اللى بيقود الاقتصاد زيه زى اللى يقود سياره
عينه على الطريق ( الواقع الاقتصادى حواليك فى العالم والاقليم)
وكل شويه يضرب بعينه على العدادات اللى قدامه (المؤشرات الاقتصاديه)
ومينفعش يعمل العكس ، انه يقعد يبص على العدادات بس ، وميشوفش الواقع المحيط بيه ، لان غالبا هيعمل كارثه
اهم المؤشرات اللى لازم يضرب بعينه عليها
---------------------
مؤشر النمو الاقتصادى
---------------------
ممكن تعتبر ده عداد السرعه بتاع العربيه ، وهنا هو سرعة النمو الاقتصادى ، نمو الناتج القومى يعنى ، وبيبقى (نسبه مئويه) ، كل ما النسبه تكبر ، كل ما النمو يبقى (بمعدل اكبر) ، يعنى اسرع
مصر كانت عاوزه تقرب من 6% وده رقم كبير حاليا ، غير قابل للتطبيق فى الظروف العالميه السيئه
النمو ده برضه هيساعد على تخفيض البطاله و وتحسين دخل المواطنين ، ولما يزيد عن الحد ، يقلب بتضخم ، ولو نقص عن المطلوب ، هيتسبب فى بطاله و ضعف استثمارات وغيره (يعنى زى السرعه لو زادت عن الحد تقلب بخطوره وحوادث ، لازم تبقى على قد قدرات الطريق والسياره نفسها )
-------------
مؤشر البطاله
-------------
اى حكومه عاوزه تخفض البطاله طبعا، وفيه علاقه عكسيه بين البطاله والتضخم ، حسب ما يعرف باسم منحنى فيلبس ، وسبق شرحته فى بوست سابق
يعنى كل ما التضخم ارتفع (فى حدود المستهدف) ، كلما انخفضت البطاله ، لان الاستثمارات هتزيد والتوظيف هيزيد ، والرواتب نفسها هتزيد
بالتالى برضه لو حصل العكس ، التضخم انخفض (اقل من المستهدف) ، هترتفع البطاله ، لان الاستثمارات هتقل ، و التوظيف هيقل ، والانتاج هيقل (لان المكسب بيقل)
المؤشر ده بيقيس نسبه مئويه برضه
بيقيس نسبه العاملين فعلا الى ( القادرين على العمل والراغبين فيه ، ودى نقطه مهمه لان ممكن تكون قادر بس غير راغب فى العمل ، زى ستات البيوت مثلا فلا يتم احتسابك )
انا اعتبر مؤشر البطاله زى عداد (لفات الموتور) لانك عاوز توصل لافضل سرعه وفى نفس الوقت تخفض عدد اللفات دى للحد الادنى الممكن ، وتقدر تفهم برضه ان شبه مستحيل توصل بالمؤشر ده لصفر
--------------
مؤشر التضخم
--------------
برضه نسبه مئويه
وبيقيس (معدل التغير فى اسعار سله من السلع) واخد بالك من كلمة معدل التغير دى؟
يعنى لما بنقول ان التخضم انخفض ، فلا يعنى ان السعر انخفض ، وانما معدل التغير انخفض ، بدل ما كان بيزيد 10% ، بقى بيزيد 5%
عشان السعر ينخفض ، يبقى المعدل سالب ، وده ممكن يوصل لركود وعواقبه كارثيه طبعا على البطاله اللى هترتفع
المؤشر ده بالذات خطر شويه ومبيشتغلش عليه غير المركزى ، ثم الحكومه ، عامل زى عداد الحراره
الحراره مهمه عشان العربيه تسخن ودورة الزيت تمشى كويس وتعرف تطلع بالعربيه ، فلازم تسخنها شويه فى الاول (تضخم مقبول) ، وبيزيد لحد مستوى معين ، والعربيه بتبقى ماشيه تمام ( ده الحد المستهدف للتضخم ومينفعش تزيد عنه اثناء تحقيق النمو الاقتصادى)
انما لو الحراره عدت المؤشر المطلوب ، وانت عمال تحرق بنزين وتدوس برضه عشان السرعه تزيد ، ايه اللى هيحصل ؟
الموتور هيتحرق و العربيه كلها هتقف....... الاقتصاد بتاعك هتلتهمه نيران التضخم ، وتدخل فى ركود تضخمى ، وعربية الاقتصاد برضه هتقف
----------------------------
مؤشرات الاستثمارات والانفاق
---------------------------
الانفاق بكل انواعه سواء انفاق حكومى ، او خاص استهلاكى
استثمارات داخليه او خارجيه اجنبيه
استثمارات مباشره او غير مباشره
كلها بتصب في صالح ( النمو الاقتصادى )
عامله زى مؤشر (البنزين ، او الوقود) ، ده اللى بيحرك العربيه كلها ، الاقتصاد كله بيتحرك بالانفاق والاستثمارات
لو الانفاق او الاستثمارات انخفضت ، ولو تركت بدون تحفيز ، فهى حتما ستنخفض ان اجلا او عاجلا ، زى تنك البنزين ما بيفضى بمرور الوقت ، وستجد السياره تتوقف وتعطل ، ولازم تجرى (تمونها تانى)
---------------------------------------
دى كلها المعطيات اللى هيستقبلها السائق
--------------------------------------
طيب بعد ما يتلقى المعطيات دى هيعمل بيها ايه ؟
طيب بعد ما يتلقى المعطيات دى هيعمل بيها ايه ؟
ايه الادوات اللى هيستعملها عشان يعدل الوضع الاقتصادى بما يتناسب مع المؤشرات والوضع الاقليمى والعالمى ( عدادات السياره و
الطريق امامه)
سواق العربيه بيبقى عنده
دواسة البنزين عشان يزود السرعه او يقللها
دواسة الفرامل عشان يقلل السرعه بشكل سريع
الفيتيس عشان ينقل الحركه
الدركسيون (المقود) عشان يغير اتجاهه
برضه اللى بيقود الاقتصاد عنده ادوات مماثله
بعضها بيتدخل فى السياسه النقديه
وبعضها بيبقى من خلال السياسه الاقتصاديه الشامله للدوله
السياسه النقديه دى عادة بيمسكها المركزى بالتعاون مع الحكومه طبعا
بينما السياسه الاقتصاديه الشامله دى بتحددها رؤية اشمل بكتير ، رؤية اجهزة الدوله ومؤسساتها المختلفه
ودى اشبه بستايل السواقه ، انت عاوز قياده رياضيه شبابيه ولا قيادة لعائله مثلا ، الاتنين مختلفين كتير ، واحيانا بيحتاجوا عربيات مختلفه
كمان ، مش بس اسلوب قياده مختلف
ازاى نزود سرعة الاقتصاد ؟
----------------------------
اللى هو ازاى نزود النمو الاقتصادى
عندنا هنا دواسات برضه مهمه نقدر نزود بيها النمو الاقتصادى
زى الانفاق سواء حكومى او خاص استهلاكى
لما تلاقى الحكومه قررت تزود الانفاق الحكومى فده يعنى انها قررت تزود النمو الاقتصادى ( سرعة العربيه بالبلدى) ، وعادة العربيات الشابه والصغيره (الجديده) تقدر تسرع بمعدل تسارع اعلى بكتير من العربيات الكبيره الضخمه ، او القديمه نسبيا ، عشان كده طبيعى ان معدل النمو فى الاقتصادات الناشئه اعلى من الاقتصادات المستقره الكبرى (زى امريكا و اوروبا مثلا )
ثمن السرعه دى بيبقى البنزين فى حالة العربيه ، و مخاطر اعلى للحوادث .صح ؟
برضه فى الاقتصاد الثمن بيبقى (دين اعلى) ومخاطر اعلى (للتضخم) ، بس المردود هيبقى تحسن مستوى المعيشه و زيادة معدلات التوظيف وانخفاض البطاله وكل ده مطلوب طبعا لاى حكومه
برضه من ضمن الادوات لزيادة سرعة الاقتصاد (النمو الاقتصادى) هو عملية تخفيض الفائده زى ما اوضحنا البوست الخاص (بالتيسير الكمى لو فاكره من يومين)
تخفيض الفائده هيقلل تكلفة الدين ، وبالتالى هتسهل التمويل ، تسهل الاستثمارات ، هيزود السيوله فى الاقتصاد ويزود الاستهلاك برضه ، وفى النهايه كل ده بيزود الناتج القومى بسرعه زى ما احنا عاوزين
طيب لو عاوز تضرب فرمله مفاجئه ؟
-------------------------------------
يبقى هترفع سعر الفائده بشكل سريع
او / و هتقلل الانفاق الحكومى
هتشدد السياسه النقديه بحيث تقل السيوله فى البنوك وتسحبها من خلال اصدار سندات مرتفعه الفائده ، فالبنوك التجاريه تسارع لشراءها بالسيوله اللى عندها ، لانها مكسب مضمون
وغيره من الادوات البنكيه لتقليل السيوله المتاحه للاقراض
طيب ليه أصلا نضرب فرمله للاقتصاد ؟
حد يكره النمو الاقتصادى ؟!!!!!!
ايوه لما يزيد عن الحد
لما التضخم يشتعل اكتر مما تستهدف
زى ما حصل في تركيا واضطر المركزى انه يرفع الفائده بشكل كبير ضد رغبة اردوغان ، وفضل رافع الفائده ، فعزله اردوغان فعلا ، لان الاناضولى هدفه معدل نمو مرتفع جدا، بينما لا يهمه التضخم كثيرا ، هو مدعوم من رجال اعمال كبار محتكرين الأسواق ، ودول بيحبوا التضخم طبعا ومضاربات العملات
انما ساعتها تركيا دخلت في ازمه اقتصاديه ( عملت حادثه يعنى والموتور اتحرق) وده تسبب في ركود اقتصادى حقيقى
طيب عاوز تعمل انطلاقه سريعه وتحرق بنزين عادى؟
----------------------------------------------------
يبقى زى مقولنا هتخفض الفائده بشكل كبير وتضاعف الانفاق الحكومى زى ما شرحنا فى التيسير الكمى ( وده مصر بتعمله من اول العام من خلال مئات المليارات اللى رصدت لدعم انشطه اقتصاديه كتير واخرهم مائة مليار لمكافحة الكورونا مثلا)
عاوز حركه متسارعه بس تدريجيه ؟
------------------------------------
يعنى هتحرك الفيتيس فى اول كل نقله و بتدوس بنزين على مهلك
يبقى هتخفض الفائده تدريجيا ، و هتعمل تيسير كمى تدريجى ، و هتجذب استثمارات بتطوير البنيه التشريعيه و هتعمل انفاق حكومى متصاعد على البنيه التحتيه عشان تشجع الاستثمارات الاجنبيه فى الفرص الجديده
(كل ده عملته مصر فى السنوات الماضيه قبل ازمة الكورونا)
طيب لو انت شايف ان اتجاهك غلط كله على بعضه وقررت تغيره هتعمل ايه؟
--------------------------------------------------------------------
هنا هتغير السياسه الاقتصاديه كلها للدوله
التغيير في السياسه (النقديه) لن يكون كافيا ، لا ، انت عاوز تغيير في اتجاه الدوله ككل
هتستعمل الدريكسيون
اللى هو هتغير سياستك من اشتراكيه الى راسماليه مثلا
لو عملت التغيير ده بشكل عنيف ومفاجىء ، العربيه ممكن تتقلب
وده حصل في بعض الدول فعلا ، زى الاتحاد السوفيتى و شرق أوروبا
الناس كلت من الزباله فعلا
بينما لو عملت ده تدريجى بتبقى المشكله في التغيرات رغم انها اقل عنفا ، لكن مردودها بطىء واحيانا الشعوب بتقاومها اكتر ، لانها عندها فرصه ، مفيش مفاجئه حصلت (وده حصل في مصر فعلا من السبعينات من خلال مقاومه رفع الدعم )
طيب هل ممكن تحتاج تغير حاجات في عربيتك (هيكل الاقتصاد نفسه) ؟
--------------------------------------------------------
اكيد
زى مقولنا العربيه اللى بتشيل عائله ، غيرالعربيه الشبابى بتاعة السرعه و التخميس
وسواق دى ، غير سواق دى
ساعتها بتعمل تغييرات في الأشخاص ، لان الشخص اللى بيؤمن بالاشتراكيه مش هيعرف يطبق الرأسماليه
الدوله الى بتطبق الاشتراكيه برضه بهيكلها ومؤسساتها
تختلف كثيرا عن هيكل ومؤسسات الدوله اللى عاوزه راسماليه
لازم تعمل خصخصه عشان (تخفف شويه ) الحمل على الحكومه
ممكن تشيل كراسى ملهاش لازمه في العربيه ، و تجمد العفشه او تغيرها بعفشه رياضيه ( انك تخلى الدوله اكثر قدره على تحمل الصدمات والأزمات من خلال تقليل العبء الحكومى بالخصخصه و رفع الدعم وتقليل نسب الدين العام ) ساعتها العربيه بتاعتك (الاقتصاد بتاعك ) هيبقى عربيه خفيفه نسبيا ، سريعه اكتر ، وتتحمل المنحنيات الخطر والمطبات في طريقها من غير ما عفشتها تفك ومن غير ما تضطر ( تنزل سرعتك للأول) ، لا ، انت ممكن تاخد كل ده وانت على الثانى او التالث ( اللى هي نموك الاقتصادى)
Comments
Post a Comment