخفاض شديد فى متوسط دخل الفرد وانتاجيته ، وهى اقل من مصر بكثير فى الاثنين 

نسبة الاعالة الكليه فى جنوب افريقيا 52.5

لاحظ انى حرصت على وضع دولتين فيهما اغلبيه مسلمه ، يحب الكثيرون التفاخر بهما وبالتقدم المحقق فيهما ، واهمية الامر ان الزيادة السكانيه للاسف عامل له بعد دينى ايضا يتعلق بالاسلام بعض الشىء

وستجد الصين والهند والبرازيل وروسيا وجنوب افريقيا وهى دول البريكس  وكلهم يتكلم الناس عنهم باعتبارهم معجزات اقتصاديه 

ترى بوضوح ان نسبة الاعاله فى مصر اكبر بشكل واضح من باقى الدول (اللى بتحب تتكلم عنها باعتبارها امثله اقتصاديه) وهو امر لا يمكن اغفاله او تصور ان لا تاثير سلبى له

طيب تعالى للدول الافريقيه والاسيويه الضايعه وكلهم اصحاب انتاج و دخل منخفض

نسبة الاعالة الكليه فى نيجيريا 88

نسبة الاعالة الكليه فى اثيوبيا 82

نسبة الاعالة الكليه فى لاوس 60 ( لاوس دى زينا برضه فى انتاجية الفرد و متوسط الدخل )

نسبة الاعالة الكليه فى السنغال 85

نسبة الاعالة الكليه فى رواند 77 ( عشان الناس اللى بتقولك شايف رواندا !! )

نسبة الاعالة الكليه فى كينيا 78

انت شايف ان دى صدفه ؟

لا طبعا ، واضح ان الامر احصائيا وعلميا سليم

لاحظ ان الارتباط كامل بين ارتفاع معدلات الاعاله و بين تخلف الدول اقتصاديا وعلميا، على عكس كل ما يردد عن " الثروة البشرية " من خلال مفكرى اليسار ومنظرى الاسلام السياسى 

افهم ايضا ان نسب الاطفال المرتفعه اسوأ تاثيرا من نسب كبار السن المرتفعه ، لان العجائز يعيشون من مدخراتهم التى عملوا لها طيله حياتهم ، بينما لا توجد لدى الاطفال مدخرات او معاشات بل يعتمدون كليا على ذويهم !

️باختصار نسب الاعاله فى مصر(( احد المعايير)) اللى سهل اى شخص طبيعى يفهم انها مؤثره جدا ، لانها تعنى ان نسبة من 

يحتاجون للاعاله بالنسبه لمن يعولونهم مرتفعه ، تاكل اى انتاجيه ، فما بالك بالمواطن ذو الانتاجيه الهزيله اصلا !!

طبعا مفيش داعى نجيب سيرة الدول المتقدمه غربا وشرقا والخريطه واضحه اوى فى الوانها 

الخريطة الى نشرتها فوق هتوضحلك بشكل بصرى بسيط ان مصر تعتبر متوسطه فى العالم، الدول الفقيره اكثر منها فى نسبة الاعاله ، والدوله الافضل منها شويه فى الانتاج ومستوى المعيشه هتبقى افضل منها فى نسب الاعاله ، الفكره هنا انك تفهم بشكل علمى ليه محناش عارفين نعمل اللى انت متخيله ، وليه كل الدول الافريقيه دى برضه مهياش عارفه تعمله ، لان نسب الاعاله مرتفعه جدا وتلتهم النمو الاقتصادى !