القيمة الزمنية للنقود

القيمة الزمنية للنقود Time Value Of Money

الموضوع ده مهم جدا ، رغم بساطته الظاهريه

وعلى الرغم من الاهمية دى الا ان هتلاقى الكلام عنه قليل ، وربما تكون مسمعتش المصطلح اللى فوق من الاساس لو كنت غير متخصص او غير مهتم بالاقتصاد

الموضوع ده برضه بيمهد للكلام عن موضوع تانى منتشر جدا هنتكلم عنه قريبا جدا

باختصار ، هل هناك قيمة زمنيه للنقود ، ولا قيمة النقود ثابته ؟

اى عيل عارف ان النقود قيمتها مهياش ثابته ، ده شىء صار الجميع يلاحظه ، بسبب ارتفاع التضخم

تاريخ مصر ملىء بموجات التضخم وبالتالى فان الحديث عن الغلاء وانخفاض قيمة النقود يصادف خبرات لدينا جميعا

لكن سيبك من الجنيه نفسه ، ماذا عن الدولار ؟

نفس الكلام برضه ، الدولار له قيمه زمنيه ، بينخفض مع الزمن ، وعمره ما بيرتفع ، على عكس ما يتصور الناس ، وانا هنا لا اتكلم عن قيمته امام الجنيه او اليورو ، بل اتكلم عن قيمته الذاتيه

يعنى ايه بقى القيمة الزمنية للنقود ؟

يعنى بالبلدى ، لو انت مسلف واحد الف دولار ، وعرض عليك انه يديهالك بكره ولا بعد سنه ، هتختار ايه ؟ بفرض ان ثقتك فى انه هيردها 100%

هتختار انه يديهالك دلوقت اذا امكن كمان ؟ طب ليه رغم انها نفس الفلوس ورغم ان قيمتها واحده الف دولار ، ورغم انك مش محتاجها ؟

باختصار لانك لو حطيتها فى البنك هتكسب العائد عليها مثلا 10% ( مجرد مثال) بعد سنه ، وهيبقى المبلغ اللى معاك 1100 دولار

العائد ده تم تحديده على اساس التضخم فى الاساس

طب نفترض انك خدت الفلوس دى منه النهارده فبراير 2019 وحطيتها تحت البلاطه ، وبعد سنه هى فضلت الف دولار برضه وانت طلعتها من تحت البلاطه فى فبراير 2020 مثلا

بس فى الواقع ، انت خسرت 10% من قيمتها ، هى دلوقت (فى 2020) ""قيمتها"" تساوى 900 دولار فى الزمن السابق (2019) بمعدل التضخم المعلن 

طيب انت لو حطيتها مثلا فى وعاء استثمارى زى شهادة استثمار بتدى 10% سنويا ، المبلغ اصبح 1100 دولار 2020 ، انما قيمتها تقريبا هى هى 1000دولار من بتوع 2019 ، بسبب التضخم

كلام بسيط وعادى وسهل ، لكنه مزعج جدا

ببساطه ده بيعنى انه العائد اللى انت بتاخده من البنك ، مهواش ((فايده)) ، ومهواش (( مكسب )) ، الحقيقه هو ((تعويض)) بسيط عن (( فقدان نقودك لقيمتها مع الزمن )) ، انما قيمة فلوسك الاجماليه ، لا تزيد تقريبا ، اما اللى حطها تحت البلاطه لسبب او لاخر ، فهو بيخسر قيمتها يوم بعد يوم من غير ما يحس ، عشان كده الناس الكبار فى السن ذوى الخبره حتى لو غير متعلمين ، يقولوك انهم يعينوا الفلوس دهب او عقارات ، وميشيلوهاش فلوس ، وطبعا هم عادة ميفهموش ايه موضوع شهادات الاستثمار ده ولا البنوك عامة فبيختاروا الشىء اللى يفهموه

كده تفهم ليه القسط بيبقى اغلى من الكاش ، المساله حتميه

وتفهم ليه لما تستلف من البنك قرض لمدة عام ، بتدفع فائده اقل مما لو بتستلف لمدة عامين ، او ثلاثه ، الامر كده مفهوم فى العموم ، لان قيمة النقود نفسها بتنخفض ، والمبلغ اللى هتستلفه من البنك لو رجعته زى مهو بعد 3 سنين ، هتبقى قيمته اقل بكتير ، والبنك يبقى خسران الجلد والسقط !!

طيب ماذا لو ان الشخص اللى شال فلوسه تحت البلاطه ، لسه عاوز يطلع الزكاه مثلا ؟!

كدا مش بس قيمتها الافتراضيه بتقل ، لا وقيمتها الاسميه (المبلغ لن يبقى 1000دولار هيبقى بعد اول سنه 975 دولار تقريبا) كمان هتقل !!! والفلوس دى هتتلاشى مع مرور السنين

الشكل اللى تحت ده بيوريلك ايه اللى هيحصل للالف دولار بافتراض قيمة تضخم ثابته عبر السنوات ، ازاى ان الالف دولار هتنخفض قيمتها لو شلتها تحت البلاطه وانت سعيد ومنشكح لانك شايل دولارات

كل الكلام ده سهل وبسيط وعادى ، رغم انه مزعج للبعض ، لكن هتستغرب برضه ليه مبيتمش شرحه بالتبسيط ده لعامة الناس 

رغم اهميته القصوى

هنستفيد من الموضوع ده لما نتكلم عن الاقتصاد الاسلامى