هل هناك هجرة جماعية للمليونيرات فى مصر؟ وما تأثير هذا على الاقتصاد؟

نشرت احدى الشركات تقريرا عن تحركات الثروات فى العالم 

واشارت فى جزء منه الى هجرة المليونيرات ( الذين يملكون اكثر من مليون دولار كثروه ) تقريبا واكثر الدول التى يهاجر منها مليونيرات 

تلقفت تلك التقارير بعض الصفحات المشبوهه والمموله من جهات ، لا نحتاج لكثير من الذكاء لنعرفها ، لان توجهات الصفحه معروفه مسبقا 

من ضمنها صفحة الموقف المصرى 

المهم انها نزلت بعنوان مثير للاهتمام وهو يقول 

* هجرة المليونيرات من مصر.. تخوفات كتير ووقفات مهمة **

وعذرا لانى مش هحط رابط المقال ، لانى محبش اعمل دعايه للصفحات اللى من النوعية دى 

انا فقط بوضح الرد للى عاوز يعرفه ،وفعلا قرأ الكلام بتاعهم او نقله عنهم ناس شبههم 

وقالت الصفحة المموله نصا 

 مصر هي أكبر اقتصاد في افريقيا كحجم ناتج محلي، وثاني أغنى دولة في أفريقيا بعد جنوب أفريقيا من حيث حجم الثروة الكلية .. على مستوى المدى القاهرة هي ثالث أغنى مدينة بمجمل ثروة حوالي 140 مليار دولار بحسب تقرير الثروة في افريقيا 2018. ولكن مع ذلك مصر هي سادس دولة في أفريقيا من حيث نصيب الفرد من الناتج المحلي.
مصر تعتبر من أكبر دول العالم بحسب التقرير في هجرة المليونيرات، مفيش إحصاء دقيق عن الأعداد بسبب نقص البيانات، لكن التقرير بيقول على الأقل في أكثر من 100 مليونير السنة اللي فاتت هاجروا من مصر.
- طبعا أرقام زي دي مهمة وبتدي مؤشرات مهمة عن صحة الاقتصاد المصري، واللي المفترض يعني أنه بيمر بعملية إصلاحات دلوقتي وبالتالي هروب رجال الأعمال وأصحاب المال مفروض شيء غريب جدا.
- هنفهم الوضع قد ايه غريب لما نعرف انه مصر محطوطة في نفس التصنيف مع كل من فنزويلا اللي فيها أزمة اقتصادية وسياسية عنيفة، وإيران اللي بقالها أكثر من 15 سنة في عقوبات اقتصادية، وأوكرانيا اللي بتعيش أزمة سياسية عنيفة جدا من 2014 لحد دلوقتي.

تعالى  نشوف كلام الصفحه هل هو صحيح ولا لا 

اولا مصر ليست اكبر اقتصاد فى افريقيا كحجم ناتج محلى ، مصر فى المركز الثانى او الثالث حسب طريقة الحساب فى تنافس مع جنوب 

افريقيا ، والمركز الاول لنيجيريا الدوله البتروليه العملاقه 

 لو عاوز تتاكد تقدر ترجع ترتيب الدول من حيث  الناتج الاجمالى فى مواقع صندوق النقد الدولى او البنك الدولى او حتى الويكيبيديا 

يعنى لما ادمن الصفحه حب يقول كلمه طيبه عن مصر تمهيدا للتدليس وعشان يبين انه بيحب مصر وخايف عليها معرفش يقول كلمه صحيحه ، ربما لانه مش متعود على الحاجتين دول 

انه يقول الحقيقه 

ولا انه يقول كلمة كويسه عن مصر ، اللى منعرفش اذا كانت بلده ولا لا ، لانهم مخبيين معلومات الادمنز

--------------------------------

ثانيا هل مصر من اكبر دول العالم بحسب التقرير فى هجرة المليونيرات ؟

الاجابه برضه لا 

مصر ليست فى ترتيب اول عشرة دول اصلا فى هجرة المليونيرات 

انظر الجدول

لاحظ ان الجدول فيه اعداد المليونيرات المهاجرين و نسبة ثروتهم من اجمالى ثروة الدوله على اليمين 

هتلاقى  المركز الاول الصين اللى انت ليل نهار تقول شايف الصين ، ياريت نبقى زى الصين ، اعملوا زى الصين 

هى اكبر بلد طارد للمليونيرات فى العالم باجمالى 15 الف مليونير بيشكلوا 2% من اجمالى الثروة 

يليها روسيا الاتحاديه ، دوله نوويه عظمى ، ثانى اكبر مصدر سلاح متقدم فى العالم ، حاجه مفتخره ، هاجر منها 7000 مليونير بيشكلوا 6% من اجمالى الثروه دى هناك

يليها الهند .... صاحبة اكبر عدد من الفقراء فى العالم ...ورغم كده انت بتحب تقول شايفين الهند بقت ازاى ؟ هى فى المركز الثالث من حيث هجرة المليونيرات باجمالى 5000 مليونير و ثروه 2% تقريبا 

نيجى للمركز الرابع ، حبيبة الاخوان والكلجيه .... تركيا العظمى ...حلم كل شخص يشعر بالدونيه فى مصر ، هاجر منها 4000 مليونير فى بلد عدد سكانها 80 مليون نسمه تقريبا ، ويشكلوا 10% من اجمالى الثروة ، يعنى عشر الثروة فى تركيا ، ودى اعلى نسبه على الاطلاق  ما بين الدول الطارده للمليونيرات 

ثم تاتى فرنسا و بريطانيا والبرازيل وكلهم دول بيحب الاخوه انهم يتغنوا بها 

ثم السعوديه و اندونيسيا فى ذيل القائمة 

امال فين مصر اللى نصاب الصفحة اياها بيقول عليها من اكبر دول العالم من حيث هجرة المليونيرات ؟

كذب لا اكثر

والاظرف انه بيقولك انه هاجر منها 100 مليونير تقريبا 

ياه !!!!! امال تقول ايه على الدول اللى هاجر منها الاف المليونيرات وفيها دول عظمى 

من التعليقات اللى تدل على النصب ، أو الغباء ايهما اقرب 

انه يقول مثلا ، ان الاقتصاد المصرى المفروض بيمر باصلاح اقتصادى يبقى ليه يهرب منه رجال اعمال ؟ 

الحقيقه ان المؤسسات الدوليه هى اللى بتقول ان الاقتصاد المصر بيمر باصلاح اقتصادى ، الكلام ده مش مصدره الحكومه مثلا عشان يشك فيه  رغم ان حتى لو مصدره الحكومه مفيش مبرر للتشكيك سوى نواياه السيئة

ثانيا من الطبيعى ان وقت الاصلاح الاقتصادى ناس تهرب لبره ، لانه عمليه مؤلمه ، انما النصاب او الجاهل مش بيقول كده طبعا 

المليونير بطبيعة الحال بيروح مكان مفيهوش اصلاح اقتصادى شغال ، لا بيروح مكان خلص عملية الاصلاح الاقتصادى فعلا ويستنى يشوف دولته اوضاعها تستقر وتنتهى من الاصلاح بتاعها وبعدين يقرر يرجع ولا لا 

الكلام ده يقوله لتركيا اللى خلصت الاصلاح الاقتصادى من 15 سنه تقريبا ، ومع ذلك رجال الاعمال بيهربوا منها افواجا وخدوا معاهم عشر ثروات البلد

تعال نشوف تحليله لاسباب هجرة المليونيرات من مصر 

انا فضلت احطلك الصوره سكرين شوت وتقرا اللى هو كتبه بنفسه 

هو بيقولك مفيش امان ، مفيش حقوق ملكية فرديه قويه ، مفيش سيادة قانون ولا منظومة قضائيه محايدة

بيقول مفيش حرية وحيادية اعلام ، مفيش نمو اقتصادى مستدام ، انعدام قدرة الحكومه على التدخل فى الاقتصاد كميسر او منظم بسبب تدخل الجيش 

وبيقول ان مفيش سهولة استثمار ولا تاسيس شركات 

طيب وبدون جدل كتير ، لو افترضنا جدلا وهو غير صحيح ان ده ينطبق على مصر قيراط فهرب منها 100 مليونير ، 100 بنى ادم  يعنى

فلابد ان الامر اضعاف فى دول مثل بريطانيا او فرنسا او تركيا او الصين او روسيا 

دول خسروا كتير اوى ، اضعاف ما خسرت مصر من مليونيرات 

يعنى مثلا الصين خسرت 150 ضعف مصر 

تركيا خسرت 40 ضعف مصر 

روسيا 70 ضعف مصر

الهند 50 ضعف مصر 

بريطانيا  وفرنسا 30 ضعف مصر لكل واحد فيهم 

وغيره وغيره 

 ويعنى كده كل الدول مفيهاش امان ولا قانون ولا حرية اعلام  ولا نمو اقتصادى و عندهم الجيش بيدخل فى الاقتصاد برضه 

كده يبقى الكوكب كله مفيهوش المواصفات دى اساسا بقى 

ولا كل ده هرى وكذب 

ثم يكمل مسيرة التدليس فيقول

طيب ليه الأرقام دي مقلقة؟لثلاث أسباب أساسية- أولا: لأنها بتعكس بشكل كبير مستقبل الاقتصاد في أي بلد، لما الناس اللي معاها فلوس تهاجر ده بيخلي الاقتصاد يخسر ثروات كان ممكن تفضل في مصر وتستثمر وتشغل ناس وتدور عجلة الاقتصاد بشكل أسرع.- ثانيا: أنه هجرة المليونيرات دي بتدي إنطباع سيء للمستثمرين الأجانب، إزاي الأجنبي هيجي يستثمر هنا، وأصحاب الثروة والأعمال المحليين فيهم نسبة قررت تخرج بالشكل ده.- ثالثا: أنه ده بيعكس مشكلة كبيرة في الاقتصاد وبالطبع في الإصلاح الاقتصادي اللي بيتعمل دلوقتي، أرقام ومؤشرات الدخل والثروة في مصر بتوضح تحديدا إيه هي المشكلة .

معنى كلامه برضه ان الصين مستقبل اقتصادها مهبب ومظلم ، لانها اول دوله طارده للمستثمرين 

ونفس الكلام عن الهند ، اما تركيا بقى فدى بقت ورا الشمس

بريطانيا و فرنسا دول اكيد هيشحتوا 

وهكذا 

ولا هو الارقام دى مقلقه فى مصر فقط و عادى بالنسبه للباقيين ؟

الحقيقه بالارقام ان لو هى مقلقه 1% فى مصر فهى المفروض بنفس المعيار تبقى مقلقه 150% فى الصين 

40% فى تركيا 

وهكذا 

لكن طبعا هو مش هيقول كده ، امال هينصبوا عليكم ازاى ؟

فى الحقيقه مصر ذكرت عرضا فى التقرير ، باعتبار ان هجرة المليونيرات فيها فى حدود 100 مليونير مهاجر وده بيخليهم يتكلموا عن الموضوع برضه عرضا لكن لان الرقم تافه فاكتفوا بذكرها  حتى بدون احتساب نسب لان الارقام صغيره جدا 

ما هى اكثر الدول جذبا للمليونيرات المهاجرين ؟

زى منت شايف استراليا و امريكا وكندا وسويسرا و الامارات 

ودى امور طبيعيه جدا بالمناسبه لانها دول بتدى جنسيه للاثرياء باستثناء الامارات 

هتلاقى دول وجزء الكاريبي ايضا موجوده وهى قبلة المليونيرات للاقامه والتجنس السهل

فهل جزء الكاريبى فيها استثمار وشركات ممتازه ؟ او قوانين ملكيه فكريه ؟ او  او ..الخ

كل ده كلام فاضى فى الحقيقه 

هل جزر الكاريبى افضل من فرنسا مثلا 

هل اليونان افضل من الصين ؟

البرتغال التى كانت على وشك الافلاس هل هى افضل من بريطانيا ؟

الحقيقه ان البرتغال مركز لهجرة المليونيرات من البرازيل بسبب اللغه اضافة لانجولا وموزمبيق

واسبانيا مركز لهجرة مليونيرات امريكا الجنوبيه برضه بسبب اللغه والثقافة 

اسرائيل عشان الديانه اليهوديه 

دول اللوجستيات زى الامارات وسنغافوره و سويسرا، فهو ده السبب سهولة البيزنس واللوجستيات الماليه  وغيره 

لاحظ ايضا ان التقرير اعلن انه استثنى كل الدول التى تعانى من الحروب ، مثل العراق و اليمن وسوريا وليبيا ، لان طبعا متوقع انها شهدت هجرات جماعيه كامله 

الخلاصة لو ان مصر فى خطر عشان هجرة مائة مليونير

ماذا نقول عن الدول التى هاجر منها الاف المليونيرات ؟

ولا ساعتها بنغمض عنينا؟

ماذا لو ان العام القادم استقبلت مصر عددا اكبر من المليونيرات 

هل ستبتهج الصفحات اياها وتشير لهذا ؟

ابدا 

ستقول ان هذا بسبب ان البلد معدتش بلد المصريين البسطاء والحكومه بتدعم الاغنياء والاجانب فقط

وهكذا

الموضوع ملوش اى علاقه بالاكاذيب اللى بيروجها هؤلاء لاغراض لا تخفى على احد

الرابط للتقرير لو عاوز تشوفه من هنا