الموقف المصرى ....ام الموقف القطرى؟ ماذا يغضب هؤلاء من تايم سبورت!!

لست من متابعى المباريات الرياضيه عموما بما فيها مباريات المنتخب 

لكن ما نتكلم عنه اليوم ليس تحليلا رياضيا ، بل تحليل لمقال نشرته صفحة الموقف المصرى المعروفه بعداءها الصريح للنظام المصرى خصوصا ، والدوله المصريه واجهزتها عموما 

هنا نشرت الصفحه مقالا عن قناة تايم سبورت التى تذيع مباريات بطولة الامم الافريقيه مجانا للشعب المصرى ارضيا وبجودة ارسال عاليه  بحيث لا تخالف القانون ولا تقع تحت طائلة اى عقوبات ، وهو تصرف ذكى للحكومه المصريه 

  المفترض  ان هذا الامر سيسعد المصريين ،  لانه يوفر مشاهدة مجانيه لبطوله كبيره وبجودة عاليه 

والمفترض الا يغضب هنا من الامر سوى القناه القطريه بى ان سبورت ، والتى (تحتكر ) الارسال والبث الفضائى باساليب نعرفها جميعا واشتهرت بها قطر ومؤسساتها 

الغريب ان يكتب ( مصرى ) مقالا غاضبا يهاجم فيه تايم سبورت ، المنطقى ان يكتب هذا المقال قطريون ، او اذا اردنا الدقه ، سيكتبه المال القطرى 

هل هنا نبالغ ؟

تعال نشوف نص ما كتبته الصفحه 

يعنى باختصار هو بيقول ان ده فيه تضييق على بى ان سبورت نكاية فى النظام القطرى لان فيه عداء بينه وبين النظام المصرى 

الرد الطبيعى ...وانت ايه اللى مزعلك على القطريين ؟

السؤال هنا ؟ 

يعنى ده غير قانونى ؟

الصفحه نفسها قالت نصا 

يعنى بتعترف ان من حق مصر انها تبث البطوله ارضيا 

وده اللى مصر عملته بدون مشاكل

يبقى ايه اللى تاعب صفحة الموقف المصرى كما يسمون انفسهم ؟

هم انفسهم جاوبوا على السؤال ده بانه تضييق على بى ان سبورت القطريه اللى كان المفروض حسب امنياتهم ، يحتكروا البث ، ويبيعوه بالسعر اللى يعجبهم ( يصل تقريبا سعر الجهاز الى 1700 جنيه مصري تقريبا+ اشتراك سنوى يتجاوز 2000 جنيه + اشتراك خاص بالبطوله ببضع مئات من الجنيهات  = مبلغ يتجاوز 4000 جنيه كاجمالى تقريبى لو انت لسه هتشترك معاهم عشان خاطر البطوله) و ساعتها كانت الموقف المصرى هتهاجم الدوله المصريه لانها لم توفر للمشاهد المصرى حقه فى المشاهده المجانيه حسب المزايدات المعتاده 

اضافة للسبب الثانى 

تم وضع افتكاسه لا دليل عليها ( ولا يعنى هذا انى انفيها ، لكن مفيش معلومه عشان نقولها بالثقه اللى بيتكلموا بيها ) ان شركة تايم سبورت ملك للمخابرات العامه المصريه من خلال شركة اعلام المصريين اللى الاخوان واعلامهم بيقول انها تابعه للمخابرات العامه المصريه ايضا 

هل فيه دليل على الكلام ده ؟

لا 

طيب بفرض صحة الكلام ده هيبقى فيه كذا نقطه 

اولا ايه مصدر معلوماتهم ؟ يعنى ازاى عرف انها تابعه للمخابرات ، دى معلومه ميعرفهاش غير جهاز مخابرات اخر ، وساعتها نحب نستفسر بقى ايه هو الجهاز الاخر ده واللى القائمين على الصفحة بيتعاملوا معاه وبيجيبلهم المعلومات اللوذعيه دى 

ممكن نستنج انه المخابرات القطريه باعتبارهم بيدافعوا بحماس عن الشركة القطريه ومصالحها ومكاسبها اللى راحت عليهم 

وممكن نستنتج انها المخابرات التركيه ، باعتبارها بتستضيف اغلب الهاربين من مصر 

لكن مش هنقدر نجزم لاننا لا نتعامل مع اجهزة المخابرات عموما زيهم 

ثانيا طب انا كمواطن مصرى يفرق معايا ده فى ايه ؟

بصراحه يفرق ، لان ده معناه ان المخابرات بتاعتنا بتحاول تساعدنى اخد خدمه ممتازه خمس نجوم ، ومجانا كمان وبدون عنتريات تتسبب فى عقوبات او غرامات على مصر ، والمفروض انى اشكرهم ، بفرض صحة الكلام يعنى 

معنى كده ان الدوله حريصه على تطوير الخدمات اللى بتوصل للمواطن وفى نفس الوقت بتحترم القانون والاتفاقات الدوليه 

ده شىء نشكرهم عليه فى الحقيقه 

او ممكن اقول انه ميفرقش معايا طالما الخدمة وصلتنى مجانا يبقى تمام ومليش فيه بعد كده

طب ليه شركه خاصه ؟ ليه مش ماسبيرو ولا القناه الثانيه مثلا ؟

فى الحقيقه ده سؤال لا يصدر الا من شخص عايش فى مية البطيخ كما يقول المصريين 

شخص لا يعرف شىء عن ماسبيرو والقطاع العام الحكومى والبيروقراطيه ،و فشل الجهاز الاعلامى الرسمى فى التطور وكلفته الضخمه والغير مجديه فى النهايه ، لان القناه المذكوره تبث على الاريال العادى ، يبقى فرق ايه عن القناه الثانيه بالنسبه للمواطن سوى خدمة افضل ؟

النقطه الاضافيه هنا ده لا يختلف فى شىء عن التوجه العام للدوله واللى شرحناه كثيرا ، وهو 

ان الدوله بتخفف مراكزها فى المناطق اللى محتكراها زى البث الارضى مثلا 

وبتزود مراكزها فى القطاعات اللى هى ضعيفه فيها زى بعض الصناعات الاستراتيجيه 

هنا هى اعطت الفرصه لشركه مصريه صاعده بقوه ، انها تقدم خدمه ممتازه للمصريين ، مش هو ده تشجيع القطاع الخاص اللى نفس الصفحه المذكوره والتى تسمى نفسها بالموقف المصرى ، كانت بتطالب بيه وبتقول انه حتمى و ضرورى لتشجيع الاستثمار 

 اقرأ المقال ده  عن الحكومه والدوله اللى بتطفش المستثمرين حسب تدليس الصفحة المذكورة 

هيقولك بس دى شركة مخابرات ، هقوله طب فين الدليل ؟ عرفت منين ؟ هل تامر مرسى ده ضابط مخابرات ؟

يرجع يقولك طب فين دور الدوله ؟ طب انت مقتنع انها مخابرات يبقى ازاى بتسال عن دور الدوله ؟ ولا هى مخابرات قطاع خاص؟

من النقطه المهمه ايضا التدليس 

يعنى هو بيقول ان اللى حصل ده بيزود الاعباء على المواطن ؟

يعنى رسيفر واشتراك القناه القطريه اللى هو بضعة الاف من الجنيهات كان عادى ومفيش مشاكل 

انما شراء ايريال هو المشكله ، والمهم هنا ان لو اذيعت المباريات على القنوات المصريه الرسميه العاديه ، لاضطر المواطن ايضا الى شراء نفس الايريال ، يعنى مفيش جديد هينضاف على النقطه دى ، سواء شركه خاصه او ماسبيرو

ايضا قامت الصفحة بالتدليس ، وعندما كشفهم بعض المتابعين تراجعوا بسرعه وحذفوا الكلام بعد اكتشاف الناس لكذبهم 

 حيث قالوا ان هناك اشتراك 500-400- جنيه  ، تتحصل عليه تايم سبورت وهو امر غير صحيح 

انظر للتعليقات 

النقطه اللى فضلت الصفحه تلف وتدور حواليها هى فكرة ان تايم سبورت قناه احتكاريه 

لكن غمضت عنيها عن احتكار بى ان واعتبرتها عقود عالميه وعادى وبيس

هذا  ايضا انتقاد احد المتابعين لهم  الذى فضح ما ارادوا نشره من ان القناه تبث لمن يدفع الاشتراك ، اى احتكار ، وهو ما تم بناء المقال على اساسه ثم تم هدمه فى التعليقات لكنهم ابقوا العنوان كما هو رغم انه بعيد عن الصحه وتم فضحه 

الغريب بقى ان محدش فكر يقول ان ايه البديل ؟ يعنى هل مثلا منطقى ان مصر تطرح البث على 3-4 قنوات ارضيه تتقدم بمزايده 

لتقديم الخدمه دى وتتنافس بينها ، لتقديم بث مجانى فى النهايه ؟

وكل ده فى بضعة اشهر فقط ، كلنا نعلم ان البطوله تم انقاذها من خلال الاستضافه المصريه العاجله ، وكان قد تبقى عليها بضعة اشهر لا اكثر ، اى وقت ضيق ولا يكفى اطلاقا لهذه الخزعبلات 

ثم يعنى ايه الاحتكار فى بث مجانى ؟

الاحتكار لو البث بمقابل ، انما مجانا ....فده عكس كلمة احتكار تماما 

وبعدين هو عارف وبيقول انها شركة خاصه ، وبعدين يقول احنا منعرفش حاجه عن ارباحها اللى خارج الموازنه ؟

طب مهو طبيعى انك متعرفش ارباحها لانها خارج الموازنه ، لانها شركه خاصه ، فين المشكله ؟

هو انت عارف ارباح بى ان سبورت كام ؟

ام انها بتكتب فى موازنة قطر ؟!!

الحقيقه ان الدفاع العبيط والمستميت عن مصالح الشركه القطريه بهذا الهجوم الساذج على الشركه المصريه ، يدل على نقطه مهمه 

مصدر تمويل الصفحه والتى يقول عنها الفيسبوك انها صفحة مموله ، ويخفى تماما اماكن اقامة الادمنز الخاصين بها عكس سياسات الفيسبوك المعلنه ، ما يشير لاموال مدفوعه من اجل هذا الاخفاء ، لان على ما يبدوا ان اماكن اقامتهم كانت فاضحه ومدمره 

المقال كله مبنى على فكرتين 

ان تايم سبورت بتحتكر وده اثبتنا انه مجرد خرف ، لانهم بنوها على اكذوبه انها باشتراك وهو امر ثبت كذبه ويعرف الجميع انه غير صحيح واضطرت الصفحه لالغاءه 

النقطه الثانيه بقى هى التهديد 

وهى اتبنت على جمله منسوبه لاحمد موسى ( واللى تقريبا معرفش حد بيتابعه غير الاخوان والموقف المصرى ) وبيطالب فيها ان القهاوى اللى بتبث اشتراك بى ان سبورت  انها تتقفل وتتغرم على هذا لانها قناه قطريه معاديه 

طيب هل احمد موسى مسئول فى الدوله المصريه ؟

لا

هل احمد موسى مذيع فى قناه رسميه مصريه ؟

لا 

يعنى ده رأى شخصى له ، نحترمه زى ما بنحترم غيره ، وبصراحه الراى هنا له وجاهته 

لكن فى النهايه الدوله عملت شىء اخر تماما ، ووفرت خدمه مجانيه ، اللى عاوز بقى يدفع فلوس هو حر ،هو اللى خسران

الاهم بقى ان الصفحه ذكرت كلام منسوب لاحمد شوبير الاعلامى و عضو اتحاد الكره الشهير ، ان الشركه المذكوره عرضت توفير اجهزة استقبال مجانا للمقاهى دى 

طب شىء عظيم والله يعنى 

ده هيضر المصريين فى ايه ؟ 

ولا حاجه 

امال يضر مين ؟

بى ان سبورت وقطر

لانه هيقلل الاشتراكات 

يبقى الصفحه زعلانه ليه ؟

انت عارف الاجابه ، او عرفتها دلوقت بما لا يدع مجالا للشك

طيب كده هى بتعبر عن الموقف المصرى ولا موقف مين ؟

لكن نشكرهم على المقالات لانها تكفى لمعرفة كل هذا 

رابط المقال على الصفحة المشبوهه لا نقوم بعرضه ، لاننا لا نقدم خدمات دعم لصفحات مموله باموال معاديه للدوله المصريه