كيف يتم تحديد الضرائب ؟

كل البشر بيكرهوا الضرائب

وكل البشر شايفين نفسهم مظلومين والضرائب اللى عليهم مرتفعه جدا

ده العادى ، وبالتالي فان كل الناس لو وجدت وسيله ما للتهرب من دفع الضريبه ، فغالبا ، نسبه كبيره هتحاول تستعملها للتهرب من كل او من بعض هذه الضريبه

ومهما كلمته عن أهمية الضريبه للانفاق العام عليه هو شخصيا ، فهو هيفضل ان غيره يدفع ، وهو لا ، انسى جو ( مصلحتك أولا ده مع ناس مستعده تبيع اى شيء لزيادة أرباحها)

دى الطبيعه البشريه عموما ، وقد يهذبها قليلا الوعى ، والأخلاق و الواعز الدينى

لكن ازاى الدوله تحدد الضرائب أصلا ؟

======================

يعنى ايه اللى يمنع الحكومه مثلا انها تيجى الصبح تقول هنعمل الضريبه على الدخل 60% وبكده تزود إيراداتها وتقدر تزود خدماتها وتعملك شغل فنادق !!!

اللى بيمنعها معرفتهم بما يسمى " منحنى لافر"

نسبة لاقتصادى امريكى اسمه "ارثر لافر"

هو المنحنى المرفق اللى يشبه القبه كده

باختصار الراجل قال ان إيرادات الحكومه من الضرائب هتتناسب طرديا مع زيادة نسبة الضرائب الى ((حد معين))

يعنى كل ما الحكومه ترفع الضرائب ( مثلا من 20 الى 25%) فان الإيرادات هتزيد ، الى ان تصل الى مرحله معينه ( اللى هي قمة القبه اللى انت شايفها تحت ، او المنحنى يعنى ) ......

طب بعد كده هيحصل ايه ؟

-------------------------

ببساطه الإيرادات هتقل كل ما الحكومه تزود الضريبه !!!

ليه ؟

لان ساعتها نسب التهرب من الضريبه هتزيد اكتر من الإيرادات المحصله نفسها ، ده بالبلدى كده ، يعنى اللى هتعرف تلمه من الضرائب هيكون اقل من الحصيله اللى جمعتها قبل اخر رفع للضريبه ( يعنى كانت مثلا 30% وانت رفعتها 32% فحصل الانعكاس ده)

اضف لذلك ان الاستثمار نفسه هيقل ، لان الكل هيحس ان المشروع مش جايب همه ، فميعملوش ، او يقفل اللى مفتوح فعلا ، وبالتالي انت تخسر إيرادات فعليه او محتمله

ساعتها الحكومه تفهم انها تجاوزت قمة المنحنى فترجع تعمل تخفيض ضريبى مره أخرى

طبعا فيه ناس كتير متصوره ان الموضوع (بالكيف) و(بالمزاج)

وزير الماليه عاوز يزود الإيرادات ، فيقعد يلعب شويه في نسب الضرائب

وزى منت شايف ان الكلام مش كده خالص ، والناس دى فاهمه كويس المنحنى اللى قدامك ومهواش اختراع جديد ، وبالتالي ونظرا لان البيانات التفصيليه لا تتاح لى او لك ، فمينفعش ، لا انا ولا انت نقترح او نتكلم حتى في موضوع زيادة او تخفيض ضرائب زى منت شايف ، لان الموضوع اكبر من الفهم السطحى البسيط بتاعنا للموضوع