💡أنواع الاستثمار (الجزء الخامس...الاستثمار المباشر الجزء الثانى)💡
--------------------------------------
🔔سلسله من اجزاء!
----------------------------------------
⭕سبق ان تحدثنا فى الجزء الاول عن انواع الاستثمار والقواعد الرئيسيه فيه و تحدثنا عن الاستثمار غير المباشر فى ادوات الدين
------------------------------------------
اليوم نستكمل كلامنا عن الاستثمار المباشر
------------------------------------------
💡الركود
-----------
اغلب المشروعات اللى بتشتكى من الركود ، بيبقى المشكله فيها ، غشوميه من صاحبها ( اغلب يعنى مش كل عشان سوء الفهم ، احيانا فيه ظروف خارجه عن ارادة الانسان )
ليه ؟!!
لان لو السوق فيه ركود من الاول ، فانت دخلت مجال غلط ، انت شفت محلات الكشرى كتير ، فتصورت انها شغاله موت وعملت محل كشرى ، بس الحقيقه ان قله منها شغال كويس والباقى بينش و بيقفل !!
ولو السوق يعتبر الركود فيه جديد ، يبقى تدور على سوق جديد لمنتجاتك ، يعنى مدينتك مش عارف تبيع فيها عشان مفيش طلب كبير او العرض هو اللى كتير يبقى تدور على مدينة ابعد فيها طلب اكتر وعرض قليل ، مفيش ، دور على دوله تانى عاوزه منتجاتك ، امال انت فاكر التصدير عملوه ليه ؟
هتقولى دى شغلانه ياعم!! هقولك امال انت فاكر برضه المشروعات هتكبر ازاى ؟! لو مش عاوز مشروعك يكبر وراضى بحجمه الحالى ، ابشرك انه هيصغر ، لان غيرك هيكبر وياكل حصتك عما قريب !
مفيش كل ده ، يبقى عدل على منتجاتك نفسها عشان يبقى عليها طلب ، غير الجمهور المستهدف ، كنت بتستهدف الطبقه الشعبيه ، ومعنتش عارف تبيع ، شوف طبقه اعلى ، واعملهم اللى هم بيحتاجوه ، شوف الناقص فى السوق واعمله وميز شغلك بحاجه !
منفعش كل ده ، يبقى غير المجال بقى ، هنعمل ايه ؟! متستغربش !، مهو صانعى الطرابيش اللى مفهموش ده فى وقتها ماتوا من الجوع وانقرضوا ، مفهموش ان وظيفتهم معدش عليها طلب زى زمان وفضل يقاوح ، فراح مع الرجلين ، بس منهم ناس طورت نفسهم ، وعملوا طواقى و برانيط و كاسكيتات ، وتابعوا الموضه و طوروا شغلهم ، اهو ده نموذج لتطوير المنتج نفسه مع تطور السوق ، لو كان لقى بلاد تانيه بتلبس الطرابيش كان المفروض يصدرلهم !
الصين مبتستعملش سجادة الصلاه ، لانهم غير مسلمين، انما بتنتجها وبتبيعها ليك انت ، طب متنتجها انت يا فندم هى مش تكنولوجيا صعبه ، اى شىء مستورد بكثره عندك افهم انه فرصه تصنيع محلى جيده ، لان لو فيه بديل محلى ، كان اكل السوق بدل المستورد ، غالبا المستورد ده جه هنا لان فيه طلب ، الانتاج المحلى مش مغطيه !
دى طريقة سهله تعرف بيها مجالات مطلوبه كاستثمارات ، انك تبص على الاستيراد فى اى دوله هتفهم على طول ايه اللى ناقصها وتنتجه انت لو بتعرف
لازم تفهم ان اى مشروع بيمر بدوره نمو ثم يصل لمرحلة استقرار ، وانت وشطارتك ورزقك!
لازم تفهم برضه ان الاقتصاد كله بيمر بدورات ، نمو وانكماش ، افهم ده و توقعه و اعرف ازاى هتعمل للايام الصعبه وجهز نفسك مبكرا ، متعملش متفاجىء بشىء معروف لو كنت قرأت شويه وركزت قبل متفتح مشروع !
لما انزل فى الشارع والاقى عشرين بقاله وسوبر ماركت فى نفس الشارع ، اعرف ان كلهم تقريبا عايشين بالعافيه والامور مهياش تمام ، الصيادله بيشتكو لان كل شارع بقى فيه صيدليتين تلاته ، وبينهم بقى فيه صيدليات جديده ، وبقوا بيضربوا بعض ، ويخفضوا فى هامش ربحهم كمان ، ومستعدين يبيعوا اى شىء لاى حد عشان يجيبوا مصاريفهم ! بعد ما كان الصيدلى باشا ، بقى يدوب مكفى نفسه عشان كثره المعروض ؟!!
زمان فى الارياف كان بيحصل ايه ؟ تلاقى ابو محمد زرع بص ، والبصل اتباع غالى ومكسبه بقى تمام ، تلاقى البلد كلها قامت زرعت بصل السنه اللى بعدها ، يقوم ايه ؟ تلاقى البصل مرطرط و العربيات دايره فى الشوارع تنادى ال 3 بجنيه ؟!! الذكى هو ساعتها اللى بيحسب ويشوف ايه اللى هيبقى ناقص ويعمله ، ميجريش ورا القطيع ، لان المعروض هيبقى ضخم ، ساعتها هتلاقى اللى زرع طماطم ، باعها الكيلو ب 10 جنيه !! بعد ما كانت السنه اللى فاتت ب 1 جنيه!
----------------------------------------
طيب ازاى مشروعى القائم ممكن يتوسع ؟
----------------------------------------
فيه نوعين من التوسع بالنسبه لاى مشروع وهنتكلم كلام بسيط بدون مصطلحات
توسع افقى ، مثلا انك تزود منافذ البيع بتاعتك ، او تشترى حصه فى مصنع بينتج المنتج نفسه بتاعك ( يعنى مثلا انت عندك مستشفى ، فانت هتشترى حصه من مستشفى تانيه سواء فى نفس منطقتك او فى منطقه اخرى ، وحصه فى مستشفى تالته وهكذا ، وهكذا فانت بعد ما كان ليك فرع واحد ، بقى ليك 10 فروع ، وشويه بقالك فروع فى دولتين او تلاته ، وهكذا )
مثال تانى ، انت بتصنع بوتاجازات ، فممكن تتوسع بانك تعمل خط انتاج تانى بيعمل سخانات غاز ، وبعدين سخانات كهربا ، و خط بيعمل غسالات ، وخط بيعمل تلاجات ...الخ وبالتالى تبقى مصنع اجهزه منزليه بدل ما كنت بتشتغل فى البوتاجازات فقط
او ممكن تفضل متخصص فى البوتاجازات فقط ، و تعمل لنفسك كذا مصنع ، مصنع فى الدلتا ومصنع فى الصعيد ، و بعدين تعمل مصنع فى اثيوبيا وبرضه بتنتج بوتاجازات بس !
التوسع الرأسى بقى ، انك تزود نشاطك فى الصناعات او الانشطه اللى ليها علاقه بيك
هديك امثله توضح
يعنى انت عندك مصنع بينتج ملابس ، تقوم تروح تشترى ( او تعمل ) مصنع غزل ونسيج ، عشان ينتجلك القماش اللى هتستعمله فى انتاج الملابس الجاهزه ، و تروح مثلا تشترى سلسلة محلات ملابس ، عشان تعرض فيها موديلاتك ، او تؤسس قسم خاص بالبيع للتجزئه مثلا ، ممكن كمان تشترى ارض وتزرعها قطن عشان تستعمله فى نفس مصانع الغزل والنسيج بتاعتك ومن ثم تنتج قماش من قطن مصرى ، ثم تستعمله فى مصانع الملابس بتاعتك عشان تبقى ضامن سلسلة الامداد والتموين بتاعتك من اولها ، وهكذا
مثال تانى
محل برجر وسندوتشات ، هيتوسع افقيا بانه يعمل فروع كتير مثلا
ويتوسع رأسيا بانه يعمل مزرعة تسمين عجول ومزرعه انتاج دواجن ، و مصنع لحوم مصنعه ( لانشون وبرجر ) ، وبالمناسبه ده مثال موجود فعلا فى السوق المصرى !
كل توسع وله اسلوبه ولو مميزاته وعيوبه وطبعا مش هعرف اشرح ده فى بوست فيسبوك
--------------
💡الفرانشيز
-------------
من ضمن المشروعات اللى بتناسب بعض الاشخاص هى الفرانشايز
يعنى ايه ؟
يعنى انت بتروح لماركه معروفه ، او براند مشهور ، بتاخد حق استغلال العلامه ، و بتشتغل تحت اسمها وبمعاييرها ، وبالتالى هى بتطلب منك مبلغ او نسبه سنويا نظير العلامه واستغلالها ، وهى بتقدملك الدعم الفنى من اول الصفر ، وممكن تدفع الفلوس مثلا وهى اللى تجهز المكان على حسابك بس بمعاييرها
امثله لده ، بعض فروع محلات بيتزا مشهوره او محلات برجر مشهور وعالمى او كافيه ، انت بتاخد العلامه و بتستوفى المعايير ، وبتشتغل تحت اسم الشركه الام اللى هتبعتلك العروض بتاعتها و السيستم بتاعها ، وبتدربلك العاملين ، وانت شخصيا ، على العمل بنظامها ، بحيث يبقى فرعك كانه نسخه من باقى فروعها فى مصر ويمكن فى العالم ، مميزات ده ، انه سهل ، مش عاوز خبره كبيره ومش محتاج دعايه لان البراند معروف و الدعايه بتاعة الشركه الام بتشملك ضمنا ، عيوبه ، انه غالبا عاوز راس مال عالى لو البراند ده تقيل ومشهور ، و فكرة التوسع هنا بتبقى ملهاش وجود ، لانك ترس فى اله لا اكثر ! كما ان نسبه من ارباحك تذهب للشركه الام
ليس بالضروره ان يبقى البراند عالمى ، فيه براندات مصريه ( زى مطعم ام حسن ، او مؤمن مثلا ) ، مش لازم يبقى مطعم اصلا ولا كافيه ، فيه ناس بتاخد حق تصنيع براند معين ( ملابس ، اجهزه (زى توشيبا العربى )، ساعات ...الخ ) او حق تقديم خدمه معينه ( صيانه مثلا زى زانوسى او صيانة سيارات، او معمل تحاليل زى البرج وغيره )
ممكن برضه تبقى موزع او وكيل لماركه معينه وكل نوع له طبيعه خاصه فى التعاقد
------------
💡التصدير
------------
نشاط التصدير ده موضوع كبير ومختلف عن النشاط المحلى ، لان له مواصفات خاصه ، بس برضه مهواش بالتعقيد اللى انت ممكن تتصوره ، لان له دورات معتمده من الحكومه عشان تاخد رخصه تصدير ، ولو مخدتهاش فممكن مسئول التصدير عندك ياخدها ، اى نشاط فى الدنيا تقريبا ممكن يصدر ، حتى لو نشاطك هو البقاله ، لان اى سلسلة محلات تجزئه ممكن تتوسع وتفتح فى دول تانيه ( زى كارفور مثلا اللى جاى من فرنسا اصلا وتوكيله فى المنطقه موجود فى الامارات ) بس ضرورى تراعى اختلافات الثقافات فى المنتج بتاعك ، و تغيره بما يتناسب مع الدوله اللى انت رايحه ، لو انت بتنتج ملابس محجبات مثلا ، ممكن متبقاش فكرة التصدير لاوروبا هى افضل الافكار ، الا لو فى دوله فيها مجتمع مسلم كبير زى فرنسا مثلا و قوانين الدوله مبتمنعش الحجاب لسه زى انجلترا مثلا ، او ان الحجاب بشكل معين بقى موضه !! يبقى المنطقى انك تفكر تصدر لدوله زى اندونيسيا او ماليزيا لو محتاجين او دول زى لبنان والاردن والعراق ، بس تراعى ان ربما فيه اختلاف فى الالوان المفضله ، والتفصيلات المحبوبه هناك غير هنا !
طبعا موضوع زى التصدير ده ممكن نقعد نتكلم عليه بوستات كتير لوحده ، لكن فى النهايه من المهم ان صاحب كل عمل يحط فى اعتباره هذا النشاط عند التوسع ، او عند اختيار النشاط ، لان بكل تاكيد ده بيفتح لك سوق واسع جدا ويساعد على المزيد السيوله والبيع ، ورفع مستوى الانتاج
متحطش فى اعتبارك ان التصدير بيشترط ان انتاجك يبقى جودة هائلة ، بدليل ان الصين اغرقت العالم بمنتجات يمكن وصفها بانها منخفضه الجوده بدون اى حرج ، المطلوب بيبقى شىء تانى ، هو انك تلتزم بالاوراق و المتطلبات للجهه اللى انت هتصدر لها ، يعنى ميبقاش فيه مواد خطر على الصحه مثلا ، التغليف يبقى عليه البيانات المطلوبه كامله ، وباللغه المطلوبه ، شهادات المنشأ تبقى موجوده ومعتمده ، كلام كله عادى ومفهوم ومفيهوش تعقيدات زى منت متخيل ، لكن من الضرورى ان تاخذه بجديه واهتمام
اخيرا لما تعمل مشروع خاص بيك ، اعمل حسابك انه فى الاول على الاقل ، هياخد منك وقت كبير اوى ، يعنى ممكن تشتغل كل يوم 14 ساعه مثلا ، ده الطبيعى لحد ما المكان يقف على رجله وتحل كل مشاكل البدايه ، وتدريجيا الامور بتبقى اهدأ شويه ، فلو انت غير قادر على ده ، اذن فالموضوع ده لا يناسبك
اتمنى ان يكون ما سبق كافى ووافى ان يبقى عندك فكره عن الاستثمار المباشر ، ويساعدك تفكر صح وتختار صح خطوتك الجايه
****************************************************************
بامكانك مراجعة الجزء الاول (قواعد اساسيه + ادوات الدين)
الجزء الثانى ( استكمال موضوع ادوات الدين)
الجزء الثالث ( الاسهم والبورصه)
الجزء الرابع ( الاستثمار المباشر "الجزء الاول")
****************************************************************
Comments
Post a Comment