لماذا نرفع الدعم ؟

----------------------------

انا اسف لو انت عارف الكلام ده وشايفه بداهات ، انما فيه ناس كتير الموضوع بالنسبه لهم ملخبط وغير واضح ، فلهؤلاء نوجه هذا البوست المبسط ...شكرا لكم

-----------------------------

يعنى اغلب الناس تقول ليه سعر الغاز بيعلى رغم اننا بقينا بنصدر 

نقولهم الغاز سعره مبيرتفعش ، وانما بيترفع عنه الدعم ، يعنى بيرجع لسعره العادل ، السعر الطبيعى اقتصاديا 

طب ليه اساسا مصر بترفع الدعم ؟ متسيبه....... هو تاعبها فى ايه يعنى ؟ 

لا تاعبها يا عزيزى وهقولك ازاى 

انا كان عندى دعم على كل شىء فى مصر ، لانى كنت بدعم الجنيه المصرى نفسه ، اضافة لدعم مخصص على الطاقه ( بترول ، كهرباء ، غاز ) اضافة لدعم غذائى + دعم على التعليم والصحة 

كلمة دعم يعنى ، السلعه او الخدمه ليها تكلفه معينه ، المستهلك مبيدفعهاش ، وانما بيدفع جزء منها ، والباقى ده لازم حد يدفعه ، لان دى التكلفه ، الحد ده كان الدوله ، او الحكومه يعنى 

انت عشت حياتك بتقول الحكومه مبتقدملناش حاجه ...هى مصر ادتنا ايه ؟

دلوقت بعد ما الدعم بيترفع ( على مراحل لم تنته بعد) ، انت حسيت ان الاسعار زادت جدا ، بشكل مؤلم للغايه ، انت المفروض دلوقت تكون فهمت ، مصر كانت بتقدملك ايه ، الحكومه يعنى كانت بتدفع عنك الفرق ده كله ... رغم كده انت مكنتش حاسس بده وكنت بتشتكى برضه..الوضع كان سيىء ومكنتش مرتاح ولا سعيد.. صحيح الحكومه متدفعش الدعم من جيبها ، وانما من الضرائب اللى بالمناسبه غالبا اغلب اللى بيتكلموا اما مبيدفعوهاش او بيدفعوا كلام بسيط مقارنه بدول كتير ، الا ان فى النهايه دى مواردك المحدوده ممكن تصرفها على دعم الاستهلاك زى ما كان الوضع ، او تعمل بيها اشياء تفيد الانتاج بشكل افضل... يعنى كان فيه ثمن لاختيارك انك تدعم الاستهلاك على حساب انك تدعم الانتاج

ما هو ثمن استمرار الدعم ؟

الثمن ده كان ان مفيش صيانه ، مفيش خدمات جيده ، وانما سيئه جدا 

الخدمات كانت بتدهور

زى القطارات المتهالكه 

والكهرباء اللى بتقطع 

والبنزين و السولار اللى مش موجودين 

والخبز اللى بتقف عليه طوابير و بيبقى وحش فى النهايه 

طرق متهالكه تتسبب فى حوادث مؤلمه

الثمن ان الحكومه متقدرش تعمل محطات كهرباء و لا طرق جديده 

مدارس بدون معامل ولا تكنولوجيا 

مستشفيات بدون اجهزه حديثه ولا ادويه كافيه 

الثمن كان ان المنتج بيلاقى نفسه مضطر ينافس سلع مستورده ( مدعومه ) من بلادها ، ومن بلادنا احنا كمان ، لانك بتدعم الجنيه وبتعلى سعره ، عشان تزود قوته الشرائيه ، فكان يقول بلاها انتاج ، نستورد اسهل وارخص واكسب ، بالتالى دمرت الصناعه الوطنيه تماما 

انظر الى العجز المزمن فى الميزان التجارى والذى تضاعف فى اواخر 2007 بسبب الازمه العالميه وقتها ، واستمر فى التزايد بشكل كبير بسبب احداث يناير 2011 وتوابعها 

الثمن كان تدهور مزمن فى سعر الجنيه امام الدولار ، لانك الطلب على الدولار كان دائما اعلى ، انت بتستورد يا فندم لانه ارخص من الانتاج ودى حلقه مفرغه للاسف

الثمن كان زيادة سكانيه غبيه ، لانك كنت بتدعم المولود الجديد ، انت كنت بتكافىء اللى خلف 5 او 6 ، بدعم زياده ، بينما اللى خلف واحد او اثنين ، كان بياخد دعم اقل 

الثمن ان الغنى كان بيتم دعمه اكتر من الفقير ...طبعا ، مهو عربيته 8 سلندر بتسحب بنزين مدعوم اكتر مما يصل الفقير دعما ، ولو حتى عربيته 4 سلندر بس و 1600 سى سى ، فهو برضه غير محتاج عشان تدعمه 

عنده تكييفات و عنده وعنده ، فكان بيستهلك كتير براحته ، انت بتدعمه بقى ، وهو مش محتاج ، يعنى سفه وسوء توزيع 

الثمن كان التهريب ، انت كنت بتدعم شعوب مجاوره يا فندم ، سلع و بضائع و بنزين وسولار كانوا بيتهربوا للسودان و فلسطين ، وانت عارف كويس ان ده كان بيحصل ، بيزنس سهل و مربح ، لو قبضت على مهرب ، هيجى مكانه عشره ، لانها فرصه ربح هائله ، انت موازنتك كانت بتدعم حماس كمان من خلال التهريب ده 

الثمن كان فى الافلاس المرتقب بلا شك ، انت بتدعم الاستهلاك مش الانتاج ، الاستيراد مش التصدير، يعنى فلوسك بتروح لدول تانيه زى الصين مثلا ، يعنى ثروتك بتتسرب لدول اخرى ، ايه النتيجه ؟ 

انك هتفلس ان اجلا او عاجلا زى ما حصل فى فينزويلا مثلا 

كويس كده ولا ازودك شويه فى العيوب ؟

ما هى اهمية تحول مصر لمركز اقليمى للطاقه ؟

طيب مصر عاوزه تبقى مركز اقليمى للطاقه ، ده شىء مهم ليها جدا ، عشان نمنع مستقبلا اى محاولات لضرب استقرارها ، لان ثمنه هيبقى عدم استقرار فى اسواق الطاقه مثلا 

تخيل كده وشوف اهتمام الغرب باستقرار الخليج ، شىء مشابه مصر بتفكر تعمله

هل من الضرورى ان يتم رفع الدعم عن الطاقه من اجل مشروع المركز الاقليمى ؟

طبعا ، لازم الطاقه يبقى سعرها حر ، مينفعش يبقى مدعوم ، عشان تيجى استثمارات كتير تستثمر عندك ، واديك شفت قدام عينك ، كم هائل من الاستثمارات فى قطاع البترول والغاز فعلا والصناعات البتروكيماويه ، يعنى مبضحكش عليك بكلام مستقبلى بعيد ، انت شايف بنفسك ، ان فعلا مع رفع كل انواع الدعم الاستثمارات بدأت تيجى فى القطاع ده وتستثمر ، طاقه متجدده ، او غير متجدده ، وبدأ الدولار ينزل فعلا ، محدش ضحك عليك ولا حاجه 

لو الطاقه مدعومه ، محدش هيستثمر عندك 

ليه ؟ 

لان الاجنبى عارف ساعتها انه مضطر يبيع السلعه دى للحكومه ، اللى بتحتكر البيع ، وان فرق السعر ، هياخده من الحكومه ، وبالتجربه ، كل الحكومات اللى بتدعم ، بتتعثر فى السداد ، يبقى ليه يقرف نفسه ....

لما ميبقاش فى دعم ، يبقى المستهلك هيدفع له ، اول باول ، لو مدفعش ، مياخدش ، وكده يضمن فلوسه 

هل توجد دول لا تزال تدعم الطاقه ؟

فنزويلا نموذج حديث جدا فضلت تدعم الوقود والطاقه الى ان افلست 

حتى دول الخليج التى تحقق فوائض عاليه من بيع النفط ، بدأت فى رفع الدعم عن البنزين والسولار فعلا ، لانها لا تستطيع الاستمرار فى تقديمه مدعوما والا تفلس 

اذن اين ستذهب اموال الدعم بعد رفعه ؟ 

كده الحكومه تقدر تصرف على المستشفيات ، تعمل حملات لكشف الامراض زى حملة مائة مليون صحه اللى كشفت امراض كتير ووفرت العلاج لاصحابها 

كده الحكومه تقدر تعمل طرق حديثه كويسه ، وتقدر تعمل محطات كهرباء وتوفرها ليك وللمصانع 

كده الحكومه تقدر تصرف على التعليم ، وتوفر تكنولوجيا حديثه لتطويره، وانت شوفت بنفسك انها وفرت التكنولوجيا وتدريجيا التجربه هتبقى افضل بكتير 

كده الغنى يدفع استهلاكه ، والفقير يرشد استهلاكه برضه 

كده اللى يخلف ، يخلف على حسابه هو ، مش على حساب غيره ، وهو حر بقى 

كده مينفعش يهرب السلع ، لانها هتبقى بيزنس غير مربح ، انت كده مبتدعمش شعوب اخرى ، كفايه عليك المصريين وضيوفهم هنا 

كده المستثمر بدل ما يستورد ، بقى يقولك لا ، انا اصنع ارخصلى ، فيعمل مصنع ، ويشغل ناس اكتر ، و تلاقى فرصة عمل ، وتدريجيا الراتب يزيد ، لانك بتدعم الانتاج مش الاستهلاك

كده فيه امل لو انت اشتغلت ، ان يبقى فيه بكره ، وتلاقى نتيجه لتعبك ، بعد ما كان الكل بيتساوى فى الاخر 

انت شفت بعينك ان كل ده بيتعمل فعلا الفتره الاخيره ، ولا تستطيع ان تدعى ان هذا غير صحيح ، اذن لا احد يخدعك هنا

لكن هل بيتم رفع الدعم عن الجميع ....كده الفقير هيعيش ازاى ؟

فيه برامج حمايه اجتماعيه ، لكن بحدود برضه ، لان هدفك انهم يشتغلوا ، مش يتحولوا لمتسولين عايشين على معونات 

حتى الدعم هتلاقى لسه موجود على الفئات الاقل استهلاكا فى الكهرباء مثلا 

فيه برامج للفئات الاكثر احتياجا 

يعنى ارمله مثلا معاها اطفال ، دى محتاجه دعم مادى اضافة الى مساعدتها انها تلاقى عمل مناسب 

وان اطفالها يتعلموا من غير تكاليف 

ويتعالجوا علاج جيد لحد ميتجاوزوا سن الطفوله 

انما واحد قادر على العمل بس فقير لانه مخلف كتير ، ده مشكلته هو السبب فيها ، وهيفضل فقير ، محدش له ذنب فى ده غيره هو 

احنا مش مسئولين عن انجابه ، لان برامج تنظيم الاسره موجوده من 40 سنه تقريبا والاعلام اتكلم فى القضيه مليون مره ، فافتراض الجهل ده مش ذنبنا اطلاقا 

اغلب النقد لرفع الدعم وانه بيضر الفقراء هو كلام انشائى لاستدرار التعاطف ، لكنه كلام فاشل ، لا يؤدى الى بناء دول ، ويستحيل تطبيقه عمليا على ارض الواقع 

والدليل ان مفيش دول فى وضع مماثل لينا ، وتقدر تقدم الرعايه الكامله للفقراء اللى انجبوا كثير مثلا ، ولا تقدر تديهم فلوس عشان يعيشوا بشكل كويس ، ده مستحيل وغير موجود فى اى دوله مشابهه لينا فى الوضع الاقتصادى 

الخلاصة 

رفع الدعم ليس امرا اختياريا ، هو امر اجبارى اضطرارى ، كاى دواء ، مر كالعلقم ، لكن لا بديل عنه والا يموت اقتصادك ولن تجد لقمة الخبز ان اشتهيتها