مما سبق فهمنا ان عملية التشغيل لليمين الدينى المتطرف ( زى الاخوان ) و اليسار المتطرف ( الاشتراكيين الثوريين ، النقابيين المتطرفين ، حركات يسارية النزعه مثل 6 ابريل و كفايه وغيرهم ) و بعض جهات الاعلام الخاص (عشان اللى كان بيستغرب ليه الاعلام بيعمل تصرفات ومانشيتات تبدوا ضد مصلحة دولته ويقود عمليات التسخين) ، و بعض رجال الاعمال (اللى بيمولوا قنوات وجرايد و مهرجانات تبدوا مشبوهه) ، كلها تتم من خلال صندوق واحد بيصرف على جهات منفصله شكليا وموزعه كل على تخصصه ، اضافة لتسهيلات وحمايه مفهومه
هنا ستجد التطابق فى الخطاب بين تلك الجهات امرا مذهلا ، وكل مفردات الخطاب تخريبية فى النهاية ، تعال نشوف كده
مسئولية المواطن :
ستجد اتفاقا تاما بين تلك الاطراف ان المواطن غير مسئول ، دائما الحكومات هى المسئوله ، حتى عندما تتحدث عن الانجاب ، واللى هو بكل تأكيد امر يقوم به المواطن بنفسه ، ولا يمكن ان تشترك الحكومه فى اى جزء منه ، يتم اخلاء مسئولية المواطن وغسيل يده ، تحت دعوى كلام من نوعية ، ان الجهل هو السبب ، الفقر هو السبب ، رغم انك ستجد ان هناك متعلمين تعليما عاليا ، و لهم مستوى مادى معقول ، يقومون بنفس المشكله ( الاسراف فى الانجاب) ، ستجد فقط انه يتم حصار الامر من طرفى المؤامره بوسائل مختلفه تناسب كل طرف
فاليمين المتطرف يحرم تنظيم النسل اساسا ، ويرى ضروره (الاكثار من النسل ) ، والله سيرزق هذا النسل ، ولا كلام طبعا عن كمية هذا الرزق ، انت هتكفر يا جدع !!
اليسار يرى انها حريه شخصيه ، انت حر تخلف عشره ، او خمسه ، والحكومه ملتزمه بتوفير التغذيه السليمه والتعليم والصحه ، مجانا طبعا ، ازاى مش مهم ، من امتى اليسار بيفكر فى الشكليات دى ؟!!!
النتيجه النهائيه ان المواطن مش غلطان فى الخلفه الكتير ، دى مشكلة الحكومه ، او رزق الهى ، وستسمع من الطرفين كل الكلام الهايف بتاع الثروه البشريه !!
لو شفت نفس المواطن بيعاكس بنت ، او بيتحرش بست ، فانت هتلاقى الطرفين برضه بيرفعوا المسئوليه عن المواطن ده ، لانه جاهل و محروم من الجواز عشان الاسعار الغاليه بسبب الحكومه (الفاشله او المفتريه حسب السياق ) واللى بتنحاز دايما للاغنياء طبعا ، او لان الدوله مقدمتلوش تعليم ممتاز ، دعك من ان عيل صغير عارف ان ده عيب وغلط ، ومهياش محتاجه تعليم ، الامى عارف ده وبيحترمه
والسبب الجاهز التانى هو ان البنت او الست دى (كاسيه عاريه) ولبسها (غير محترم) ومشيتها غير محترمه ، الى ان وصلنا لمرحلة التحرش بالمحجبات مؤخرا ، وفى النهايه يقولك ، وايه اللى منزلها من بيتها ؟! الى اخر الاسطوانه !!
انما المتحرش نفسه ؟!! مفيش اى كلمه ضده ، هتلاقى لما تزنقه بالكلام فى الاخر ، يقولك (الناس) معدش عندها اخلاق ولا دين ؟!! واخد بالك انه مش هيتهم المتحرش ، وانما هيعمم على المجتمع كله وخلاص (ما عدا هو طبعا) وبالتالى بقينا كلنا ولاد كلب عشان خاطره!
نتيجة الافكار السابقه هتلاقى دايما رفع المسئوليه عن المواطن بتؤدى لتحويله لكائن بوهيمى غير مسئول عن اى شىء ، حيوان برى مطلوق فى الشارع ، مهما ارتكب من جرائم هتلاقى واحد ابن ...... بيدافع عنه ، اصله فقير ، اصله محتاج ، اصل فى رقبته كوم عيال ( كأن الحكومه خلفتهم ولزقتهم له ؟!!) ، المواطن نفسه معدش بيحس بمسؤوليته عن تصرفاته ، دايما شايف ان الحكومه هى المسئوله ، ومهما غيرت الحكومه فمفيش فايده ، دايما فاشله فى نظره ، لانها مسئوله عن اشياء ، مستحيل انها تقدر تعمل فيها شىء بدون ما يقوم هو كمواطن بدوره فيها
**اى مشروع هو كذب ووهم مسبقا ، الى ان يتم على الارض ، فان تم فاكيد متمتش دراسته بشكل جيد وهيخسر ، فان نجح ، فاكيد لان فيه ناس كبار مستفيدين من وراه ، ولو جاب فلوس للدوله ، فبرضه كان هيجيب اكتر لولا الاداره الفاشله ، واكيد فيه سرقه ومصالح حصلت من وراه ،!!! وعادة اللى بيقول الكلام ده حمار لو اديتله كشك سجاير ميعرفش يشغله ، ولو له ابن عم شغال فراش فى المرور هيسترزق من وراه!! انما هتلاقى اليمين واليسار بتوعك بيرددوه بحماس كامل وكلنا شفناه بعنينا فى اى مشروع بيعلقوا عليه !
** الحكومه كاذبه حتى لو ثبت العكس عشرات المرات ، افكار مثل ان الدوله فاشله لان ادارتها لصوص باختصار دق اسفين عدم الثقه بين الشعوب وحكوماتها
مشكلتنا مشكلة ادارة وليست مشكلة موارد
( نفس الشخص ده طبعا بيتم استكمال المنطق المعكوس ليه ، بنظريات زى الثروه البشريه ، وبلاد بره بيوزعوا كنافه على الشعب عشان يخلف كتير ويدوا كل عيل سندوتشات حلاوه بالقشطه كل يوم ) وبالتالى فانت عندك ثروه مهوله فى رأى الاخ الجاهل ده ، ومش عارف تديرها ( منت عندك مشكلة ادارة) ، وشوف الصين عملت ايه ؟ وهو ميعرفش عن الصين اكتر من اى دابه على وجه الارض من غير بنى الانسان ولا يعرف سياسة طفل واحد ولا غيره ، هيقولك شوف الهند كام ، وهو ميعرفش ان الهندى افقر منك ومنه بكتير ، وميعرفش الفرق بين معدل زيادة السكان وبين عدد السكان ، بس هو اتربى على الجمل اللى بيرددها لك وخلاص!
**الدعم وحش وعبدالناصر خرب البلد (الاخوان) ، وبعد شويه هيتم ملء عقله بان الغاء الدعم الوحش ده حرب عليه كفقير لصالح الغنى وبالتالى هيبقى ضد اى قرار ، سواء بابقاء الدعم او الغاءه ، حاله دائمة من عدم الرضى بسبب افكار مشوشه
**دائما وابدا الغنى لص وحرامى - الا لو كان تبع الاخوان وتيارهم الفكرى طبعا - ساعتها هيبقى راجل بقى غني عشان بيطلع صدقات و زكاه فربنا باركله ، اما الغنى اللى لص وحرامى ، فهو ميعرفش ليه ربنا باركله ، انما غالبا ده بلاء وربنا هيخسف بيه الارض ، وهتلاقيه شمتان فى اى رجل اعمال لو مر بمشكله ، وهتلاقيه لو اشتغل عنده ، عاوز يسرقه ، مهو الغنى ورجل الاعمال فى كافة اعمالنا الدراميه والسينما و ادبيات الخطاب الدينى ، دائما وابدا ، لص ومستغل وانتهازى ، وبعد كل ده عاوز الناس تعمل قطاع خاص وتشتغل ؟! طب ازاى ؟! طبعا اليسار بيشارك بقوة فى الموضوعات دى لانها على هواهم
** التمويل البنكى حرام ، طب ادينى انت بدون فائده ياعم ، استلف منك مائة الف جنيه سنتين واردهم لك مائة الف ، يقولك لا ، فين المرابحه ؟! ما انا معطل فلوسى معاك سنتين ، طب عاوز ايه ؟ يقولك اكتب انك خدت بضاعه منى بمائة وعشرين الف وبعتهم ليا بمائة الف ، هديك المائة الف ثمن البضاعة الوهميه اللى انت اشتريتها وبعتهالى بخساره عشرين الف فى نفس اليوم عافيه ، وترد لى المائة وعشرين الف بعد سنتين ، وربنا الغنى عن الربا والحرام ؟!!!
** المكسب فى التجاره ، انما الصناعه والزراعه دول اش عرفنا بيهم (على اساس انه بيفهم فى التجاره يعنى !!) ويجى يقولك "تسعة اعشار الرزق فى التجارة" دى وصية الرسول يا بنى ، فلما تزنقه وتقوله اغلب علماء الحديث ضعفوه ، هيتجاهلك برضه وهيقولك الرسول اشتغل تاجر ، طب يابن الحلال ، ما الرسول اشتغل راعى غنم برضه ، ليه مشتغلتش انت راعى غنم ؟!!!! طب كده نقفل بقى الطب والهندسه والعلوم ونشتغل تجار كلنا ؟ طب هنتاجر فى ايه واحنا مبننتجش كلنا ؟ طب انت كنت عاوز الرسول عليه الصلاة والسلام يشتغل كل المهن مثلا ما تقدم منها وما استحدث عشان تبقى سنه ؟! ايه علاقة عمل الرسول بالتجاره فى قبيله كلها كانت تعمل بالتجاره لاسباب لوجستيه معروفه خاصه بالموقع ، بانك متشتغلش غير فيها ، لا الرسول نهى عن العمل فى اعمال اخرى ولا اى شىء ، والموضوع كله ان ظروف المدينه ومكه لم تكن تسمح كثيرا الا بالتجاره وقليل من الزراعه المحدوده كعمل ! لكن اللى هو نفسه ميعرفوش انه دايما كان مطلوب منه يردد الكلام ده للوصول للنتيجه المحدده مسبقا ، وهى البعد عن النشاط الانتاجى ، هيرجعلك تانى للحديث الضعيف المذكور عشان ده مطلوب منه يردده قدامك و99.99% من الناس متعرفش انه حديث ضعيف ، وميعرفوش يعنى ايه حديث ضعيف من الاساس؟!! فما بالك انك تفهمه بقى ان الترديد ده متعمد !!
وهكذاعشرات الافكار هتلاقى دايما بيتم ترويجها بانتظام من اليسار واليمين بشكل مكثف فى اعلامهم ، والثلاثى ده مصروف عليه من نفس الجهه اللى سبق ان شرحناها ، والغرض النهائى تحويل المواطن لكائن غير مسئول ، نطع ، بيقوده منطق اجوف ابله ، مستند على عشرات الخزعبلات غير الواقعيه التى تم ترديدها بكثافه هائله
الافكار دى وغيرها لم يتم نشرها بالصدفه ، كله بيصب فى نفس الاتجاه ، تحويلك من الانتاج الى الاستهلاك ، تحويل من كائن مسئول ربنا كرمه بالعقل ، لمجرد حيوان غير مسئول ، ورمى مسئولية نفسه وعيلته وحياته ومستقبله على الحكومه ، ولان فشله متوقع ، فهيبقى السبب ان الحكومه فاشله ، وليس لانه هو جاهل وفاشل بفضل تلك المعتقدات
كل الافكار المغلوطه والخاطئه اللى فوق تم ترويجها بشكل ممنهج ومنظم جدا ، اوعى تتخيل انها جت كده صدفه ، لو تأملت الاعلام ، كلام الاخوان واليسار ، ستجد كله بيوصل لنفس النتيجه السابقه اللى وصلنالها ، والغريب انك هتلاقى المخلوق غير المسئول ده ، بيتم المطالبه ليه دائما بالديمقراطيه من قبل نفس الجهات ، يعنى انت شايف ان المواطن ده غير مسئول ، ومع ذلك عاوز الشىء الوحيد اللى يبقى مسئول عنه هو ( الديمقراطيه ) و( اختيار من يحكم ) ، يعنى هو مش عارف يختار ( لحياته ) بس يعرف يختار ( لبلده ) ؟!!!!
طبعا انت عارف هو اختار مين لما خد الفرصه ، جرى واختار التيار اللى تم التخديم عليه بقوه لكى يصل للحكم ، وكان كل الترتيب ده بيتعمل عشان الديمقراطيه ، لمجرد ان المواطن غير المسئول ، هيرمى مسئولية كل شىء للتيار اللى هيقوله ، روح يا بنى انت كده ربنا راضى عنك ، وخلاص احنا ( هنأخذك الى الجنه ) انت نسيت الكلام ده ؟!! مش هو ده اللى حصل ؟!!
النتيجه الطبيعيه برضه بعد المرحله دى هى الفشل ، منت ربيت نطع ، مخه مليان زباله ، عاوزه يعمل ايه ؟واحد مصاحب الاخوان واليساريين عاوزه يطلع ايه يعنى ؟!!! بيل جيتس مثلا ؟!! عشان كده الاخوان وصلوا للحكم فى مصر وتونس وليبيا والسودان مثلا ، بس فشلوا برضه بسهوله كامله ، وكان من الطبيعى ان يحصل صدامات مع السلطه الحاكمه ( هم يعنى) وبين الشعب اللى متخيل ان العيب دايما فى الحكومه حسب ما هم ربوه !! واللى بيصرف على الهليله دى كان عارف ومتوقع ده من الاول زى مقولتلك لانه عاوز يحصل حروب اهليه تهد المنطقه وشعوبها تماما ويبقوا مستعدين فى النهايه للانضواء تحت لواءه زى دول اوروبا ما حصل معاها بالضبط !
مؤسسات الدوله فى مصر نجحت فى قلب الترابيزه ، وخلصت الفيلم الهندى ده ، والمواطن فهم خلاص ان الجماعه دول نصابين وضحكوا عليه ، لكن لسه باقى الزباله ، مقدرش يربط انهم كانوا بيرموها فى رأسه عمدا عشان يفضل فاشل ، لسه متصور ان الزباله دى صحيحه ، ولسه بيحاول يدور على تطبيقها على الارض ، ولسه مربطش بين ان اللى قالهاله شويه نصابين ومأجورين حرفيا زى مهو فهم ، وبين انها غلط ، لسه متصور انها صحيحه ، لانه نسى مصدرها ، وتصور انه هو فهمها لوحده بنباهته ، ومفهمش انها اتزرعت جواه بغسيل دماغ طويل الاجل على مر عقود اليوم عبر عشرات الافلام والمسلاسلات والخطب والقنوات والبرامج والجرائد ، الكدبه ضخمه اوى ، صعب يصحى فجأه يكتشف انه كان عايش وهم كبير وكان مغفل ، اللى فاق فى 2013 خلاص فاق ، واللى لسه مكمل ، مش قادر يفصل نفسه من شبكة الوهم عشان خايف يشوف الحقيقه
احنا كنا عايشين فى الماتركس يا عم الحج ، واللى فاق ، شاف العالم الحقيقى على قبحه وصعوباته الحقيقيه ، وهيحارب فى الواقع ، انما اللى لسه مربوط بالشبكه القديمه ، لسه عاوز يشوف العالم القديم ، اللى كان فيه انسان غير مسئول ، واستمرأ الوضع ده
----------------------------------------------
لقراءة الحلقات كاملة
----------------------------------------------
روعة
ReplyDelete