ما الفارق بين السندات واذون الخزانة بشكل مبسط ؟

مفهوم مسبقا ان الكلام ده للتبسيط وليس للشرح المتعمق ، لمن لا يعرف

اتكلمنا كتير فى شرح اخبار سابقه عن السندات واذون الخزانه وادوات الدين ، لكن فيه ناس كتير متعرفش يعنى ايه الكلام ده

صحيح انا سبق شرحته فى سلسلة الاستثمار وهبقى اعيد نشرها تانى ان شاء الله

باختصار

هل يمكن الاستغناء عن ادوات الدين ؟

اى حكومه فى العالم لما بتعمل ميزانيه السنه القادمه ، بيبقى عندها ايرادات و مصروفات ، لكن على الورق 

الحقيقه ان الايرادات دى لسه هتتلم من الممولين ، بينما المصروفات احيانا بتكون بعضها مطلوبه فورى ، اضافه الى ان فيه 

استثمارات مطلوبه بشكل عاجل 

يعنى مش هينفع الحكومه تقول مفيش قمح الشهر ده ، اصل لسه معاد لم الضرائب مجاش ، صبروا نفسكم بحتة جبنه لحد منلم الايراد و نشترى قمح 

تقوم تعمل ايه بقى ؟

تستلف 

عندها ما يسمى بادوات الدين ، اللى اشهرهم بقى السندات واذون الخزانه 

دول بالبلدى كده ممكن نعتبرهم ورقه الحكومه بتكتبهم على نفسها عشان اللى بيسلفها يضمن حقه ، (كانها) كمبياله مثلا او شيك مستحق الدفع فى تاريخ مستقبلى معين مسبقا 

ايه الفرق بينهم ؟

الفرق فى المده بس 

فى الاتنين بيبقى تاريخ الاستحقاق محدد مسبقا 

اذون الخزانه

 بتبقى عادة بحد اقصى عام تقريبا 

ممكن بعد 90 يوم ( 3 شهور ) او 180 يوم ( 6 شهور ) او 270 يوم ( 9 شهور) او 365 يوم ( سنه )

السندات

 اكتر من سنه ، تبقى سندات ، ممكن سنه ونصف ، ثلاث سنوات ، خمس سنوات ، عشره ، عشرين وهكذا

كلمة خزانه عادة بيقصد بيها الخزانه العامه للدوله ، يعنى سندات حكوميه مهياش شركات لان فيه سندات شركات

 يعنى انت لو صاحب شركه ممكن تستلف من خلال اصدار سندات وتبيعها وتاخد فلوس و تشتغل بيها وتبقى تدفع الفوائد فى مواعيدها ، وترد قيمة السند اللى انت استلفتها فى تاريخ الاستحقاق  وبكده تبعد عن مشاكل البنوك وتعقيداتها نسبيا 

كل واحد من ادوات الدين دى بيبقى له عائد معين بيحسب كنسبه فى المائه من قيمة المبلغ ، يعنى عشره فى المائه مثلا ، وبيتم صرفه دوريا ، يعنى كل 6 شهور مثلا ، و بيتسمى كوبون ، انت بتصرف العائد بتاعك كل 6 شهور طول مدة السند الى تاريخ الاستحقاق اللى بتستلم فيه فلوسك الاصليه كامله من المقترض

اغلب الدين العام اللى انت بتسمع عنه وارقامه بتبقى فى القطاع ده ، حكومه تستلف عشان تصرف على الدوله والشعب

كيف يتم تحديد سعر الفايده

سعر الفايده بقى بيتحدد بعوامل كثير جدا ، اهمها 

التضخم ، لان عادة الفايده لازم تبقى مقاربه للتضخم والا هيزيد لو هى اقل بكتير ، او هيحصل انكماش لو هى اكتر بكتير منه

برضه التصنيف الائتمانى سواء للدوله او الشركه ، حسب مين بيصدر السند ، بيؤثر سلبا او ايجابا على العائد او الفايده

ايضا النظراء ، يعنى الدول المشابهه لينا فى التصنيف الائتمانى والظروف ، بنشوف عندهم الفايده كام ، مينفعش هم يبقوا 15% وانت عامل 10 فى المائه فقط ، كده غالبا المستثمرين هيسيبوك ويروحوا للدوله المشابهه ليك عشان هيكسبوا اكتر هناك 

وده يفهمك ليه ازمة الاسواق الناشئه اثرت علينا سلبا 

انت كنت عاوز تخفض الفائده فعلا ، بس المشكله ان الدول دى رفعتها ، ورفعتها اكتر منك كمان زى تركيا والارجنتين ، بالتالى بقوا بيسحبوا الفلوس من عندك ويروحوا هناك عشان العائد مرتفع جدا اكتر منك ، فاجبروك انك تفضل فائدتك مرتفعه والا هتعانى من هروب الدولارات بره ، وبالتالى سعر الدولار هيرتفع 

عادة الدول بتنفرد بموضوع الاذون ده ، لانه قصير الاجل جدا ، وبالتالى خطر على اى شركه 

الطلب على الشراء ، المركزى بيطرح السندات والاذون بناء على طلب الحكومه للبيع على جهات الشراء المرخص لها ، زى البنوك و صناديق الاستثمار و بنوك الاستثمار ، وبيبدأ مزاد ، او بالادق مناقصه ، لان الحكومه عاوزه تبيع السندات دى باقل فائده ، عشان تقلل ديونها ، بينما المشترى عاوزى فائده اعلى طبعا عشان هو يستفيد ويقلل مخاطره ، بالتالى كل ما الطلب يزيد عن العرض ، كل ما سعر الفائده ينقص ، وبالتالى ده كويس للحكومه والشعب ، لان الدين هيقل ، العجز هيقل

معنى تغطية الطرح  

فلما تسمع ان تم تغطية الطرح 3 مرات ، يعنى مثلا الحكومه عاوزه تستلف مليار ، المستثمرين دول عرضوا 3 مليار عليها ، وساعتها طبعا سعر الفايده يقل ، ده يعنى ان فيه اقبال كبير ، ويعنى برضه ان الوضع الحالى والمستقبلى يعتبر جاذب للمستثمرين ، فالدوله بتقلل الفايده المطروحه تدريجيا  عشان تقلل خسائرها من ناحيه ،، وتوصل للاتزان يعنى يكفيها انها تغطى الطرح مثلا 1.2 مره ، ده تمام ، هى مش هتعمل حاجه بالاقبال الكبير ابو 3 اضعاف ده  سوى استخدامه كمؤشر للجاذبيه على الاستثمار

لما تسمع بقى ان لم تتم تغطية الطرح ، فده معناه الفايده عاليه اوى والحكومه رفضت العروض والموضوع وقف ، لان كل طرف متمسك برأيه ، وده حصل الشهور الماضيه ، قبل ما يبدأ الاندفاع تانى من المستثمرين للشراء فى ادوات الدين المصريه ، ما ادى لانخفاض الفائده عليها  وده شىء كويس طبعا 

انواع اخرى من السندات

بعض انواع السندات بيبقى من  غير فائدة دوريه ، يعنى العائد مبيتصرفش كل 6 شهور وانما بيتصرف مجمع فى نهاية المدة مره واحده مضافا الى المبلغ اللى تم اقراضه 

 بعض السندات ايضا بيبقى لها فائدة غير ثابته ، وانما متغيره 

ودى بيسموها الطافيه يعنى معدل الفائده بيطفو ، كانه قطعة فلين فوق سطح الماء ، اللى هو العائد بتاع المركزى واللى بيحدده كل فتره ، ساعتها بيرتفع معاه وينخفض معاه 

يعنى مثلا لو المركزى رفع سعر الفائده نصف فى المائه ، سعر الفائده على السند هيرتفع نصف فى المائه ،و لو خفض الفائده برضه سعر الفائده هينخفض معاه ، وعادة هتلاقى بيتم اصداره لما بيبقى فيه توقع بالخفض لسعر الفائده عشان ميدفعش المقترض فائده مرتفعه مستقبلا لو اتم خفض سعر الفائده من خلال المركزى 

وبرضه لو كان سعر الفائده المستقبلى غير واضح والامور ضبابيه ، ساعتها العائد الطافى ده بيبقى حل جذاب للطرفين احيانا 

كيفية التداول والاستثمار فى ادوات الدين؟

عادة فيه اسواق ماليه مختصه بتداول السندات والاذون 

يعنى بتعرض فيهم للبيع والشراء من قبل الملاك لمن يرغب فى الشراء

فى مصر عادة السوق دى مغلقه على البنوك الاستثماريه والمصارف فقط ، لكن بعض المصارف بتتيح لعملاءها شراء السندات والاذون من خلالها كوسيط ، يعنى بتاخد الفلوس منهم ، وتشترى هى ليهم و تجمع الكوبونات ، اللى هى العائد اللى بيصرف 

دوريا وتاخذ مقابل التحصيل وتودعه فى حساب عميلها يعنى حاجه شبه شهادة الاستثمار 

انما الاسواق العالميه فالموضوع بيبقى شبه البورصه ، وبيتباع فيها سندات واذون خزانه بتاعة دول كتير ، و بتاعة شركات و كل جهة لها تصنيفها الائتمانى ، وكل عمله لها مدى من الفوائد ،  عوامل كتير بتأثر على اسعار السندات دى 

تاثير الفائدة على سعر السند

 طبعا تفهم ان لو تم رفع سعر الفائده دلوقت مثلا الى 11%  وانت معاك سند صدر من شهر مثلا ،  على الفائده القديمه   واللى مثلا 10% تقريبا ، فده معناه ان فيه سندات دلوقت افضل من سندك ، بالتالى قيمة سندك بتقل 

اضافة الى ان قيمة السند بتقل اصلا مع مرور الزمن حتى لو تم تثبيت الفائده ، لانك صرفت كوبونات سيحرم منها  الشخص اللى هيشتريه منك

اما لو تم خفض سعر الفائده حاليا وبقى 9% مثلا ، فده معناه ان السند اللى معاك قيمته كبيره وزادت ، لانه بيدى فائده اعلى من الموجوده حاليا 

وساعتها تقدر تبيعه بمكسب كويس كمان ، المكسب ده محسوب بدقه عشان يخليه مساوى لقيمه السند الحالى بفايدته الاقل و بيعمل حساب العامل الزمنى والكوبونات الى تصرفت 

لو قرات مقال القيمه للزمنيه للنقود هتفهم برضه ان دى من العوامل الاساسيه لتحديد قيمة العائد 

فيه علاقه عكسيه بين قيمة السند و سعر الفائده ، هنا المقصود سعر الفائده الحاليه يعنى لما سعر الفائده بينخفض ، قيمة السند هترتفع لانه بيحمل فايده اعلى ، العكس بيحصل لما سعر الفائده بيرتفع ، ساعتها قيمة السند القديم بتنخفض 

فانت لما تسمع ان سعر الفائده انخفض ، توقع مباشرة ان اللى معاه سندات بيكسب ولو على المدى القصير 

نظرا لان سوق السندات فى مصر لسه لم يفتتح للجمهور ، فالبنوك هى اللى بتشترى السندات ، و بتقدم للجمهور منتجات مشابهه زى صناديق الاستثمار ،او شهادات الاستثمار

ودول نتكلم عنهم فى مقالات اخرى