أنواع الاستثمار ...الجزء الثالث..الاسهم

أنواع الاستثمار ...الجزء الثالث..الاسهم💡

------------------------------------------

🔔سلسله من اجزاء!

-------------------

عاوز تعرف يعنى ايه بورصة ؟ تعال اقرأ وانت هتخرج فى النهايه فاهم الصوره العامه ماشيه ازاى وايه اللى تقدر تعمله لو عاوز تستثمر فيها

⭕سبق ان تحدثنا فى الجزء الاول عن انواع الاستثمار والقواعد الرئيسيه فيه و تحدثنا عن الاستثمار فى ادوات الدين

بامكانك مراجعة الجزء الاول (قواعد اساسيه + ادوات الدين)

http://tiny.cc/x40gfz

الجزء الثانى ( استكمال موضوع ادوات الدين)

http://tiny.cc/a70gfz

💚نستكمل الموضوع بالحديث عن النوع الثانى من الاستثمار غير المباشر

-----------------------------------------------------------------------

معلش هو هيبقى طويل شويه ، بس ده ضرورى عشان الموضوع يبقى كامل ، بدلا من ان نجزءه على مرتين ، انما هو اسهل من السندات ، فربما لو مش فاضى او مفيش وقت ، احفظه واقرأه مره اخرى فى وقت افضل

------------------

💡ثانيا الأسهم 💡

------------------

الاسهم بقى ، اللى هى النوع الثانى من صور الاستثمار غير المباشر ، دى موضوع كبير جدا ، فيه عشرات الالاف من الكتب اللى بتتكلم عنها ، انما احنا هنا عاوزينك تفهم الصوره العامه عشان تعرف تاخد قرار مبدئى فى الاستثمار ، وتبقى فاهم الدنيا ماشيه ازاى (بشكل عام ) ، ولما تقرأ خبر ما فى الاقتصاد ، تفهم تاثيره ايه عليك ، وانك عشت سنين متصور ان صفحة الاخبار الاقتصاديه دى مكانها الطبيعى تحت الاكل وقت الغداء لان مفيهاش حاجه مهمه ، عكس طبعا صفحة الرياضه او صفحة التليفزيون ( للجيل اللى كان بيشوف برامج التلفيزيون كلها مكتوبه فى العدد الاسبوعى )

🔹الاسهم يا فندم عباره عن حصة ملكيه ، يعنى من الاخر انت شريك فى المشروع او الشركه صاحبة الاسهم ، ليك معاهم فى المكسب ، وفى الخساره ، وليك انك تبيع السهم لحد تانى ، او تشترى اسهم زياده ، وعادة ده بيتم من خلال سوق كبير للاسهم ، اسمه بورصه اسهم الشركات

فى كل دوله فى العالم تقريبا بيبقى فيه سوق مالى ، له قواعد شبه ثابته ، وبعض القواعد اللى بتتغير من مكان لاخر بخصوص ملكية الاجانب مثلا و حاجات رفيعه كده ، انما القواعد العامه واحده ، واللى يقدر يكسب من السوق الامريكى ، ممكن يكسب برضه من السوق المصرى او الاماراتى ، بس يدرس الامور شويه الاول وهو هيفهم الدنيا ماشيه ازاى

🔸حاليا التداول فى مصر الكترونى ، يعنى انت تبقى قاعد على موبايلك او فى لابتوبك فى اى مكان ، تتابع الاسعار ، وتشترى او تبيع او تراقب بس ، وممكن كمان بالتليفون تاخد قرض وتشترى بيه ، وممكن لو النت مقطوعه تتصل بالتليفون تنفذ شراء او بيع ، الدنيا اسهل مما تتصور

بيبقى مطلوب انك تفتح حساب فى شركة تداول (دول على قفا من يشيل زى مبيقولوا ) ، و تختار الشركه اللى مواصفاتها وخدماتها تعجبك ، هتديك امكانيه للدخول من خلال موقعها تنفذ طلباتك شراء و بيع ، وهى تاخد عمولتها ، و ادارة البورصه ( بيسموها شركة المقاصه ) تاخد نصيبها فى العموله وهكذا ، والاسهم دى بتتحفظ فى ما يسمى امين الحفظ ( بنك بالبلدى ) لانه بيعتبر جزء من ثروتك الماليه ، زيه زى السندات بالضبط ، وزيه زى عقد شراء البيت او الشقه اللى انت عايش فيها

كونك مالك او شريك لحصه فى اى شركه مطروحه فى البورصه ، بيخلى عليك مخاطر ، وبالمناسبه انت من حقك تحضر اجتماعات الجمعيه العموميه بتاعة الشركه وتصوت لقراراتها و تطلب تغيير مجلس الاداره ، بل وانك ترشح نفسك كمان كعضو مجلس اداره طبقا لقوانين الاستثمار الجديده حتى لو كنت تمتلك نسبه ضئيله جدا من الاسهم ، متفرقش ، المهم تقنع الاعضاء بيك

يعنى انت مثلا تقدر تمتلك حصه فى بنك التجارى الدولى ، او بنك فيصل الاسلامى ، او شركة اوراسكوم للاتصالات ، او شركة فودافون مصر ، او اى شركة تتخيلها طالما معروضه فى البورصه

---------------------------------------------------

🔹🔸السهم بيبقى ليه بعض المصطلحات لازم تفهمها

---------------------------------------------------

بيبقى له قيمة اسميه ، دى القيمه اللى تم اصداره بيها اول مره ، واللى المؤسسين بتوع الشركه وقت انشاءها ، دفعوه نظير كل سهم ، يعنى مثلا السهم كان بعشره جنيه ، واللى عاوز يشترك بمليون اشترى مائة الف سهم ، واللى عاوز يشترك بالف اشترى مائة سهم ، وهكذا

فيه قيمة سوقيه ، دى بقى اللى انت هتشترى بيها ، لان القيمه الاسميه دى كانت وقت التاسيس ، دلوقت بعد سنين مثلا ، الدنيا اتغيرت والسعر اتغير وقيمة الشركه اتغيرت ، لو هى نجحت تجذب مستثمرين ، هتلاقى سعر السهم مثلا بقى مائة جنيه ، انت هتشترى بالمائة جنيه دول سهم ، رغم ان قيمته الاسميه كانت ب 10 جنيه فقط ، لكن ده كان تاريخ يا فندم

---------------------------------------------------------------

ممكن شركات يبقى سعر السهم السوقى فيها اقل من قيمته الاسميه ؟!

---------------------------------------------------------------

اه بتحصل ، وبتبقى شركات كبيره كمان ، واحيانا بيبقى لاسباب ماليه واحيانا لا ، يعنى تلاقى السهم قيمته الاسميه عشره جنيه ، وبيتباع ب خمسه جنيه ، ممكن تشترى كده ولما يرتفع السعر تبيع وتكسب الفرق ، وممكن ميرتفعش ابدا للقيمه الاسميه ، عادى بتحصل!

القيمه السوقيه دى بتتغير كل لحظه فى وقت التداول على السهم ، حسب العرض والطلب ، والسعر اللى انت بتشوفه فى اخر النهار فى النشره ده عادة سعر الاغلاق ، اللى هو سعر اخر صفقه تمت على السهم ، وبيتحدد على اساسها ارتفع قد ايه او انخفض قد ايه

البورصه كلها عشان تعرف تراقبها ككل ، عملولها مؤشرات ، يعنى حاجه تديك فكره عن الصوره العامه ليها ، بترتفع ولا بتنخفض ، بدلا ما تتابع ال 180 سهم الموجودين !

🇾🇪️فى مصر اهم المؤشرات هى EGX30 ده مكون من اهم 30 شركه وكل شركه على قد تقلها وتاثيرها بقى لها نسبه مؤثره فى المؤشر ده ، لما بتسمع ان المؤشر انخفض بيبقى هو ده المقصود ، ان متوسط ما لتلك الشركات ( ال 30) انخفض ، لكن عادى هتلاقى بينهم شركات ارتفعت برضه ، بس الغالبيه بتكون انخفضت

فيه مؤشرات تانيه زى EGX70 – EGX100 ودول بيتكونوا من 100 او 70 شركه حسب الرقم ، وبالتالى بيعبروا عن عدد اكبر من الاسهم ، لكن مبتركزش على الاسهم القياديه الاساسيه اللى هم ال 30 ، وبالتالى هم مؤشرات فرعيه اقل اهميه

-------------------------------------------

🔹ايه اهمية البورصه اصلا للشركات ؟🤔🤔

----------------------------------------------

البورصه وسيلة تمويل ، يعنى انت متخيل شركة سهمها وقت اصدارها كان ب 5 جنيه ، وبعدين باعت جزء من اسهمها عشان توفر فلوس وسيوله ، السهم ب 50 جنيه ، طبعا ده تمويل كويس ورخيص لان مفيش فوايد على الشركه ، مفيش بنك يقرفها بشروط وائتمان ويهددها ، لا هو كده دخلك شريك ، تشيل معاه لو الدنيا وقعت ، ولو كسب اهو ليك نسبه من الربح

برضه سهل تدخل شركه او تطلع منها ، عاوز تدخل شركه اشترى سهمها ، عاوز تطلع بيع سهمها ، عاوز تقلل ملكيتك ، بيع شويه وسيب شويه ، وبرسوم بسيطه خالص ، اسهل بكتير من ضرائب المبيعات وغيره وبالتالى بتمكنك من الاستثمار بمصاريف منخفضه جدا

تقدر تفهم ليه الحكومه عاوزه تطرح بعض الشركات فى البورصه

لان كده هيوفر لها تمويل ، وهيوسع قاعدة الملكيه ، محدش يقدر يتكلم عن فساد ، لان الاسهم تقدر تشتريها من السوق قدامك ، وتقدر تشارك فى ادارة الشركات دى بصفتك مساهم فيها ، وتحاول تحسن من ادارتها وترشدها عشان تحقق ارباح ، ده من مصلحتك ، على عكس طبعا موظفين القطاع العام اللى ميهموش تكسب ولا تخرب ، لان له مرتبه وخلاص !

-----------------------------------

⭕الاستثمار فى البورصه له شكلين

-----------------------------------

اما استثمار طويل الاجل ، يعنى بتشترى سهم فى توقيت معين لانك متوقع انه على المدى الطويل هيرتفع ، وان الشركه دى بتكسب وتوزع ارباح على المساهمين بشكل كويس وده هيبقى اعلى من مكسبك لو حطيت فلوسك فى شهادات استثمار مثلا ، وده بيبقى لشهور او سنوات ، وده نسبه قليله من المتعاملين واغلبه من المستثمرين الكبار و صناديق الاستثمار لانه عاوز ناس فاهمه تفاصيل ماليه وفنيه كتير ، وعندها معلومات مهمه

او استثمار قصير الاجل يعنى انت غرضك هو المضاربه على سعر السهم ، يعنى بتشترى فتره قصيره ، ( ساعات او ايام ) لحد ما السعر يرتفع ، وتبيع وتكسب الفرق وخلاص ولا تستنى توزيعات ارباح ولا انت عاوز تبقى عضو مجلس اداره ولا تحضر جمعيه عموميه ، انت لعبك كله على فرق السعر ، وده يشكل 95% من المتعاملين الافراد على الاقل

عشان تقرر تشترى ايه ، وبكم وامتى ، وامتى هتبيع ، وتبيع ايه ، وتبيع امتى ، ده بيتم على اساس علمين كبار وفيهم برضه جانب فنى شويه بيجى بالخبره

اسمهم ، التحليل الفنى ، والتحليل المالى

التحليل الفنى ده بيديك مؤشرات عن احتمالات الصعود والهبوط ، هى مجرد احتمالات من خلال ملاحظات وخبرات طويله الاجل من متداولين و خبراء وعلماء لتصرفات ( قطيع المتداولين ) ، فبدأ يتكون نماذج ومؤشرات تعرفنا اننا قربنا من الهبوط ، او قربنا من الصعود ، فلو قربنا من الهبوط ، المفروض تبيع ، و لو قربنا من الصعود المفروض تشترى ( يعنى هو محاولة لاستقراء المستقبل من خلال معرفتنا بالتاريخ وانه "ممكن" يتكرر )!!

التحليل المالى ده بقى بيديك مؤشرات عن الاحوال الماليه للشركه ، بتحقق ارباح ولا لا (وايه مصدر الارباح دى ؟ يعنى بتبيع اصولها ولا بتبيع منتجاتها؟)؟! عليها ديون (كل شركة فى الدنيا عليها ديون ، عادى) ؟! وايه طبيعة الديون دى ؟!! بتتوسع ولا بتنكمش ؟ مستقبلها المالى ؟ ده معقد شويه وعاوز تبقى عندك فكره عن المحاسبه الماليه والاداريه نسبيا عشان تفهم الموازنات المعلنه ، وبرضه مهواش بالضروره انه يبقى دليل على ان السعر بتاع السهم هيرتفع بسرعه ، هو بيفيد اكتر صناديق الاستثمار و المستثمرين الكبار اللى عاوزين استثمار طويل الاجل

------------------------------------------

طب ما الامور سهله اهى ؟ ايه المشكله ؟🤔

-------------------------------------------

المشكله انى مقلتلكش حاجه لسه ، وحتى بعد ما تتعلم وتاخد شوية خبره ، هتكتشف ان تنفيذ الكلام حاجه تانيه خالص ، لان فيه عوامل نفسيه بتخليك تعمل اخطاء غبيه ، تخليك تخسر فى الاخر ( اه اغلب الاخطاء مبتبقاش علميه ولا اقتصاديه ، كتير ما بتبقى نفسيه لا اكثر ، وده مينفيش التاثير الكارثى للجهل)

المهم بالنسبه لك انت الامور لها سكه اسهل !!

لو انت عاوز تستثمر فى البورصه و ملكش فيها (زى اغلب الناس) ، فمفيش حل غير صناديق الاستثمار فى البورصه ، ده الحل السهل ، بتشترى فيه بالفلوس اللى انت عاوز تحطها ، وتسيبهم ، هم عندهم مدير وناس بتدرس وبتشترى ، بس المشكله انه برضه ممكن يخسر عادى جدا ، وكلهم فى اوقات الهبوط بيخسروا ، وفى اوقات الصعود بيكسبوا ، وبنسب متفاوته ، متتصورش انه عشان ناس متخصصين يبقى مبيخسرش ! ، لا ، انا قلتلك من الاول ان فيه نسب مخاطره عاليه عشان تحقق عائد عالى ، والعائد هنا اكبر بكتير من ادوات الدين ، لو اتعمل صح

عادة النوع ده هيبقى استثمار طويل الاجل ، ويفضل انك تشترى فى نهايه هبوط طويل ، وعلى دفعات ، مش مره واحده ، وميبقاش كل فلوسك طبعا ، وانما فلوس انت عاوز تستثمرها ( يعنى مستغنى عنها ) وسيبها على الاقل سنه لو فعلا ارتفعت بسرعه ، او سنوات كما يفضل البعض !

برضه فيه صناديق استثمار بتبقى منوعه ، يعنى مثلا 30% من فلوسك هتبقى فى البورصه ، و 70% هتبقى فى سندات ، او العكس او 50% اسهم و زيهم سندات ، وهكذا ، وكل نوع هيبقى على حسب قدرتك وتقبلك للمخاطره ، وده موضوع يتوقف عليك وعلى سنك و طبيعتك الشخصيه ( السن الصغير اكثر تقبلا للمخاطره والخسائر ، لان عمره يتيح له التعويض ، عكس السن الكبير )

------------------------------------

🔸طيب فين صناديق الاستثمار دى ؟

------------------------------------

اغلب البنوك لها صناديق استثمار فى البورصه المصريه وبالتالى روح للبنك اسأل هناك ، و ببحث بسيط عن الموضوع فى جوجل هتعرف اسامى الصناديق دى مصر فيها حوالى 25 صندوق استثمار فى البورصه فقط ، و عدد مقارب من الصناديق المتنوعه ( مزيج من السندات والاسهم ) ، وعدد ضخم من الصناديق الماليه ( اذون خزانه ) يعنى يصل لاكثر من 30 ، لان كل البنوك تقريبا بتعمل لنفسها ، اما السندات فقط فعدد صناديق الاستثمار اقل (حوالى 6 او 7 صناديق سندات فقط ) ، وبرضه بعد شركات الاستثمار الكبيره ( زى بلتون مثلا ) بتعمل صناديق

انصحك انك تدور على عوائد الصناديق دى فى السنين الخمس الاخيره مثلا ، عشان تفاضل بينها وتختار اللى اداءه افضل وتدخل فيه لانها متفاوته

برضه لازم تعرف ان بعض صناديق الاستثمار مغلقه ، يعنى معدتش بتقبل مساهمين ، عادى ، شوف غيرها ، هم كتير يعنى وشوف افضل المتاح !

-------------------------------------------------

طيب ، الى اى مدى مخاطرة الاستثمار فى الاسهم ؟

-------------------------------------------------

الاسهم عموما تعتبر عالية المخاطر ، واحتمالات الخساره بالنسبه لمبتدىء اعلى بكتير من احتمالات المكسب ، وعشان كده الاستثمار فيها بيبقى عاوز مبالغ قليله عشان تتعلم والتزام صارم بالقواعد الخاصه بالتداول والا هتبقى فيه خسائر فادحه !

--------------------------------------------

🔹طب ايه اللى بيؤثر على البورصه عموما ؟

-------------------------------------------

تقريبا كل حاجه ممكن تؤثر على البورصة

لكن فيه شىء مشهور ، سعر الفايده

المفروض ان اسعار الفايده المرتفعه تاثر سلبيا على الشركات والانتاج ، لانها بتضطرهم يقترضوا بمبالغ كبيره ، فيضطروا يقللوا الانتاج ، فتقل المكاسب ، بالتالى اسعار الاسهم هتقل ، والبورصه تنخفض

اسعار الفايده المنخفضه بتؤثر ايجابيا على الشركات وتساعدها على النمو واسعار الاسهم تزيد

اى قرارات تساعد على تحسين الاسثمار بترفع سعر الاسهم

اى قرارات سياسيه او مشكلات سياسيه او ازمات سياسيه لها تاثير سلبى عادة على البورصه

وفاة اى شخصيه عامه كبيره عادة لها تاثير سلبى على البورصه

القبض على اى شخصيه عامه كبيره عادة لها تاثير سلبى على البورصه

هبوط البورصات العالميه لها تاثير سلبى على البورصه ( انهيار بورصه ما حتى لو فى بلاد ما وراء البحار كفيل بان الاثر يوصل للجميع فى العالم )

وارتفاع البورصات العالميه لها تاثير ايجابى طبعا

فيها بقى تاثيرات على قطاعات معينه

يعنى مثلا قلنا ارتفاع اسعار الفايده بيضر البورصه ، بس فيه استثناء ، القطاع المالى ، دول ممكن يستفيدوا من ارتفاع الفايده ( البنوك مثلا )

برضه عندك قرار التعويم ، خلى اسعار اسهم البنوك تطير فى السما ، وده رفع البورصه كلها

ارتفاع اسعار البترول ، هيرفع اسهم شركات البترول ، والبتروكيماويات ، و شركات تكرير البترول ، وانخفاضها بيوقع اسهم الشركات دى ، بينما لها تاثير عكسى على اسعار اسهم شركات الطيران مثلا ، وشركات النقل ، يعنى لما البترول هيرتفع ، اسهم الشركات دى بتنخفض

ارتفاع اسعار الكهرباء ، هيرفع اسهم شركة الكهرباء

ارتفاع اسعار المعادن بيرفع اسعار اسهم شركات التعدين والمناجم

لو فيه ازمة فى الدواجن ( انفلونزا الطيور مثلا ) شركات الدواجن اسهمها بتقع

لو فيه حادثه ضخمه ، فيضان مثلا او زلزال مدمر ، اسهم شركات التأمين بتقع لان هيبقى عليها تعويضات كتير

ممكن تقرأ خبر ان فيه جفاف فى اوكرانيا ، وميهمكش ، انما ده معناه ان القمح مثلا سعره هيرتفع عالميا ، وبالتالى ممكن اسهم المطاحن تدريجيا ترتفع ( لكن فى مصر ممكن ده ميحصلش بسبب الدعم )

او خبر ان فيه فيضانات مدمره فى البرازيل ، وعادى تقول ربنا معاهم ، بس ده معناه ان السكر اسعاره ممكن تزيد لان البرازيل من كبار مصدرى سكر القصب ، وبالتالى اسهم شركات السكر هتزيد ، بينما شركات انتاج الحلويات و الماكولات هتتاثر سلبا وممكن تخسر شويه

وهكذا عشرات الاخبار اللى انت معندكش فكره انها مهمه وهتأثر عليك ، بتبقى مهمه للى ( بيفهم ارتباط الامور دى بالبورصه )

----------------------------------------------------------------

💡فى الخاتمه نقد نقول ان الاستثمار غير المباشر مقصود بيه فى الاصل تعظيم الثروه على مدى طويل لاستعمالها فى المستقبل، او توفير دخل ما بشكل منتظم لشخص متقاعد ، وذلك بمجهود بسيط ( نسبيا )