💡أنواع الاستثمار (الجزء السادس)💡
--------------------------------------
ملحق خاص بالاقتصاد العالمى ، من اجل فهم ما يحدث حولنا وتاثيره علينا للمواطن البسيط غير المتخصص
--------------------------------------
🔔سلسله من اجزاء!
----------------------------------------
من الضرورى ايضا ان نفهم ان الاقتصاد المصرى مرتبط بالاقتصاد العالمى ، يعنى اى مؤثرات اقتصاديه خارجيه بتؤثر على مصر وبالتالى فمن الضرورى ان تفهم ما يحدث بالخارج ( كحد ادنى ) حتى تفهم ما قد يحدث بعد ذلك بالداخل
------------------
البورصات العالميه
-----------------
هناك بورصات اسهم ، وبورصات سلع ، وبورصات لادوات الدين ( سندات واذون خزانه بعضها حكومى وبعضها خاص )
اهم واشهر البورصات فى العالم
⭕البورصة الامريكيه
------------------------
ستسمع عن مجموعة من المؤشرات ، من المهم ان تفهم ما تعنيه تلك المؤشرات ، لانها بتفرق شويه ( سبق ان اوضحنا ان المؤشر يعنى مجموعه من الاسهم بيتم اختيارها بمعايير معينه كممثل عن البورصه لتسهيل المتابعه لكنها طبعا ليست كل البورصة )
🔹مؤشر الداو جونز ، هذا هو اقدم مؤشر امريكى ، يعرف اختصارا باسم "الداو " ويسمى احيانا "الداو الصناعى " ويمثل مؤشر داو جونز أسهم 30 من الشركات الكبرى على النحو الذي تحدده وول ستريت. وطبعا يحوى مجموعه من عمالقة الشركات الامريكيه مثل كوكاكولا و جينرال الكتريك واكسون موبيل وبوينج وكاتربيللر ..الخ ( تلاحظ انه بيمثل اغلب القطاعات والشركات الصناعيه)
🔸مؤشر ستاندرد اند بورز 500 ، ما يطلق عليه مؤشر إس آند بي 500 تم إنشاؤه بواسطة مؤسسه ستاندرد آند بورز ، حيث يمثل أوسع مقياس للاقتصاد الأمريكي بين المؤشرات الرئيسية الثلاث و الأكثر عموماً. لانه يشمل 500 شركة يتم اختيارها من قبل مؤسسه ستاندرد اند بورز ، زى سيتى بنك و وابل و جوجل و بنك اوف امريكا و بيبسى ( تلاحظ انه بيمثل عدة قطاعات ) ويبلغ راس المال السوقى نحو 24 تريليون دولار
🔹مؤشر ناسداك ، هو يشمل 100 شركة تكنولوجيه(يعنى هو مؤشر لقطاع اكتر ما هو مؤشر عام ) ، وبالتالى يعتبر ممثل لشركات التكنولوجيا ، فلو ارتفع وحده ، فانت تفهم ان شركات التكنولوجيا هى من ارتفعت لاسباب خاصه بقطاع التكنولوجيا ، وعندما انهارت تلك الشركات فى فقاعة الانترنت ( سنتحدث عنها قريبا ان شاء الله ) كان مؤشر الناسداك هو الاكثر انهيارا طبعا ، من امثلة الشركات هنا ستجد ميكروسوفت ، و صن و اوراكل و انتل و غيرهم و يبلغ راس مال المؤشر نحو 10 تريليون دولار
طبعا ستجد شركات موجوده فى اكثر من مؤشر لانها عملاقه مثلا وفى نفس الوقت تكنولوجيه ، ده عادى
اهم البورصات فى امريكا هى
---------------------------
بورصة نيويورك ( وول ستريت) NYSE
بورصة شيكاغو ( تشتهر بانها تحوى بورصة السلع الاكبر فى العالم ) cme
وتلك البورصات عملاقه بشكل يصعب تصوره بالنسبه للمبتدىء ، حتى ان البورصه المصريه مثلا ، تساوى كلها على بعض القيمه السوقيه شركه او شركتين من شركات تلك الشركات الكبيره فى تلك البورصه
****************************************************************
⭕ثانيا البورصات الاوروبيه
-------------------------------
** البورصه البريطانيه
-----------------------
اهم مؤشر فى البورصه البريطانيه هو FTSE100 ( فوتسى 100) ، مقره بورصة لندن و يضم اكبر 100 شركة بريطانيه ، ويحوى شركات مثل بريتيش بتروليوم و بنك بركليز وجلاكسو سميث و استرا زينكا ( شركات ادوية ) و HSBC بنك
راس مال المؤشر سوقيا نحو 2 تريليون استرلينى !
** البورصة الفرنسية
-------------------------
ومؤشرها الاهم اسمه الكاك 40 ومقرها فى باريس ، Cac 40 ، ويحوى 40 شركة تقريبا ويضم شركات فرنسيه مثل كارفور وتوتال (بترول) و بنك كريدى اجريكول وبى ان بى باريبا و غيرهم
ويبلغ راس المال السوقى لهم اكثر من 1.2 تريليون يورو
**البورصة الالمانية
--------------------
مقرها فى فرانكفورت ، واهم مؤشر فيها هو الداكس ، DAX ، يحوى 30 شركة المانية كبرى مثل بى ام دبليو و اديداس و لوفتهانزا و اليانز للتامين و باير للادويه و ودويتشه بنك وسيمنز وغيرهم ، راس المال السوقى نحو التريليون يورو ( المؤشر وليس البورصه كلها )
من خلال المؤشرات الثلاث دول تقدر تتابع البورصات الاوروبيه ، واى مشكلات اقتصاديه فى اوروبا بتسمع فى تلك المؤشرات بسهوله وبدرجات متفاوته
*****************************************************************
⭕البورصات الاسيوية
-----------------------
اهم البورصات فى اسيا هى
اليابان
باعتبارها من اهم اسواق اسيا الراسماليه الصناعيه ، فان السوق المالى اليابانى مهم جدا و موقعه طوكيو ، مؤشره الشهير نيكاى 225 ، وهو مكون من نفس العدد 225 شركه يابانيه ويتم تداول بعض مشتقات هذا المؤشر فى سوق سنغافوره ايضا لاطالة مدة التداول ، اهم الشركات مثل نيسان وتويوتا ونيكون وياماها واتسوكا للادويه و سونى وريكو و باناسونيك وغيرهم
بلغ رأس المالى السوقى نحو 4 تريليون دولار
هونج كونج
تحوى سوق مالي نشط جدا وله مؤشر اسمه هانج سينج
***************************************************************
⭕طيب ماذا عن البورصات السلعية؟!!
------------------------------------
اشهر بورصة سلعيه فى العالم هى بورصة شيكاغو للسلع Comodoties
تختلف تلك البورصات فى ان لكل سلعه مؤشرات خاصه بها ، كما ان البيع يكون من خلال ما يعرف باسم العقود الاجله او Futures ، و باختصار ممكن نقول انك بتشترى الانتاج بسعر دلوقت ، بس التسليم بعدين ، ممكن بعد 3 شهور مثلا ، وممكن متستلمش ولا حاجه ، ممكن تبيع اللى انت اشتريته قبل موعد التسليم لو السعر ارتفع و تكسب فيه ومبروك عليك ( وانت قاعد على جهازك ومشفتش ولا جرام من السلعه دى )
اهم واشهر السلع المقصوده هنا هى كالاتى
------------------------------------------------------
1- البترول :
-------------
طبعا يعتبر البترول من اهم السلع على الاطلاق لانه مصدر الطاقه الاول فى العالم ، بالنسبه للشخص العادى ف (كله بترول ) انما الامر ليس بهذه البساطه فى الواقع ، ستسمع عادة اسمين يتكرران بكثر عند الحديث عن اسعار النفط ، الاول هو
خام (مزيج ) برنت :
تم تسميته على اسم حقل بترولى شهير فى بحر الشمال (اوروبا )
وخام غرب تكساس (الوسيط) :
تم تسميته طبعا كما هو واضح نسبة للولايه البتروليه الشهيره ( امريكا ) وكان يباع هناك مع نفط ولايات اخرى مثل اوكلاهوما والتى تقع شمال تكساس
هناك ايضا انواع اخرى لكن غالبا لن تراها على القنوات و الجرائد ( غير المتخصصه ) !!
ما الفارق ؟
غير ان ده اوروبى وده امريكي ، هتسمع كلمة ( خفيف ، حلو ) ، يعنى يقولك خام تكساس الخفيف والحلو ، يعنى ايه بقى ؟!
حلو دى معناها ان الكبريت فيه منخفض ( عادة اقل من 0.42% ) وده كويس ومطلوب عشان المصافى بتعرف تطلع منه مشتقات جيده و ذات قيمه
خفيف معناها ان كثافته خفيفه ، وده برضه مطلوب اكتر فى المصافى ومحطات التكرير
النوعين ، برنت و تكساس يعتبروا ( خفيف و حلو ) ، لكن تكساس اخف ، واحلى ، وعشان كده بيتسمى خام تكساس الخفيف والحلو ( باعتباره افضل فى المواصفتين )
اغلب ابار النفط فى العالم بتربط نفسها باحد المؤشرين حسب مكوناتها اقرب لمين مثلا
برنت اكثر انتشارا وشيوعا كمعيار قياسى !
وكما قلنا فيه مؤشرات معياريه اخرى بيتم استعمالها لكنها اقل شهره !
💚يفترض عند تحرير سعر البترول فى مصر ( وفى اى مكان فى العالم عامل تحرير لسعر البترول ) بيتم ربط سعر البنزين والسولار وتعديله حسب السعر العالمى ، يعنى يطلع معاه وينزل معاه ، ومفيش حاجه اسمها سعر ثابت تانى ، والسعر بيتفاوت كمان من شركة الى اخرى وربما من محطه الى اخرى حسب موقعها ! ولهذا تلتزم المحطات بلوحة اعلانيه على مدخلها لتوضح السعر عندها ( اليوم )
اهم الاحداث اللى بتؤثر على سعر البترول ، المخزون الامريكى ، لما تسمع ان المخزون الامريكى زاد ، على طول تلاقى سعر البترول بيقع ، ليه ؟
لان معتاد ان امريكا هى اكبر مستورد للنفط فى العالم ، ومؤخرا اصبح ينافسها الصين ، وتبعا لذلك فان برضه اى تباطوء فى القطاع الصناعى ونموه فى الصين ، يعنى هبوط اسعار النفط ايضا، وان كانت امريكا فى عهد ترامب نجحت فى ايقاف اعتمادها على استيراد البترول لتعويض فارق الانتاج والاستهلاك
اما التوترات السياسيه فى الدول المنتجه الكبرى ( روسيا و الخليج العربى مثلا ) فطبعا يصحبه مخاوف من انخفاض الانتاج وبالتالى يزيد السعر
وهكذا فاى شىء هيغير العرض والطلب ، هيغير سعر النفط ، اضافه الى عوامل اخرى ليس موضعها هنا
2- الذهب :
---------
على عكس ما هو سائد بين عموم المصريين ، فان سعر الذهب ملوش اى علاقه بموسم الزواج ، يعنى مبيزدش فى الصيف مثلا ، الذهب له بورصه عالميه ، ولما تسمع كلمة ( استثمار فى الذهب ) فهو ده المقصود ، مش انك تشترى غويشتين و خلخال وتبقى كده بتستثمر فى الذهب ! المهم ان برضه على عكس ما هو سائد بين المصريين ، ان الذهب بيرتفع دائما ومبينخفضش ، فده غير صحيح ، الذهب سلعه كاى سلعه ترتفع وتنخفض ، وسبب انه كان بيرتفع اغلب الوقت بالنسبه للمصريين ، هو ان بورصه الذهب العالميه بتقيمه بالدولار للاوقيه ، ولان الدولار كان بيرتفع بسبب دعم العمله المصريه وبسبب ان مفيش تعويم حقيقى ، فالنتيجه النهائيه ان الذهب ظاهريا يبدوا بيرتفع على المدى الطويل بالنسبه للمواطن المصرى اللى مش فاهم ان السبب هو ( الدولار ) ، انما الذهب ياما ارتفع وانخفض و خرب بيوت ناس كمان وقت انخفضاته القياسيه عادى يعنى ، طبعا فيه احداث معينه بتاثر على سعر الذهب ، يعنى التوترات السياسيه ممكن ترفع سعر الذهب لانه ملاذ امن ، انهيارات البورصات العالميه ( اوقات الفقاعات مثلا ) بيتسبب فى ارتفاع للذهب ، بينما ارتفاع سعر الفايده على الدولار ممكن يخفض سعر الذهب ، لان الناس ساعتها بتفضل الاستثمار فى ادوات الدين الدولاريه عن الذهب ، احيانا باقى المعادن الثمينه زى الفضه والبلاتين وغيرهم بيتاثروا بسعر الذهب ولكل بورصه خاصه بها
3- القمح :
---------
مفهوم ان القمح هو الغذاء الاول فى العالم وبرضه له بورصه ، البورصه دى بتتاثر باى مشاكل تحصل للمنتجين الكبار ، زى امريكا وروسيا واكرانيا وكندا و استراليا ...الخ بينما كبار المستوردين تتربع مصر على رأسهم اللى مثلا لو زاد انتاجها من القمح و قل الطلب فيها على القمح ، ربما تنخفض اسعاره عالميا ، او لو حصل فيضانات او جفاف او اى مشاكل انتاجيه فى بلاد الانتاج سيرتفع سعر القمح على العالم كله ، ومفهوم ان هذا له تاثير سلبى على الموازنه فى مصر.
4- المعادن
------------
هناك معادن كثيره لكل منها مؤشرات خاصه بها ، مثل النحاس والالمونيوم و النيكل و القصدير والحديد طبعا
5- المنتجات الزراعية
-------------------------
الذره والقطن والمطاط والقهوه والكاكاو والارز وقصب السكر
لاحظ ان بعض هذه المنتجات لا تتسم بالمرونه فى الاستجابه لزيادة او نقص الطلب ، مثل المطاط والكاكاو والقهوة ، لانها تستغرق سنوات ووقت ومال كبير للاستثمار فيها ، بمعنى لو ان الطلب زاد فان الانتاج لن يزيد الا بعد سنوات ، ولو ان الطلب نقص ، فان المزارع لن يكون قادرا على ايقاف انتاجه او تقليله الا بشكل محدود ، وبالتالى فان تذبذب الاسعار فى تلك السلع يكون مرتفعا ، مما يجعل الاستثمار فيها ذو مخاطره اعلى بعض الشىء ، وان كانت المكاسب عند تحقيقها مجزيه جدا طبعا !
🔹عندك محصول زى السكر ، طبعا هو محصول جوهرى للمصريين واغلب الشعوب ، لما تلاقى سعر السكر زاد فجأه ، فغالبا فيه حدث جوهرى اثر على الزراعه بتاعته ، خصوصا فى البرازيل اللى بتصدر 60% من انتاج السكر فى العالم !! ومعاها دول امريكا الجنوبيه والوسطى ودول كلهم يعملوا 75% من انتاج العالم ، ودى منطقه مليانه سيول وفيضانات و اعاصير ! ضيف عليهم بقى تايلند واستراليا ( مع بعض 18% ) من التصدير العالمى ، يتبقى افريقيا ، وفيها زيمبابوى و جنوب افريقيا كاكبر مصدرين
المجموعه دى لو فيهم كوارث طبيعيه او جفاف ، يبقى كل سنه وانت طيب توقع ارتفاع فى اسعار السكر ، والارتفاع بقى على حسب حجم الكارثه ، وحجم الدوله وموقعها فى التصدير ، وانت غالبا هتشتم الحكومه رغم ان ملهاش علاقه بالموضوع بشكل مباشر ، وكل اللى الحكومه هتقدر تعمله ، انها تستورد سكر لو فيه عجز فى الانتاج وتطرحه بسعر التكلفه ، او تعمل وقف للتصدير لو فيه فائض فى الانتاج فى مصر وقتها
المستوردين الكبار برضه بيفرقوا ، يعنى شرق اسيا بس بيستورد 60% من استيراد العالم للسكر ، فلما ازمة اقتصاديه تضرب الدول دى و يبقى الناس هناك مش لاقيين ياكلوا ، اكيد استيرادهم للسكر هيقل كتير ، وبالتالى توقع ان السكر هيرطرط ، وسعره ينخفض بقوه
اذن الموضوع بنسبه كبيره مهواش فساد ولا سوء اداره بقدر ماهو سوق عالمى له اسعاره ! ولو تابعت بهدوء هتفهم ، صحيح الحكومه بتزهق من محاولة شرح امور بداهية ليك ، وبتحاول تريحك باى كلام زى تفتيش مخازن المصانع عشان لو مخزنين سكر ( كانه حشيش مثلا !) ، وتحاول تشترى شوية سكر من اى حته وتبيعهملك بسعر مدعوم ، انما فى النهايه برضه هيفضل السكر سعره عالى ، لان ده السعر العالمى بس انت رافض تفهم ده !!
بامكانك كشخص عادى ان تقوم بالاستثمار فى تلك المحاصيل الزراعية من خلال الشراء والبيع فى البورصات ، او بمعنى ادق بالمضاربه على اسعارها ، لانها تباع غالبا بالعقود الاجله ايضا ، وبالتالى ممكن تشترى الان وتبيع بعد اسابيع دون ان تستلم شيئا ، لكن طبعا الامر يحتاج معرفه بطبيعة السوق ، المنتجين ، المستوردين ، متابعة دقيقه للاخبار ودراسة جيده للسلعه التى ترغب فى الاستثمار بها اضافة الى اساسيات التحليل الفنى حتى تستطيع تقليل مخاطر ذلك الاستثمار
🇾🇪️عندما تشترى مصر القمح فانها غالبا تشتريه بنفس الطريقة من تلك الاسواق ، وعندما تفكر مصر فى انشاء (بورصة سلعيه ) و تخزين تلك السلع فى مصر لنقلها عبر قناة السويس من جهه ( محطة تخزين لاعادة البيع والتصدير ) ويمكن لاى شخص الشراء من ذلك المخزن و توجيه الشحنه لاى مكان فى العالم ( او لداخل مصر) فعليك ان تفهم الى اى مدى يكون هذا مشروعات عملاقا و حساسا ، يحتاج تعديلات و تغييرات ماليه وتشريعيه ضخمه فى هيكلك المالى والبنكى ، وربما تغييرا شاملا لامنك المالى ( ارى حتى الان ملامح لذلك التغيير فى الاستراتيجيه المصريه ، ولا استطيع ابدا ان اجزم بفوائده الكامله او سلبياته المحتمله ) ، وليس من السهل ابدا ان تدخل في وسط تلك البورصات العملاقه لان هناك مراكز ماليه ، قد لا تسمح لك ابدا ، بهذه الصوره المثاليه ، ربما نستطيع الحصول على بعض الفتات من كعكه بعضهم، لكن لن يسمح لك احد بالحصول على الكعكه الخاصه بك بدون ان تدفع ثمنا ما !!! وكلما زادت الكعكه ، زاد الثمن !
****************************************************************
بامكانك مراجعة الجزء الاول (قواعد اساسيه + ادوات الدين)
الجزء الثانى ( استكمال موضوع ادوات الدين)
الجزء الثالث ( الاسهم والبورصه)
الجزء الرابع ( الاستثمار المباشر "الجزء الاول")
الجزء الخامس (الاستثمار المباشر " الجزء الثانى")
****************************************************************
Comments
Post a Comment